• 815
• ২৯শে এপ্রিল ২০২২ ইং
• Share on:

সিলচর, কাছাড়, আসামদা গেষ্ট হাউস অমা চীফ মিনিষ্টার এন বিরেননা অথুবদা শাবীয়ু: লূপ

ইম্ফাল, এপ্রিল ২৭: সিলচর, কাছার, আসামদা গেষ্ট হাউস অমা শানবা চীফ মিনিষ্টার এন. বিরেননা মীৎয়েং চঙবীদুনা অথুবদা থবক ওন্থোকপীয়ু হায়না অপূনবা খরিরোলগী মালেমগী লূপকী সেক্রেটারি কে এস ঐচ শরতচন্দ্রনা থাদোরকপা চেরোল অমনা ফোঙদোরক্লি। চেরোল অদুনা মখা তারদুনা হায়, মণিপুর অমদি আসাম মৈতৈ অনীগী মরক্তা অচেৎপা ফিরেপ অমা চেৎশিন্নবা মরী অমা শাগৎসি হায়বা তারগদি পুৱারী ওইরিবা নিংথৌরোলশিংগী খোঙ্গুল অসি ঐখোয় পুম্নমক্না কন্নবা হোৎনবা য়াম্নমক মথৌ তাই। চহী ৭ খুন্তাকপদা আসামগী খোইরেন খুলদা লৈবা নরসিংহ মহারাজ অমদি গম্ভির সিংহ মহারাজনা নোর্বিল পাৎ অসি লেং ওন্দনা শীৎপা ঙমখিবা অদুনা মরম ওইরগা পাৎ অসি লেং ওন্দবী পাৎ হায়না খঙনখিবা খোইরেল খুল অসি ঙসিদি সোরোজিনি দত্ত কৌবা মীওই অমগী মমিংদা লৈবসি মণিপুরগী লাইবক থীবনি। মরম অদুনা মীয়াম্না মতেং পাংবীদুনা অমদি লৈঙাক্না হীরম অসিগী মতাংদা অখন্নবা মীৎয়েং চঙবীয়ু হায়বনচিংবা ৱাফমশিং অসি মালেমগী লূপ মণিপুর অমদি সাহিত্য পরিষদ কাছাড়, আসাম অনীনা পুন্দুনা সিলচর বোইজ হোষ্টেল কাছারদা লেং ওন্দবী পাৎ কোওর্দিনেটিং কমিটি কৌবা অমা শেমখিবগা লোয়ননা কমিটি অসিনা লৌখিবা ৱারেপশিংনি।

লেং ওন্দবী পাৎ কোওর্দিনেটিং কমিটি অসি চহী অসিগী হৌখিবা মার্চ ৩১ দা শেমখিবা কমিটি অমনি। কমিটি অসিনা আসামগী মৈতৈ অমদি মণিপুরগী মরক্তা অফবা মরী অমা থম্নবগীদমক থবক কয়া পায়খৎলক্নবগী থৌরাং থৌশিলশিংদসু শেম-শারি। নৌনা শেম্লবা লেংওন্দবী পাৎ কোওর্দিনেটিং কমিটি অসিদা লখিপুরদগী খাইদেম কান্ত, সিলচরদগী সাইখোম কমলাকান্ত, কুঞ্জলাল য়েন্দ্রেম্বম, লোকনাৎ ফাঞ্জৌবম, লিকমাবম রঞ্জিৎ, ৱাইখোম অমুচৌনচিংবা মীওইশিং য়াওরি হায়রি।

সোর্স: হুইয়েন লানপাউ