• 817
• ১৭ই মে ২০২২ ইং
• Share on:

বাংলাদেশতা শোর্ত স্তোরি সোসাইতিগী থৌরম পাঙথোক্কনি

ইম্ফাল, মে ১৬ : চহী খুদিংগী মফম হোং হোংদুনা চত্থরকপা শোর্ত স্তোরি সোসাইতি ইন্দিয়াগী মখল মথেলগী থৌরম চহী অসিগী ওইনা বাংলাদেশতা পাঙথোক্লগনি। সোসাইতি অসিগী অনৌবা একজিক্যুতিব কমিতিগী অহানবা মীফম অমা ঙরাং খুমন লম্পাক্তা লৈবা য়ুথ হোস্তেলগী কনফরেন্স হোলদা পাঙথোকখিবা মতমদা বাংলাদেশতা সোসাইতিগী থৌরম পাঙথোক্নবগী মতাঙদা কূপ্না খন্ন-নৈনখি।

মালেম মণিপুরী ৱারীমচাবু হেন্না পাক শন্না খঙহন্নবা হোৎনবগা লোয়ননা অৱাংবা থাক্তা পুখৎনবা অচৌবা থৌদাং লৌরিবা সোসাইতি অসিতা তোঙান তোঙানবা মীফম কয়া অৱাং নোংপোক্কী স্তেতশিংদা মথং মথং পাঙথোক্তুনা লাকপদগী ঙসিদি হেন্না খুমাঙ চাউশিনবা ঙম্লক্লে হায়নসু সোসাইতি অসিগী সেক্রেতরি শরত থোকচোমনা ফোঙদোকখি। মসিনা ইনোৎ অমসু পীবা ঙম্লে হায়খি।

ইন্দিয়াগী ৱাংমদা অহানবা ওইনা বাংলাদেশতা পাঙথোক্কদৌরিবা থৌরম অসিবু হেন্না মায় পাকহন্নবা ঙরাংগী মীফম অদুদা ৱারেপ কয়াসু লৌখি। অৱাং নোংপোক ইন্দিয়াদা লৈরিবা স্তেতশিংগী মরক্তগী অচৌবা দেলিগেসন অমা চত্তুনা মণিপুরী ৱারীমচাগী মশক অসি উৎলুবনা হেন্না মপূং ওইবা থৌরম ওইগদৌরি।

মণিপুরী লোলগী ৱারীমচা ইবশিংনা মশা মশাগী ৱারীমচা কয়া পাথোকপগা লোয়ননা নৈনা মীফমসু য়াওগদৌরি । ৱারীমচাগী খোমজিনবা লাইরিক অমসু বীমাবতি থিয়াম ওংবীনা এদিতর ওইরগা থৌরম অসিদা ফোঙদোক্কনি। লাইরিক ফোঙবা, অইবশিংগা উনবা, ৱারী-ৱাতাই, সিম্পোজিয়াম্নচিংবা মখল কয়াগী থৌরম্না মপুং ওইবা মীফম অসি চহী অসিগী দিসেম্বর লোইরকপদা পাঙথোক্নবসু লেপ্নখ্রে।

সোসাইতি অসিগী প্রসিদেন্ত ওইরিবা আসামগী হোজাইদগী লাক্তুনা মীফম অসিদা শরুক য়াখিবা লাইশোম গুলাপনা হায়খি, অহানবা ওইনা ইন্দিয়াগী ৱাংমদা পাঙথোকপা হায়বসি ঐখোয়গী কুইনা মঙজরক্লবা মঙলান অমনি। ঐখোয়গী মঙলান অসি মীয়াম্না মতেঙ পাংবীরক্তুনা মঙফাওনহনগনি হায়বগী থাজবসু লৈ। হৌজিক্তি ঐখোয় মফম অমত্তদা তুংশিন্দুনা লৈবগী মতমদু নত্ত্রে। অদুগা ঐখোয়গী থাক ৱাংলবা ৱারীমচা অসি শন্দোকপা মতম ওইরে। সাহিত্যগী ওইবা থৌরম অসিখক নত্তনা বাংলাদেশতা লৈরিবা মণিপুরী ইচিন-ইনাওশিংগসু হেন্না নকশিন্নবা ঙম্লগনি খল্লি।

সোস – পোক্নফম