মণিপুরী সাহিত্য পরিষদ, ত্রিপুরাগী ফাউন্ডার মেম্বর রাজকুমার পঞ্চমজিৎ সিংহ -- আরকে তরুনজিৎ
ইং ১৯৫৭ কলিকাতা ইউনিভার্সিটিদগী বি.এ পাশ তৌরবা মতুংদা রাজকুমার পঞ্চমজিৎ অহানবদা বিশালগড় স্কুলদা মতম খরনি ওজা ওইনা থবক তৌরম্মী। পুরাতন আগরতলা বেসিক প্রাইভেট জুনিয়র স্কুল অমসুং বড়দোয়ালী হাই স্কুলদসু ওজা ওইরম্মী। স্কুলগী ওজা ওইনা থবক তৌনা তৌনা ত্রিপুরাদা নুংতিগী ফোঙবা বাংলা পাউচে 'জাগরণ' পত্রিকাগী ইডিটর জীতেন পালগী মতেং পাংবা ওইনা পত্রিকা অফিসতসু থবক তৌবা হৌখি। পাউচে অসিগী ইডিটোরিয়েল বোর্ড মেম্বর ওইরম্মী। মতম খরনি সাব ইডিটরসু ওইবিরম্মী। মতম অদুদগী ত্রিপুরাগী রাজনীতিদা মশক নাইরবা মীওইশিংগা শক খঙ মায়খঙনবা হৌরকখি।
আরকে তরুনজিৎ
ডায়মন্ড জুবিলিগী মতুং প্ল্যাটিনামগী খোঙচত্তা চেল্লিবা ত্রিপুরাদা খ্বাইদগী লিরবা সাহিত্যগী লুপ মণিপুরী সাহিত্য পরিষদগী ফাউন্ডার মেম্বরশিংগী মনুংদা হৌজিক হৌজিক হিংদুনা লৈরিবা পরিষদকী ফাউন্ডার মেম্বার অসি য়াম্বুং রাজকুমার পঞ্চমজিৎ সিংহ খক্তনি।
ইংকুমজা ১৯৬৩ ডিসেম্বর ২৫ দা লিংখৎখিবা পরিষদ অসিগী ফাউন্ডার মেম্বর ১২ গী মনুংদা মেম্বর অমা বাচস্পতিময়ুম নয়ন শর্মা মণিপুরগীনি। মহাক ত্রিপুরাদা হিন্দী প্রচারগী দমক লাকখিবনি। চহী কয়া ত্রিপুরাদা লৈরগা হিন্দী প্রচার তৌখি। ঐনা মহাকপু 'মাম্মা' হায়না কৌই, মতম শাংনা ঐখোয়দা লৈরম্মী। ইংকুমজা ২০১৩ দা পরিষদগী গোল্ডেন জুবিলি থৌরমদা শরুক য়ানবা আগরতলা লাক্নবা হোৎনজরম্মী। অদুবু লাইবকথিবা মহাক বার্তোন ফংখিদে, শরুক য়াবসু ঙমখিদে। চৎখিবা ইংকুমজা ২০১৯ জুলাই ৩০ দা মাম্মা নয়ন শর্মা কৃষ্ণখুয়া তানখি। মথং চহী ইংকুমজা ২০২০ গী জানুৱারী ২০ দা ইচে (ঐনা 'ছোড়দি' হায়না কৌই) পাঙনবম বিরাজ প্রভা দেবীসু তাইবঙপান থাদোক্তুতুনা ঈশ্বরগী খুয়াখাদা তানখ্রে। পরিষদ অসিদা নুপী অমখক্তা মেম্বর ওইরম্বী বিরাজপ্রভা দেবীদি গোল্ডেন জুবিলি থৌরম অদু য়াওবা ঙমখি। মহাক্লা মতম অদুগী মুখ্যমন্ত্রী মানিক সরকারগা পুন্না মৈরা চুখত্তুনা থৌরম হৌদোকপদা শরুক য়াখি। হৌজিক হৌজিক হিংদুনা লৈরিবা পরিষদ অসিগী ফাউন্ডার মেম্বর মশাগী চহী ৯২ শুখ্রবা য়াম্বুং রাজকুমার পঞ্চমজিৎ সিংহ নত্তনা ত্রিপুরাদা খ্বাইদগী লীরবা পরিষদকী ফাউন্ডার মেম্বর লোইনা লাইওইথ্রে।
