সাংবিধানিক অধিকার তানবা ঙম্ননবা ত্রিপুরাদা নুপীগী লুপ অমা শেমলে
আগরতলা, ডিসেম্বর ২০ : নিংথৌরেল হাক্তক্তগী খুন্দানা লৈরক্লবা হৌখিবা চহী য়াংখৈ মনুংসিদা ত্রিপুরাদা মশীং লিক্না চোইজাইননা তাবা মণিপুরী খুঙ্গং য়াংখৈরোম ত্রিপুরা ম্যাপতগী তপ্পা তপ্না মুৎখ্রে। শিক্ষাদা, চাকুরীদা, মীহুৎ খনবদা ত্রিপুরাদা মণিপুরীগীনি হায়বা অমত্তা লৈত্রে। ফীভম অসিদা ত্রিপুরাদা মণিপুরীশিং মখোয়গী সাংবিধানিক অধিকার নচিংবা দাবী তানবা ঙন্ননবা নুপীগী অনৌবা লুপ অমা শেমখ্রে।
নুপীলাল নুমিৎকা মরী লৈননা চৎখিবা ডিসেম্বর ১২, আগরতলা প্রেস ক্লাবতা পাঙথোকখিবা নুপীগী ওইবা অহানবা কনভেনশনদা 'ত্রিপুরা মণিপুরী উইমেন কাউন্সিল' হায়বা মীংখোন্দা মীওই ১৩ না শাবা সেন্ট্রাল কমিটি অমা শেমখি। সেন্ট্রাল কমিটিদা য়াওবা মীওইশিং - (১) প্রেসিডেন্ট - হৱাইবম মায়া সিংহ, (২) ভাইস প্রেসিডেন্ট - তখেল চংবম যোগনতি দত্ত, (৩) ভাইস প্রেসিডেন্ট খংজ্রাকপম সুদেষ্ণা সিংহ, (৪) জেনারেল সেক্রেটারী- য়াম্বেম সমাপিকা সিংহ, (৫) সেক্রেটারী- তখেল চংবম নিয়তি দত্ত, (৬) সেক্রেটারী - হৈগ্রুজম গৌরী সিংহ, (৭) ট্রেজারার-হাওবম হেনা সিংহ। অদুগা মেম্বরশিংদি-আরকে গৌরী সিংহ, নাওরেম রেশমী সিংহ, লৈশাংথেম প্রীতি কনা সিং, য়ুন্নাম সোমা সিংহ, ক্ষেত্রিময়ুম মাধবী অমসুং মোইখুবম মেঘা দত্ত অসিনি। অদুগা কমিটিদা এডভাইজর ওইনা সোসেল ৱার্কার য়াম্বেম প্রবীনবু খনখ্রে হায়রি।
লুপগী মরু ওইবা দাবী শিংগী মনুংদা সাংস্কৃতিক সামাজিক ঙাক্লা থম্বা ঙম্ননবা মণিপুরীশিংগী তোঙানবা অটোনোমাস ডেভেপমেন্ট কাউন্সিল শেম্বা, শিক্ষা চাকুরী অমদি মীহুৎ খনবদা মীশিংগী চাংদা রিজার্ভেশন লৈহনবা অমদি সংবিধানগী ৩৪৭ ধারা মতুং ইন্না ত্রিপুরাদা মণিপুরী লোলবু এসোসিয়েট ল্যাঙ্গুয়েজ ওইনা শক্তাকপা অমদি ৩৫০ ধারা মতুং ইন্না ইমালোল মণিপুরীনা মহৈ-মশিং তম্বগী খুদোংচাবা পীবা অসিনি।
সোর্স - মরূপ
0 কমেন্ট:
কমেন্ট তৌবিয়ু