সিলেট পঞ্চায়েতকী পুরেন শ্রী রামকৃষ্ণ শর্ম্মা লৈখিদবদা অৱাবা ফোংদোক্নরক্লি
সিলেট, মে ১৯ : বহর মণিপুরীপাড়া (দক্ষিণকাছ), খাদিম নীপবন দা লৈবা শ্রী শ্রী রাধাকৃষ্ণ মান্ডবকী সেবা পুবিরিবা অমসুং সিলেট লৈপাক পঞ্চায়েতকী পুরেনগী ফম পুবিরিবা শ্রী রামকৃষ্ণ শর্ম্মা অহল লায়নান লৈপাকপোকপা নুমিৎ (১৭ মে) অয়ুক নোঙালমদায় ৪:১০ মতমদা মশাগী শঙ্গায়দা অরোইবা য়াহিপ তানখি। লৈখিদবা মতমদা মহাক্কী চহী ৯৮ রোম ওইখি লোয়ননা মহাক্কী লোয়নবী শ্রমতি মলয়া শর্ম্মা, অমসুং মচানুপা মরি, নুপি অমা য়াওনা মশুশিং লোয়ননা মহাক্কী মশিং য়াম্লবা পৌরা কয়া থম্লমই।
লাংনিং লম্বিগী চৎনবী পত্থাপকি মতুং ইন্না তিনবিরিবা ময়াম্না হরিনাম সংকীর্ত্তন তৌরদুনা দেবপুর বহর মৌজাদা লৈবা পোলোইফমদা মহাক্কী অরোইবা পোলোইবা থৌরম পাঙথোকখি।
মহাক্না লৈখিদ্রবদা সিলেট সিটি কর্পোরেশনগী মেয়র আরিফুল হক চৌধুরী, সিলেট ডিষ্ট্রিক্ট আওয়ামীলীগকী প্রেসিডেন্ট (ইনচার্জ) শফিকুর রহমান চৌধুরী, দৈনিক যুগান্তরগী সিলেট ব্যুরো ইনচার্জ সংগ্রাম সিংহ, লোয়ননা বাংলাদেশ মণিপুরী সাহিত্য সংসদকী প্রেসিডেন্ট অইবা এ. কে. শেরাম, জেনারেল সেক্রেটারী নামব্রম শংকর, মণিপুরী যুব সমিতিগী প্রেসিডেন্ট ফলেম ধীরেন সিংহ অমসুং সেক্রেটারী এম. মহেন সিংহ, সেক্রেটারী ইনচার্জ ওয়াই লাড়ু, বাংলাদেশ মণিপুরী যুব কল্যাণ সংস্থাগী প্রেসিডেন্ট ফ. নরেন সিংহ, সিলেট মণিপুরী কাং ফেডারেশনগী প্রেসিডেন্ট ওয়াই নৃপেন্দ্র সিংহ, সেক্রেটারী এস. সজল সিংহ লোয়ননা অতৈ অতৈ লুপ কয়ানসু অৱাবা ফোংদোকনরকখি।
লৈখিদবা পুরেন শ্রী রামকৃষ্ণ শর্ম্মাগী থৱাই মিরেলনা মপুগী নাক্তা ইংনা চিক্না লৈরুবা ওইসনু হায়না নিজখীবগা লোয়ননা ইমুঙ মনুঙগী অৱাবদসু শরূক য়াজরি হায়না ময়াম্না ফোঙদোকপিরকখি।
0 কমেন্ট:
কমেন্ট তৌবিয়ু