‘মরূপ’গী মপোক নুমিত্তা অপুনবগী শক্তম
আগরতলা, মে ১৭ : অৱাং নোংপোক্তা খ্বাইদগী লীরবা মণিপুরী চয়োলগী পাউচে ‘মরূপ’ কী ৫৪শুবা মপোক কুমওন থৌরমদা ত্রিপুরাদ মশক খঙলবা তোঙান তোঙানবা লুপকী থৌবুরেনশিংগী অপুনবা শক্তম অমা উবা ফংখ্রে। চৎখিবা মে ৯, নিংথৌকাবা নুমিৎ পাউচে অসিগী শঙ্গায় মঠচৌমুহনীদা চীংলেম্না পাঙথোকখিবা থৌরম অদুদা মমাংঙৈ অমুক ফাওবা থোকখিদ্রবা ত্রিপুরাগী তোঙান তোঙানবা লুপশিং পুন্না শরুক য়ামিন্নদুনা অপুনবা শক্তম অমগী পাউজেল পীখি।
থৌরম অদুদা ত্রিপুরাগী তোঙান তোঙানবা লুপশিং পুন্না শরুক য়ামিন্নবগী অপুনবা শক্তম অমা
মসিনা তুংদা প্লাটফোর্ম অমা শাগৎপদা অচৌবা মতেং ওইগনি হায়না ফোঙদোক্নখি। মরূপকী ইডিটর আরকে কল্যানজিৎ সিংহনা থৌরম মপু ওইরগা মণিপুরী সাহিত্য পরিষদগী প্রেসিডেন্ট এন দিলীপ কুমার, লময়ানবা সংস্থাগী চীফ এডভাইজর ৱাংখেম বীরমঙ্গল, সাহিত্য একাডেমি, নিউ দিল্লী, মণিপুরী বোর্ডকী মেম্বার এল. বীরমঙ্গল, মণিপুরী লিটরেরী এন্ড কালচারেল ফোরামগী সেক্রেটারী খোইস্নাম মঙ্গল, পুথিবা ওয়েলফেয়ার এন্ড কালচারেল সোসাইটিগী সেক্রেটারী সিনাম দীপক কুমার সিংহ অমসুং মণিপুরী কাউন্সিল ত্রিপুরাগী সেক্রেটারী কে ধীরেননা চিংবা মশক নাইরবা মীওইশিংনা গেষ্ট অব ওনার ওইনা শরুক য়াখি।
কবি রবীন্দ্রনাথ ঠাকুরগী চহী ১০৮ শুবা মপোক কুমওন ইং ১৯৬৯ দা মরূপ পাউচে হৌদোকপীরম্বা স্নাখ্যা কমলজিৎ সিং অমসুং লোইনবী ইমাসিজা অলকা সিংহগী ফটো শক্তমদা হৈ-লৈ কৎতুনা ইকাইখুম্নদুনা থৌরম অদু হৌদোকখি। পাউচেগী জয়েন্ট ইডিটর আরকে তরুনজিৎনা ওক্না ৱারোল পীখি। লমদমসিদা মণিপুরী মশীং খরতং লৈজরবসু তোঙান তোঙানবা মণিপুরী লুপশিং মাইকৈদগী থৌবুরেনশিংনা মরূপকী মপোক নুমিৎ থৌরমদা পুন্না শরুক য়াবগীদমক পাউচে অসিগী মাইকৈদগী থম্মোয় শেংনা থাগৎপা ফোঙদোকখি। অসুম্না অতৈ থৌরমদসু পুন্না শরুক য়ামিন্নদুনা লীংজেল অমত্তদা অপুনবগী শক্তম উৎপদা তুংদসু থৌদাং লৌগনি হায়না থাজবা থমখি। থৌরমদু লময়ানবা সংস্থাগী সেক্রেটারী ক্ষেত্রিময়ুম মাধবী সিংহানা কন্ডাক্ট তৌখিবনি।
থৌরম অসিগা মরী লৈননা অনীশুবা সেসন্দা শক্নাইরবা কবি খোইস্নাম মঙ্গলনা মোডারেটর ওইরগা মণিপুরী শৈরেং শৈদিন্নবগী থৌরম অমসু পাঙথোকখি। মশা মশানা ইবা শৈরেং থিবদা এন নিরঞ্জন, ৱাই চন্দ্রকীর্তি, এন দিলীপ কুমার, ডব্লিউ বীরমঙ্গল, কে অতুল, সনসম ওংবী উমা, সিজা মলিনা, গুরুময়ুম বিপ্লব শর্মা, কেএইচ মাধবী, মীনা দেবী অমসুং অরোইবদা খোইস্নাম মঙ্গলসু শৈরেং পাথোকপদা য়াওখি। অরোইবদা কালচারেল প্রোগ্রাম অমদা আর্টিষ্ট সঞ্জনা সিংহ অমসুং সুরজিৎ দেববর্মা শরুক য়াখি।
সোর্স : মরূপ
0 কমেন্ট:
কমেন্ট তৌবিয়ু