শক্নাইরবা অহুমদা গুরু তরুনকুমার সম্মান-২০২৩ পীদুনা ইকায় খুম্নবা ঊৎখ্রে
ইম্ফাল, দিসেম্বর ২২ : গুরু তরুনকুমার ফাউন্দেসন, ইম্ফালনা চহী ৩/৩ কান্নরগা পীবা গুরু তরুনকুমার সম্মান-২০২৩ গী ৭ শুবা এদিসন ওইনা ঙসি লমদমসিগী কলাগী লমদা শক্নাইরবা মীওই ৩দা পীদুনা ইকায়খুম্নবা ঊৎখ্রে।
ঙসি ৭ লক শুবা ওইনা গুরু তরুনকুমার সম্মান-২০২৩ লান্থোক্তুনা ইকায় খুম্নবা ঊৎখ্রবা শক্নাইরবশিং অদুদি, উরিপোক লাইখুরেম্বীদগী শক্নায়রবা দান্স কোরিওগ্রাফার থোকচোম চাওতোম্বী সিংহ, শক্নায়রবী নট সংঙ্কীর্ত্তন শৈশকপী (সুত্রধারী) লাইপুবম বিনো দেবী অমসুং খ্বাই নাগামপাল শীংজুবুং লৈরক্তগী শক্নায়রবী মণিপুরী জগোয়গী গুরু দাঃ ইলাম ইন্দিরা দেবী, পদ্মশ্রীনি। এৱার্দ অসিদা শেল, সোল অমদি সাইতেসন য়াওরি।
উরিপোক কাংচুপ রোদ, ইম্ফালদা লৈবা দ শ্রাইন প্লে হাউসতা পাঙথোকখিবা থৌরম অদুদা লমদমসিগী শক্নায়রবা ফিল্ম মেক্কার অরিবম শ্যাম শর্ম্মানা চীফ গেসত অমসুং একাদেমী এৱার্দি প্রোঃ হিজম তোম্বীনা প্রেসিদেন্ত ওইনা শরুক য়াখি।
থৌরম অদুদা চীফ গেস্তকী ৱারোল পীরদুনা অরিবম শ্যামনা হায়, লমদম অসিগী য়াম্না লেমজনীংঙাই ওইরবা ৭ শুবা গুরু তরুনকুমার সম্মান-২০২৩ লান্থোক্তুনা ইকায় খুম্নবা উৎলিবা শক্নায়রবা অমদি শক্নায়রবীশিং অসি মশা-মশাগী কলা অদুদা য়াম্না মতীং লৈবা অমদি কৎথোকপনা মশরুক ওইবা গুরু ঙাক্তনি। মখোয়না লমদম অসিগী কলা অসিবু মালেমদা মশক খঙনবা তৌখিবা মমল য়াম্লবা দান কয়া অসি ঐখোয়না কাওফম থোক্তে। মখোয়গুম্বা লমদম অসিদা তোঙান-তোঙানবা লমশিংদা শক্নায়রবা মীওই কয়া অমসু লৈরি। মখোয়বুসু ঐখোয়না কাওফম থোক্তে।
লমদম অসিগী কলাগীদমক থম্মোয় শেংনা থবক তৌরিবশিং অসিবু ইকায় খুম্নবা মতমদা কলা অদু অমদি লমদম অসি মালেমদা হেন্না মশক তাকপা ঙমগনি হায়না ফোঙদোকখিবগা লোয়ননা শক্নায়রবা গুরুশিং অসিনা লমদম অসিগীদমক তৌরিবা কয়া অমসুং মহাক্কা হকথেংনরকখিবা কয়াগী মতাঙদা মরীক চুম্বা ৱাফম কয়াসু ফোঙদোকখি।
পনবা য়াবদি, গুরু তরুনকুমার সম্মান অসি ইং ২০০৬ তগী হৌরগা চহী ৩/৩ কান্নরগা লমদমসিগী কলাগী লমদা থোইদোক্না মশক মঙাল থোক্না থবক তৌরম্বা গুরুশিংদা পীবা লেমজনীংঙাই ওইরবা মনানি। চহীসিগী ওইনা তোঙান-তোঙানবা কলাগী লম হায়বদি দান্স কোরিওগ্রাফি, নট সঙ্কির্ত্তন অমসুং জগোয়গী লমদা মশক থোক্না থবক তৌরক্লবা গুরু অহুমদা মনাসি লান্থোক্লি।
সোর্স: পোক্নফম
0 কমেন্ট:
কমেন্ট তৌবিয়ু