• 841
• ২০শে মে ২০২২ ইং
• Share on:

আগরতলাদা পুঙ চোলোম কুম্মৈ পাঙথোকখ্রে

আগরতলা,মে ১৬ : ত্রিপুরাদা মণিপুরী পুঙ ঈশৈ চাওখৎহন্নবা অমসুং হীংহন্না থম্বগী পান্দমদা ত্রিপুরাগী খোওয়াই ডিস্ট্রিক্ট মখাদা বাংলাদেশ বর্ডার তাইননা লৈবা মৈতৈ খুল গৌরনগরদা নোংমগী ওইবা ত্রিপুরা পুঙ চোলোম ফেষ্টিভেল হায়বা মৈতৈ নাৎকী কুম্মৈ অমা মণিপুরী লিতরেরী এন্ড কলচরেল ফোরাম, ত্রিপুরানা শীন্দুনা ঙরাং পাঙথোকখ্রে হায়দুনা ফোরামগী সেক্রেটারী খোইস্নাম মংগলনা থারকপা চেরোল অমদা খংহনলকখি। সঙ্গীত নাটক একাডেমী, ন্যু দিল্লিগী মতেঙ লৌরগা পাঙথোকপা পুঙ চোলোমগী কুম্মৈ অদু খোৱাইগী সেনিয়র ইনফোরমেশন এন্ড কালচরেল ওফিসর দুলাল দেববর্মা না চিফ গেষ্ট ওইনা শরুক য়াদুনা খোইরু থাউমৈ চুখৎতুনা হৌদোকখি অদুগা ফোরামগী প্রেসিডেন্ট নিঙোম্বম বীরা সিংহনা থৌরম মপু ওইখি অমসুং মরূপ পাউচেগী জয়েন্ট এডিটর আরকে. তরুনজিৎ সিংহ, কালচারেল এক্টিবিষ্ট কবি ৱাংখেম বীরমঙ্গল, সোস্যাল এক্টিবিষ্ট কোন্সম অতুল না ঈকায়খুম্নবা মীথুং ওইনা ফম্বাক্তা ফমখি হায়রি।

ফোরামগী সেক্রেটারী খোইস্নাম মংগলনা তরাম্না ওকপা ৱারোল পীরদুনা হায়খি, “গ্লোবেলাইজেসন খায়াত্তা তাদুনা মমালোন মশাগী নাৎ কলা সংস্কৃতি মীরাইবা মালেমদা মশীং লীকপা জাতি কয়া মুৎখ্রে। ত্রিপুরাদা মীরোল ঙাংবশিংগী মরক্তা লৈরিবা মৈতৈগী মরাইবক্তা মদু থোক্লোই কনানা খঙঙি। লাক্লিবা মতমগী অঙাংশিংনা লমদমসিদা মৈতৈ ওইনা হীংজবা ঙমজহৌনবা মতমগী মীরোল না পুঙ-ঈশৈ নাৎকী চৎনবী য়োকখৎতুনা থম্বীরম্বা অমা চংঙি হায়খি।” খূন্নাইদা কলা-সংস্কৃতি চাওখৎহন্নবা হোৎনবদা থৌদাং চাওনা লৌবগীতমক শক্নাইরবা লাইশ্রাম প্রিয়ানাথ, এন মদন, নোংশাতাবম বিদ্যাধর, নোংগ্রাকপম পঞ্চবাবু অমসুং এন রবীন্দ্রবু ফোরামনা শক্তাক চে অমসুং ফি খুদোল তমদুনা ওকখিসু হায়রি।

চোলোমগী কুম্মৈ অসিদা ত্রিপুরাগী খোওয়াই জেলা, নোংচুপ ত্রিপুরা জিলা অমসুং সিপাহীজলা জিলাদগী নহা পুঙ য়ৈবা কলাকার ১৪না শরুক য়াদুনা পুঙ চোলোমগী কুম্মৈ উৎখি। ফোরামনা সাহিত্য অমসুং কলা-সংস্কৃতি হীংহন্নবা থম্নবা হোৎনবদা খুন্নাইদা লৌরিবা থৌদাংবু থাগৎতুনা মরূপকী জোইন্ট এডিটর আরকে. তরুনজিৎ, কবি ৱাংখেম বীরমঙ্গল অমসুং এন রবীন্দ্র না ৱা ঙাংখি। থৌরমদা মণিপুরী খুন্নাই ভাবোক মশীং য়াম্না তিনখি হায়না ফোংদোরকখি।