রাধানগরদা রাজর্ষি ভাগ্যচন্দ্রগী মীতম খিনগদৌরি
আগরতলা, এপ্রিল ২৮ : ত্রিপুরাদা মণিপুরাধিপতি রাজর্ষি ভাগ্যচন্দ্রগী মীতম অমা খিনগদৌরি। রাজর্ষি ভাগ্যচন্দ্র কালচারেল ফাউন্ডেশন, মণিপুরনা থৌশিন্দুনা তখেনগী মণিপুরীশিংগী মতেং লৌরগা আগরতলাগী শ্রীশ্রী রাধামাধব দেবতা বাড়ী লাইফমগী মান্ডপ মমাংদা ইনিংথৌ মহারাজা ভাগ্যচন্দ্রগী মীতম খিন্নবগী থৌরাং পায়খৎখ্রে। মীতমসু শাদুনা লৈরে। হিরমসিদা ত্রিপুরা লৈঙাক্কী ডেপুটি সিএম যীষ্ণু দেববর্মা, কালচারেল মিনিষ্টার সুশান্ত চৌধুরী, ডি. এম নচিংবা মকোক মরু ওইবশিংগসু ৱারীসু শান্নখ্রে। লাক্লিবা জুন তাং ২১, ইনিংথৌগী ২৮২ শুবা মপোক কুমওনগা মরী লৈননা পাঙথোক্কদবা থৌরমদা ইনিংথৌ ভাগ্যচন্দ্র মীতম অসি খিনগদবনি হায়না ফাউন্ডেশনগী স্পোকসম্যান তখেল্লম্বম ইরাবত সিংহনা হায়রি। মীতম খিনবগী থৌরমগা মরী লৈননা নট সংকীর্ত্তন পালা, গীতা ভগবত পাঠ, গৌড়ীয় লীলা, থাং-তা নচিংবা মখল কয়াগী নাৎকী ওইবা থৌরমসু পাঙথোক্কনি হায়রি। মীতম মায়খুম হাংদোকপগী থৌরমদা মণিপুরগী এমপি (রাজ্যসভা) নিংথৌ সনাজাওবা লৈশেম্বা, ত্রিপুরাগী ডেপুটি সিএম যীষ্ণু দেববর্মা, রেভিন্যু মিনিষ্টার এনসি দেববর্মা, কালচারেল মিনিষ্টা সুশান্ত চৌধুরী, মণিপুরগী মিনিষ্টার সুশান্ত চৌধুরী, মণিপুরগী মিনিষ্টার থোকচোম সত্যব্রত, মিনিষ্টার কোন্থৌজম গোবিন্দদাস, ত্রিপুরাগী নোংচুপ জিলাগী ডিএম দেবপ্রি বর্ধন নচিংবা মীওইশিং হীরমসিগী মতাংদা খঙহনখিবা লৈখ্রে, থৌরমদা শরুক য়ারবা য়াই। থৌরম অসিদা শরুক য়ানবা মণিপুরদগী ভক্ত চনিরোম ত্রিপুরাদ লাক্কদৌরি।
পনবা য়াবদি আশ্বিনগী শুক্লা তৃতীয়াদা (মেরাগী হুম্নি পানবা) মহারজা ভাগ্যচন্দ্রনা লৈখিদবা নুমিৎ অসি নোংচুপ বাংলাগী গম্ভিলা পাট হায়বা মফমদা চহী খুদিং কীর্ত্তন য়াওনা ভাগ্যচন্দ্র তিরোধান উৎসব পালন তৌই। ত্রিপুরাদা ভাগ্যচন্দ্র তিরোভাব উৎসব অহানবা পাঙথোকপা হৌবসি ইং ১৯৭৬ বনমালীপুরদনি। আসামদসু চহী খুদিং তিরোভাব পাঙথোকই। অহানবা ওইনা আগরতলাদা ইনিংথৌ ভাগ্যচন্দ্রগী মীতম খিনবগা লোয়ননা পোকপা নুমিৎ পাঙথোক্কদৌরিবনি। থৌরমদা মফমসিগী ময়ামসু শরুক য়াবিয়ু হায়না হায়জখি। পনবা য়াবদি কর্ত্তা পরিষদকী মতুং ইন্না খৃ: ১৭৪০ গী জুন ২১, ইঙাগী ২৭নি পানবা নুমিত্তা ইনিংথৌ ভাগ্যচন্দ্র পোকখি হায়রি।
সোর্স : মরূপ
0 কমেন্ট:
কমেন্ট তৌবিয়ু