• 776
• ৪ঠা মে ২০২২ ইং
• Share on:

চহী ২ হেন্না হরাওরুদ্রবা চীংঙু ইবুধৌ থাংজিংগী লাই হরাওবগী থৌরম হৌখ্রে

ইম্ফাল, মে ০২: মোইরাং কংলৈরোলগী য়াম্না মরুওইবা লাইগী থৌরম অমা ওইরিবা চীংঙু ইবুধৌ থাংজিং হরাওবগী থৌরম কোভিদ-১৯ পেন্দামিক্না মরম ওইদুনা হৌখিবা চহী অনীরোম মমিংতগী ওইনা লাইগী থৌরম পাঙথোক্লুরবা মতুং কুমশি চহীগী ওইনা ঙরাং কালেনগী নোংমা পানবা নুমীৎতগী মোইরাং চেঙৈ লৈকায়দগী লাই ইতাবগী থৌরমগা লোয়ননা হরাওবা হৌখ্রে হায়রি।

ইবুধৌ থাংজিং হরাওবগী থৌরম অসি ঙারাংদগী হৌরগা নুমীৎ ৩২ চুপ্না হরাওগনি। লাই হরাওবা থৌরমগী মনুং চন্না মরুওইবা থৌরমশিংগী মনুংদা মে ১৭ তা মতম অমদা ইবুধৌ থাংজিংবু মণিপুরগী নিংথৌনা লৌশিন্দুনা হরাওবগী থৌরম পাঙথোক্নবা হোৎনবদা মোইরাংগী মীয়াম্না থৌওং অদু য়ারোই হায়দুনা ঈহৌ হৌবদা অচৌবা থৌদাং লৌদুনা শরুক য়াখিবা লৈখিদ্রবা মীওইশিংদা ঈকায়খুম্নবা উৎপগী থৌরম অমা কুমশি চহীগী ওইনসু থাংজিং রিষ্টোরেসন দেগী থৌরম পাঙথোক্কনি। মসিগা ঈরোয়ননা মে থা মনুং অসিদা ইবুধৌ থাংজিং হরাওবগী থৌরমগী মনুং চন্না তোঙান তোঙানবা জগোয় অমদি তোঙান তোঙানবা কালচারেল প্রোগ্রামশিংসু লেপ্পা লৈতনা পাঙথোক্কনি। ইবুধৌ থাংজিং লাই হরাওবগী থৌরম অসিদা মণিপুরগী তোঙান তোঙানবা মফমশিংদগী লাকপা আর্টিষ্টশিংনসু মখল মখা কয়াগী থৌরমশিং লান্থোক্কনি।

লোয়ননা কুমশি চহীগী ওইন মে ২৩না লাইলম থোকপা, মে ৩০দনা মুক্না লমজেল পাঙথোক্লগা মথং থা জুন ১দনা লাইরোইগী থৌরম পাঙথোক্লগনি হায়না ইবুধৌ থাংজিং সেবা মন্দলগী মায়কৈদগী ফংবা পাউ অমনা হায়রি। নাকল অমরোমদা, নুমীৎ ৩২ নি চুপ্না ইবুধৌ থাংজিং হরাওবগী থৌরম পাঙথোকপা অসিদা মণিপুরগী তোঙান তোঙানবা মফমশিংদগী মোইরাংদা য়েংবা লাকপীগদৌরিবা মীওইশিংনা তোঙান তোঙানবা মখলগী ময়াই কাবা চীঞ্জাক্কী পোৎলমশিং অমত্তা শীজিন্নবীদনবা মোইরাংগী সিভিল সোসাইটি ওর্গানাইজেসন (সি এস ও)শিংগী মায়কৈদগী মণিপুরগী মীয়ামদা আপীল তৌরক্লি।

সোর্স: হুইয়েন লানপাউ