মেরা হৌ চোংবগী পাউজেল পীরক্লি
ইম্ফাল, অক্টোবর ২৫: মেরাগী থানিল নুমিত্তা পাঙথোকপা মেরা হৌ চোংবগী থৌরম লাকপদা মণিপুরগী চীফ মিনিস্টর অমসুং মণিপুর লেজিসলেটিভ এসেমব্লীগী স্পিকরনা মণিপুরগী মীয়ামদা য়াইফ পাউজেল পীরক্লি।
চীফ মিনিস্টর ৱাই খেমচান্দ সিংহগী পাউজেলদা, মেরা হৌ চোংবা, নাৎকী ওইবা কুম্মৈ অসি মণিপুরদা লৈরিবা মীয়ামগী মরক্তা অপুনবা, মচিন মনাও ওইবা, শান্তি অমসুং তংদু লৈতাবা অদু উৎলি। কুম্মৈ অসিনা লমদম অসিগী ইনাক খুল্লবা কলচরেল হেরিটেজ অমসুং মমাংদগী চৎনবা ট্রেদিসনশিং উৎনা খুন্দামিন্নরিবা কাংলুপশিংগী মরক্তা ইকাইখুম্নবা, মতেং পাংনবা অমসুং শান্তি ওইনা পুন্না হিংমিন্নবগী মরু ওইবা অদু অমুক হন্না চেৎশিনহল্লি হায়রি।
নুমিং অসিনা লাকপদা, ঐখোয়গী কলচরেল হেরিটেজ ঙাক শেনবা অমসুং কাংলুপশিংগী মরক্তা অমত্তা ওইবগী মরী অদু হেন্না কনশিন্নবা হোৎনরসি। মেরা হৌ চোংবা অসিনা য়ুমথোং খুদিংদা শান্তি, চাওখৎপা, হরাও তয়াম্বা পীনবিদুনা চাওখৎপা অমসুং তংদু লৈতবা পুরক্নবা পুন্না থবক তৌমিন্নবগী থৌনা হাপ্পসনু হায়রি।
মণিপুর লেজিসলেটিভ এসেমব্লীগী স্পিকর তিঐচ সত্যব্রত সিংহগী পাউজেলদা, পুৱারীগা শাগোন্নরিবা সনা কোনুংদা পাঙথোকপা কুম্মৈ অসিনা নাৎকী জগোই, ঈশৈ, কলচরেল পার্ফোরমেন্স অমসুং কম্যুনিটিগী কুম্মৈশিংগী খুৎথাংদা মরূপ মপাং ওইবগী মরী অদু হেন্না চেংশিনহন্নবগী খুদোংচাবা পীদুনা মণিপুরগী ইনাকখুল্লবা কলচরেল হেরিটেজ উৎথোকপা ফংহল্লি। কুম্মৈ অসিনা কাংলুপশিংগী মরক্তা ইকাইখুম্নবা, ট্রেদিসনশিং ঙাক শেনবা, শান্তি, ঈং-তপ্পা অমসুং অমত্তা ওইবগী ৱাখল্লোনশিং চেলহন্দুনা তুংগী মীরোলগীদমক লেপ্লসি হায়রি।
সোর্স - পোক্নফম
0 কমেন্ট:
কমেন্ট তৌবিয়ু