মতম অদু পরিষদ অসিগী মরু ওইবা পান্দমদি ইমালোল চাওখৎহনবা, ইমালোল মণিপুরীনা ঙাংবা-শকপা অমদি ঙাংহনবা অসিনি। মণিপুরী সাহিত্য পরিষদ লিংখৎলমদ্রবদি ত্রিপুরাদা মণিপুরী লোল সাহিত্য চাওখৎপদা অতৈসু থিস্থরমগনি। রাজকুমার পঞ্চমজিৎ সিংহ ইং ১৯৩৩, জুন ১২ ধলেশ্বরদা পোকখি। শ্রীপঞ্চমী (সরস্বতী পূজা) নুমিত্তা পোকপনি হায়না মমাসিনা মহাক্কী মমিং 'পঞ্চমী' থোনখি মথংদা ময়াম্না 'পঞ্চমজিৎ' হায়না খঙনবা হৌখি। অপোকপগী মমিং রাজকুমার গোকুলজিৎ সিংহ, নিংথৌরোল মতমগী পুলিশ ডিপার্টমেন্টতা রাইটার অমা ওইনা থবক তৌরম্মী। অদুগা অপোকপীগী মিংনা তোনজম নিঙোল নিংথেম ওংবী নুমিৎ লৈমা দেবী কোই। তোনজম রসমন ঠাকুরগী মশু নুপীনি (লৈমহলগী মচা নুপী অহল)। য়ামুং পঞ্চমজিৎ মচিল মনাও ৭ (তরেৎ) নি। নিপা ২, য়াম্বুং পঞ্চমজিৎ সিংহনা য়াইমানি। নুপী ৫ (মঙা) নি। অঙাং ওইরিঙৈ য়ান্না নঙনা হৌরকখি। স্কুলদা লাইরিক তম্না তম্না ইমুং মনুংগী অৱাৎ-অপা কয়া মহাক্না মেন্দুনা লাকখি। ইং ১৯৫৭ কলিকাতা ইউনিভার্সিটিদগী বি.এ পাশ তৌরবা মতুংদা রাজকুমার পঞ্চমজিৎ অহানবদা বিশালগড় স্কুলদা মতম খরনি ওজা ওইনা থবক তৌরম্মী। পুরাতন আগরতলা বেসিক প্রাইভেট জুনিয়র স্কুল অমসুং বড়দোয়ালী হাই স্কুলদসু ওজা ওইরম্মী। স্কুলগী ওজা ওইনা থবক তৌনা তৌনা ত্রিপুরাদা নুংতিগী ফোঙবা বাংলা পাউচে 'জাগরণ' পত্রিকাগী ইডিটর জীতেন পালগী মতেং পাংবা ওইনা পত্রিকা অফিসতসু থবক তৌবা হৌখি। পাউচে অসিগী ইডিটোরিয়েল বোর্ড মেম্বর ওইরম্মী। মতম খরনি সাব ইডিটরসু ওইবিরম্মী। মতম অদুদগী ত্রিপুরাগী রাজনীতিদা মশক নাইরবা মীওইশিংগা শক খঙ মায়খঙনবা হৌরকখি। মহাক্কী পুন্সিদা খ্বাইদগী নক্লবা অমদি ভক্তি শ্রদ্ধাগা লোয়ননা তিন্নখিবা মীশক অদুদি স্নাখ্যা রাজকুমার কমলজিৎনি। মহাক্বা স্নাখ্যা কমলজিৎপু 'পাবুংতোন' হায়না কৌই। মহাক্কী পাউতাক মতুং ইন্দুনা মায় পাক্না থবক কয়াসু তৌখি। খুনাই অসিগী চাওখৎ থৌরম কয়া চত্থনবা হোৎনবদা পাবুংতোন কমলজিৎ সিংহবু মতম লৈবা খিবিক্তা মতেং পাংদুনা লাকখি। আর কে পঞ্চমজিৎ সনা 'জাগরণ' অফিসতা থবক তৌনা তৌনা ইং ১৯৫৮ দা ত্রিপুরা লৈঙাক্কী এপিও (এসিঃ পাব্লিসিটি অফিসার) ওইনা থবক্তা চংখি। ইং ১৯৭২ দা চীফ ওর্গানাইজর ওইনা ফম কাখি। ত্রিপুরাগী পাব্লিসিটি লোয়শঙদগী দিল্লী দা প্রজাতন্ত্র দিবসতা (২৬ জানুৱারী) মহাক্না শীন্দুনা উৎখিবা ট্যাবলুনা ফার্স্ট ওইবগী মনা লৌরকখি। মহাক প্রোগ্রাম অফিসার ওইনা ফম কাখি। মথংদা ডেপুটি ডিরেক্টর ফম কাদুনা থবক্তগী পোত্থাবগী মমাংদা মহাক্না মহাক্কী অঙম্বা থাক্তা হোৎনদুনা মৈতৈ মচা কয়া থবক ফংবদা মতেং পাংবিখি। ইং ১৯৯১ দা ডেপুটি ডিরেক্টর ওইনা থবক্তগী পোত্থাখি। থবক থৌরমদা মহাক্কী হৈ-শিংবা অমদি সিনসিয়ার ওইবা মরম্না লৈঙাক্না মহাকপু মখাতানা অতৈসু চহী অহুম প্রিন্সিপাল অফিসার ওইনা ইন্ডাস্ট্রি ডিপার্টমেন্টতা থবক তৌহল্লম্মী।
