• 290
• ২৫শে ডিসেম্বর ২০২৫ ইং
• Share on:

আসামদা লিংখৎখিবা মণিপুরী সাহিত্য পরিষদ -- খাইদেম কান্তা

মতমগী য়াওল তুং ইন্না মণিপুরী সাহিত্য পরিষদ, ইম্ফালগী মশা হায়না খঙনরম্বা অদুবু বরাক ভ্যালিগী ওইনা ইং ১৯৬৯ লালাদা রাজকুমার সুরেন্দ্রজিৎনা মীফম মপু ওইদুনা ফমখিবা মীফম অদুনা মণিপুরী সাহিত্য পরিষদ, ইম্ফালগী কাছাড় মশা হায়না লৈরম্বা অদুবু 'আসাম মণিপুরী সাহিত্য পরিষদ' হায়না তোঙানবা অনৌবা অটোনোমাস বোডি অমা ওইনা তোঙান্না শেমলে হায়না ৱারেপ্নখি।

আসামদা মণিপুরী সাহিত্যগী লুপ অমা ওইনা অহানবা মরু হুনখিবসি চাওরাক্না ঙসিদগী চহী ৬৪ গী মমাং ইং ১৯৬১ দা মণিপুরী সাহিত্য পরিষদ, ইম্ফালগী মরু মকোক ওইবা অহল-লমন ওজাশিংনা লম্বী-লমদাংগী খুদোংচাদবা কয়া মায়োক্নরদুনা লেঙবিরক্লগা আসামগী তোঙান তোঙানবা হায়বদি হোজাই অমদি লক্ষিপুর দা মণিপুরী সাহিত্য পরিষদ, ইম্ফালগী হোজাই মশা, কাছাড় মশা হায়দুনা শেম্বীরমখি।
হায়রিবা খোঙচৎ অদুদা মণিপুরদগী লেঙবীরকখিবা শক্নাইরবা ওজাশিংদি গুরুময়ুম নীলবীর শাস্ত্রী, লাইরেল্লাকপম ইবুংঙোহল, চিংঙাখম পীশক, মোইরাংথেম চন্দ্রসিং (প্রেসিডেন্ট), এম নন্দলাল শর্মা (সেক্রেটারী), মখোয় মঙা অসিনি।

ইংকুমজা ১৯৬১ গী অক্টোবর ১৭, হোজাইদা ফমখিবা মীয়াম্না মণিপুরী সাহিত্য পরিষদ, ইম্ফালগী হোজাই মশা হায়না শেমদুনা মশা অসিগী প্রেসিডেন্ট লৈখিদ্রবা ওজা খুরাইজম তেম্বা অমদি লৈখিদ্রবা ওজা নিত্যাইশর্মাবু সেক্রেটারী খন্দুনা লিংখৎখি। মথং চহী অদুমক্তদা অক্টোবর ২০, কাছাড়গী লক্ষীপুর খুমন গী মান্ডোপ অচৌবদা ফমখিবা মীয়াম্না মণিপুরী সাহিত্য পরিষদ, ইম্ফালগী কাছাড় মশা শেমদুনা লৈখিদ্রবা ওজা ময়াংলম্বম নীলধ্বজ সিংহবু মশা অসিগী প্রেসিডেন্ট অমদি লৈখিদ্রবা ওজা নোঙথোম্বম কুঞ্জমোহনবু সেক্রেটারী ওইনা খন্দুনা থবক থৌরম মখা চৎথরকখি।

মতমগী য়াওল তুং ইন্না মণিপুরী সাহিত্য পরিষদ, ইম্ফালগী মশা হায়না খঙনরম্বা অদুবু বরাক ভ্যালিগী ওইনা ইং ১৯৬৯ লালাদা রাজকুমার সুরেন্দ্রজিৎনা মীফম মপু ওইদুনা ফমখিবা মীফম অদুনা মণিপুরী সাহিত্য পরিষদ, ইম্ফালগী কাছাড় মশা হায়না লৈরম্বা অদুবু 'আসাম মণিপুরী সাহিত্য পরিষদ' হায়না তোঙানবা অনৌবা অটোনোমাস বোডি অমা ওইনা তোঙান্না শেমলে হায়না ৱারেপ্নখি।

