• 914
• ২৭শে এপ্রিল ২০২২ ইং
• Share on:

নুপী দিরেক্টরশিংগী দ্রামা ফেষ্টিবেল লোইশিনখ্রে, নোমিতা খোংবান্তাবমদা এৱার্দ পীখ্রে

ইম্ফাল, এপ্রিল ২৫ : খেঞ্জোংলাং অমসুং মণিপুর কালচারেল কাউন্সিলনা আজাদি কা অমৃত মহোৎসবকী মনুং চন্না সঙ্গিৎ নাটক একাডেমি, নিউ দিল্লীগী মখাদা শীন্দুনা পাঙথোরকখিবা ২ শুবা নুপী দিরেক্টরশিংগী দ্রামা ফ্রেষ্টিবেল, ২০২২ ঙসি লোইশিনখিবগা লোয়ননা ফেষ্টিবেল অসিগী পাউ কাভারেজ থৌখিববু ইকায়খুম্নবা উৎলদুনা হুইয়েন লানপাউগী সিনিয়র রিপোর্টার নোমিতা খোংবান্তাবমদা এৱার্দ পীখ্রে। এৱার্দ অসিদা সার্টিফিকেট ১ অমসুং ফি ১ য়াওরি।

ঙসি ফেষ্টিবেলগী অরোইবা নুমিৎতা এৱার্দ লান্থোকখিবদা নহারোলগী থৌদাংগী পাউমী নুংশি খুমনদসু এৱার্দ পীখি। লোইশিন থৌরমদা অথোইবা মীথুংলেন ওইখিবা পদ্মশ্রী হৈস্নাম ওংবী সাবিত্রিনা হায়, হৌগৎলক্লিবা নুপী দিরেক্টরশিং য়াওনা ফেষ্টিবেল পাঙথোকপসি নুংঙাই পোকই। নুপী শুমাং লীলাদসু নুপী দিরেক্টরশিং থোরকপদা চাউথোকচবা ফাওই। নুপীনা দিরেক্সন পীবসি নহা ওইনা থানিল লৈমনা হৌদোকখিবদগী হৌজিক্তি নোং চুরগা চেঙ্গুম শৌবদৌনা ফেষ্টিবেল পাঙথোকপা ঙম্লক্লে। পামজদুনা থোরক্লবা অমসুং থম্মোয়না পামজবনা দিরেক্টর ওইনবা হোৎনবদা ত্রেনিংসু তৌবীয়ু। মমিংতগী ওইনা লাকপদি নুংঙাইতে নুপীশিং অশোনবা ওইহনগুমসি হায়খি।

মহাক্কী থম্মোয়দা পামজনা থোরকপগী মতুংইন্না থবকসু অদুমক পাঙথোরক্কনি হায়রদুনা অৱা অনা, মীনোক মৈশা থেংনরগা চৎকদবনি। মসিদা চানীংঙাই লৈতবসু য়াওরক্কনি অদুবু নুপাগী মপান তাংদুনা লাক্লে হায়রগসু তাংদসু য়াদে। নুপীনা হোৎনদুনা মরোমদোম লেপ্পা ঙম্লবসু হোৎনগদবনি। দ্রামা অমসুং লীলা হায়বসি অয়েংবশিংদা ফাওনহনবা ঙম্বা এক্টরগা পূন্না পাউদম্নদুনা অৱা নুংঙাই অমসুং কপমিন্নবনি হায়খি।

থৌরম মপু ওইখিবা মণিপুর কালচারেল কাউন্সিলগী প্রেসিডেন্ট কাংজম রাধাকুমার (রিটায়ার্দ আই এ এস) না হায়, মণিপুর অসি নুপীনা মশীং য়াম্বা কন্সটিট্যুএন্সি খুদিংমক্তসু নুপীনা ভোটার হেল্লি। ইন্দিয়াগী মফমশিংদা নুপানা দোমিনেট তৌরগসু মেঘালয়াদদি খাসি নুপীশিংনা দোমিনেট তৌরি। লন থুমগী ওইবা পুন্সিদা খাসি নুপীনা ওইরিবা ফীভমসি লৈবাকসিগী অমত্তা ঙাইবা মচৎনি। হৌজিক্তি চাওখৎলক্লবনিনা নুপা-নুপী রাইট চপ মান্নরে। মরম অসিনা নমথবীরে হায়বা নত্তবদা পূন্না তান্নমিন্নদুনা চাওখৎনবা হোৎনগদবনি হায়খি।

থানিল লৈমানা নুপী ওইজরবসু য়াম্না ৱারকপা, কৈরাওদা ৱানা খেঞ্জোংলাং হোল শাবদা মৈনা তুম্না থাদোকখ্রবনি অদুবু মদু পূম্নমক করিদগী ওইখিবনো হায়বসু থিজিনবা য়াবদি ওইরি। মসিগী মতুংদা অমুক য়াম্না ৱানা শাজরগা অহিং অমদা নোং নুংশিৎনসু অমুক থুদেকপীখ্রবনি অদুবু ৱারে হায়দুনা তোকপা লৈতনা হনবা লৈতনা থোরক্তুনা হোৎনরক্লিবনি। আর্ট অমসুং কালচার হায়বসিদা তৌশিন্নবা য়াদে। নুপী দিরেক্টরনি হায়রগা নুপানা তৌরগা নুপীদা পানবা হায়বসি এগজামিনেসনদা অরানবা পাম্বৈ শীজিন্নবগা মান্নৈ। মরম অদুনা পূন্না হোৎনমিন্নদুনা অমসুং মতেং পাংনদুনা তৌরিবা শিনফম মশক খঙহনগদবনি। লীলা অমসুং দ্রামা য়েংদ্রিবসি করিদগীনো হায়বসি মীঙোন্দা তাইনদনা ইশানা থিদোক্কদবনি হায়খি। অখন্নবা মীথুং ওইখিবা ষ্টেট কলা একাদেমি এৱার্দি এল ব্রজমোহননা নুপীগী দ্রামা অমসুং শুমাং লীলাগী হেন্না ফবা নুপী দিরেক্টরশিং থোকহন্নীংই। নুপীশিংনা থোরকপদা ইমুং মনুং অমসুং মপুরোইবশিংনসু মতেং পাংশিনবীদুনা থৱায় হাপ্পীগদবনি হায়খি।

সোর্স: হুইয়েন লানপাউ