মশাগী চহী ৩০ শুরকপদা মহাক ইং ১৯৭১ গী মার্চ ১১ দা প্রোফেসর থোকচোম সোনামনি সিংহগী মনাও ইবুংঙো ডাঃ নীলমনি সিংহগী অহুমশুবী মচা নুপী থোকচোম নিংঙোল পদ্মাবতীগা পুন্সি লৈপুন্নখি। হৌজিক মহাক্কী মচা নিপা অনী লৈরে। মচা নিপা অহল রাজকুমার প্রসেনজিৎ (রাজা) ত্রিপুরা হাইকোর্টকী মশক নাইরবা সিনিয়র এডভোকেট ওইরি অদুগা মচা নিপা অতোম্বা সোমেন্দ্রজিৎ জার্মান মাল্টি নেশনেল কোম্পানী অমগী নর্থ ইষ্ট রিজনগী রিজনেল ম্যানেজার ওইরি।
ঐনা রাজকুমার পঞ্চমজিৎপু য়াম্বুং হায়রগা কৌই। মতম অদু ঐখোয়দা য়াম্বুং পঞ্চমজিৎ, কাকু ডাঃ ভূপেন লোয়ননা বনিক কাকু হায়না বেঙ্গলী বিজনেসমেন অমা ইতৎ তত্তনা লাকই। অফিসতগী ময়ুম হনবদা য়াম্বুংনা ঐখোয়দা চঙলগা ময়াম পুন্না সিঙ্গারা নত্রগা মুড়ি চামিন্নৈ। থম্মোয় শেংবা য়ান্না চমজবা হায়বসি ঐনা অদুঙৈ মতমদগী খংদুনা লাকখি। ধলেশ্বর কৈরৌই লৈকাইগী অঙাং নৱাশিংনা য়াম্বুংবু 'চকলেট দাদু' হায়রগা খংঙি। মরমদি অঙাংবু উরবদি মহাক্বা নুংশিনা চকলেট পীজৈ। নোংমতা নত্তে, নুংতিগী অসুম্না চকলেট পীজৈ হায়দুনা অঙাংশিংনা 'চকলেট দাদু' হায়রগা খংঙি। মহাক অঙাংতা নত্তে, জীব-জন্তুসু য়াম্না নুংশিনা তৌই। লম্বী লমহাংদা হুই হৌদোংশিং উরগা মনাক্তা কৌশিল্লি। মমৈ ফেৎ ফেৎ হায়দুনা হুইশিং চঙশিল্লি। মহাক্লা মপান্দবু থোক্লবদি মখোয়গী দমক পকেটতা বিস্কিট পুরগা থোকই হায়। য়াম্বুংগী ধলেশ্বর য়ুমদসু হুই কয়া লোইরম্মী। য়াম্বুংসি হৌজিক মচা নিপা অতোম্বগী গুৱাহাটি ফ্লাটতা লৈরি।
য়াম্বুং রাজকুমার পঞ্চমজিৎ হৌজিক মশাগী চহী ৯২ শুখ্রে। মনা খরা শোল্লে, অহল ওইরকপগী লায়নানা য়াহিপনা লৈরে। মপান থোকত্রে। মতম অমা বাংলা লোলতা ঙাংদুনা লাকখি। অদুবু ইমালোল ঙাংবা শুবোই শুদবোই অদুঙৈ মতমদুদা ইমালোল চাওখৎনবা হোৎনবনি হায়দুনা মখোয়গুম্বা নহারোল খরনা চোঙথোক্তুনা থোক্লমদ্রবদি ঙসিগী মণিপুরী সাহিত্য পরিষদকী শক্লোন অসি অসুম্না লৈরম্মোয়। ঙসিদি পরিষদ অসি হান্নদগী চাওখৎলে মশা লেপচবা শুম্বা মপুং ফাবা লুপ অমসু ওইরে। চহীগী মহৈরোইশিংবু মনা মথুম পীবা ঙমলে। লাইরিক কয়া পুথোকপা ঙমলে। চহী খুদিং পরিষদ অসিনা সাহিত্য সংস্কৃতিগী লমদা থৌদাং লৌবা মীওই কয়াবু মরাং কায়না মনা মথুম এৱার্ড শেলগী মনা পীদুনা ইকাইখুম্নবসু য়াওখ্রে। অদুবু পরিষদ অসি মরু হুনবদা থৌদাং চাওনা লৌবিরম্বা য়াম্বুং অসিনা হিংলিঙৈ মতম অসিদা মহাকপু মতিক চাবা ওনার তৌফম থোক্তবরা হায়বসি ঐগী ৱাহংনি।
কোর্টেসি - মরূপ
0 কমেন্ট:
কমেন্ট তৌবিয়ু