হোজাইগী নন্দপুর এম.ভিদা ইং ১৯৭২ গী জানুৱারীদা ফমখিবা মণিপুরী সাহিত্য পরিষদ, ইম্ফালগী হোজাই মশাগী মীফমনা লুপ অসি মণিপুরদগী হোজাই তোঙাল্লে, মমিংনা আসাম মণিপুরী সাহিত্য পরিষদ, হোজাই হায়না থোল্লদুনা অটোনোমাস বোডি অমা ওইনা শেমলে হায়না লাওথোকখি। মীফম অদুনা শচী শর্মাবু প্রেসিডেন্ট, লাইশ্রম গোপালবু সেক্রেটারী ওইনা খনখি।

মথং অমুক ইং ১৯৮২ অক্টোবর ৩০, হোজাইগী গীতা মন্দিরদা ফমখিবা মীফমনা কাছাড় অমদি হোজাইগী লুপ অনীসে পুনশিল্লদুনা "আসাম মণিপুরী সাহিত্য পরিষদ” হায়রম্বদগী "মণিপুরী সাহিত্য পরিষদ, আসাম" হায়না মিংথোন্দুনা হেড অফিস শিলচরদা ওইবা হায়না লেপ্নখি। নুমিৎ অসিদা হোজাইগী ওইবা অনৌবা বোডি অমা শেমখি অমসুং লাইশোম গুলাপ অমদি নোঙথোম্বম ইন্দ্রকুমারনা মথংশিৎনা প্রেসিডেন্ট অমসুং সেক্রেটারীগী ফম লাংখি। অদুবু হায়রিবা মশা অনী অসি শেমখিবগী মপোক নুমিৎ মান্নদবনা মরম ওইদুনা 'ফাউন্ডেশন ডে'গী থৌরম অদুদি তোঙান তোঙাননা পাঙথোক্নদুনা অদুম্মক লাকখি।

তৌইগুম্বসুং হায়রিবা লুপ অনীসিগী মপোক নুমিৎ, হায়বদি 'ফাউন্ডেশন ডে' গী চয়েৎনবা লৈবনা তংদাবা অমা লেপ্পা ঙমদনা চহী ৫৪ চুপ্পা য়েৎনদুনা লাকখিবদু হৌখিবা ইং ২০১৫, পরিষদ অসিগী গুৱাহাটি মীফমদা মীয়ান্না য়াম্না কুপ্না খন্ন-নৈনরবা মতুং য়ান্নবা অমা পুরক্তুনা লুপ অনীসিগী মপোক নুমিৎ অসি অক্টোবরগী তাং ১৭ ইং ১৯৬১ অসিনা চুমলে হায়না ৱারেপনখি।

মরম অসিনা, হৌজিক লাক্লিবা রাফমদি মণিপুরী সাহিত্য পরিষদ, আসামগী 'অহানবা প্রেসিডেন্ট' কনানা ওইফম থোকই হায়বসিনি। ৱাফম অসিগী মতাংদা পরিষদকী ইং ২০১৫ গী গুৱাহাটি মীফমনা খন্নবিহৌদ্রবরা? অসিনি। অদুগা পরিষদ অসিনা হন্দক্তা পুথোকপীখিবা ইং ২০২৬ গী ওইবা ক্যালেন্ডারদা য়াওবা এপ্রিল ২০২৬ঃ শজিবু-কালেনগী লামায়দা লৈখিদ্রবা ওজা ময়াংলম্বম নীলধ্বজ সিংহগী মিং পনবীরিবা অসিনা করিগুম্বা অচুম্বনি হায়না লৌবিবা তারবদি মণিপুরী সাহিত্য পরিষদ, আসামগী 'ফাউন্ডেশন ডে'অসি অক্টোবর তাং ২০, ইং ১৯৬১ ওইগদৌরিবরা হায়বা ৱাফম অসি আসামগী মণিপুরী মীয়ামগী মফমদা খন্নবিনবা থাঙ্গৎচরি।।

কোর্টেসি - মরূপ