মপানগী অইবশিংনা পীরকপা মতেঙ রিলিফ কেম্পশিংদা শিন্নখ্রে
ইম্ফাল, দিসেম্বর ২২ : রাইটার্স ওব মণিপুরনা হৌখিবা মে ৭ তগী হৌরগা চঙলকপা অইবশিংগী তেঙবাং খোঙচৎপু শৌগৎলদুনা দিল্লীদা লৈবা অইবী থাংজম মীৎস্না চনুনা হিন্দী অইবা অগনি শেখর অমসুং প্রমোদ ঝা, দিরেক্তর, দিদি রানচিগী মতেঙগা লোয়ননা ইন্দিয়াগী মপানগী অইবশিং য়াওনা মণিপুর মপানগী অইবা খরদগী দোনেট তৌরকপা লুপা লীশিং ৫২ নিংথমথাগী শীজিন্ননবা ফি রিলিফ কেম্পকী ইনমেতশিংদা মতেঙ পাংনবা রাইটার্স ওব মণিপুরদা শিন্নরক্লে হায়রি।
শ্রী লঙ্কাগী অইবা অয়াথুরাই সন্থন, অরুনাচলগী অইবী মমাং দাই, কেরলাগী অইবা রাজিব ভেতিয়াতিল, মৈথিলি অইবা নিতা ঝা, বোড়ো অইবী অঞ্জলি বাসুমাতরি, সিন্ধী অইবী মোহিনি থিঙ্গোরানী, হিন্দী অইবী প্রভা কুমারী, মলতিলিঙ্গুএল রাইটার প্রমোদ ঝা, কোলকতাগী অইবী লাক্সমিস্রি বেনর্জি, জবলপুরগী অইবী ৱাহিদা হুসেন, গোরগাওগী অইবা সহেনা অহমদনচিংবা তোঙান তোঙানবা লোনগী মশক নাইরবা অইবশিংনা পাংলকপা মতেঙ অসিনা পীক্লিবা অঙাংশিং অমসুং মশা শোল্লবা অহলশিংগী অরূম্বা ফুরিৎনচিংবা তুবীনবা রিলিফ কেম্প ২০ দা শিন্নখ্রে।
কেম্প খরদদি ফি তুবা লোইরদুনা য়েন্থোকপা য়াওখ্রে। মশীং ১০০ ফাওবদি চৎনবা পান্দম থম্লিবা অইবশিংগী তেঙবাং খোঙচৎ ৮৫ শুবা মশীং শুখিবগা লোয়ননা লৈকায়, খুল কয়াগী মৈরা পায়বীশিংনা, মণিপুরগী মনুং অমসুং মপানগী অইবশিংনা পিরকপা পুন্সি চেংজেল চেঙ বোরা ৩১০ গী মথক্তা চীংখোং চীংয়াদা খুল ঙাক্লিবশিং অমসুং তোঙান তোঙানবা রিলিফ কেম্প খরদা পীবা ঙমখ্রে হায়রি।
নোর্থ আমেরিকান বাংলাদেশ মণিপুরী সোসাইতিগী মতেঙগা লোয়ননা ব্লাঙ্কেত ১৩০০ গী মথক্তা য়েন্থোকপা ঙমখ্রে। তোঙান তোঙানবা রিলিফ কেম্পশিংদা লৈবা ইনমেত ২০ দা মশাগী শেন্থোক লম্বী শেমজবদা মতেঙ ওইনবা হৌদোক্নবা ফিগা লোয়ননা তেলরিং মেছিন ২০ খুৎশিন্নখ্রে। মীয়ামদগী নিজবা লুপা ৭-৭ কী মথক্তা মীয়াম্না পাংলকপা মতেঙগা লোয়ননা মখা তানা ইনমেত ১০ দসু তেলরিং মেছিন পীনবা থৌরাং তৌরি হায়রি।
সোর্স: পোক্নফম
0 কমেন্ট:
কমেন্ট তৌবিয়ু