লিসিপ্রিয়া কাঙুজম’গী পুন্সি ৱারী য়াওরে
ইম্ফাল, নভেম্বর ১০: পীক্লিঙৈদগী হৌনা অখাং কনবী অমদি থৌনা লৈবী মীতৈ চনু লিসিপ্রিয়া কাঙুজমগী পুন্সি ৱারীবু শীংথাবা ওইনা সেন্ত্রেল বোর্দ ওব সেকেন্দারি এদজুকেসন ( সি বি এস ই) গী ইংলিশকী সাবজেক্ততা চেপ্তার অমা ওইনা হাপ্তুনা ‘চাইল্ড হিরো’ হাযবা মিংথোল পীদুনা অঙাংশিংদা তম্বীবা হৌখ্রে হায়না লিসিপ্রিয়া কাঙুজমগী অফিসকী চেরোল অমনা হায়রি।
ৱা ঙাঙবদা দোং দোং ঙাঙগনবা অমদি মহাক্কী ৱাহৈ অমনা মালেমগী মী মিলিয়ন কয়াবু শুমহৎপা ঙম্লিবী মণিপুরদা পোকখিবী লিসিপ্রিয়াগী পুন্সি ৱারীবু শুগাইনা নৈনদুনা লমায় তরুকলোমদা অঙাংশিংগী মরুওইবা সাবজেক্ত অমা ওইরিবা ইংলিশ সাবজেক্ততা চেপ্তার অমা ওইনা তম্লি। মশাগী চহী ১২ রোমদা ঙাইরিবী লিসিপ্রিয়ানা ফোঙদোকপদা, ‘ঐগী নৌরিবা পুন্সি খোঙচৎপু অসুম্না সি বি এস ইগী স্কুল সেলেবাসতা লাইরিক ওইনা তম্বীবসি উবদা য়াম্না নুংঙাইবা ফাওই অমদি ঐবু ইকায়খুম্নবীবনি হায়না লৌই’।
নীংশিংবা য়াই, লিসিপ্রিয়া কাঙুজমনা পর্লিয়ামেন্ত হাউস মমাঙদা ইং ২০১৮ গী জুলাই থাদা চয়োল অমা হেন্না খোঙজং চঙশিন্দুনা প্রাইম মিনিস্তার নরেন্দ্র মোদিদা ক্লাইমেত চেঞ্জ লো অমা পাস তৌনবা হায়দুনা দিমান্দ তৌখি। নোংজু-নুংশা নাইদনা অমদি দিল্লীগী হিত ওয়েব অমদি এয়ার পোলুসন ক্রাইসিসনচিংবা ইস্যু কয়াদা লিসিপ্রিয়ানা মাঙজিন থাদুনা মালেমগী মীয়ামবু লুচিংদুনা লাক্লি। হৌখিবা ইং ২০২২ গী মে থাদা ইস্ত তিমোরগী প্রেসিদেন্ত অমদি নোবেল পিছ প্রাইজ ফংখ্রবা দাঃ জোস রামোস হোরতানা মহাক্কীদমক ‘লিসিপ্রিয়া ফাউন্দেসন’ লিংখৎপীখি।
করিগুম্বা মতমদসু মহাকপু মাঙহন্নবা, চিংথনবা অমদি হাৎতোক্নবা হায়দুনা মী খুজোক খরনা হোৎনদবসু নত্তে। অঙাং ওইমল্লি, অমদি মপানা মহাকপু শীজিন্নবনি হায়না লান্না পাউথোকপী। অদুবু লিসিপ্রিয়াদি মহাক্কী লেপখিবা খোঙফম হনবা লৈখিদে। মদুনা ঙসিদি মারেমগী মীয়াম্না শকখঙবী নুপী অমা ওইরকখিবনি।
মহাক্কী হনবা লৈত্রবা থৌনা অদুনা মালেমগী অঙাংশিংদা চহী হায়বসিনা মীগী পুন্সি লেপ্তে। অঙাং ওইরবসু মালেমদা অহোংবা পুরকপা য়াই হায়বগী অচৌবা পাউজেল অমা মহাক্না পীরি। লিসিপ্রিয়া মশাগী চহী তরুকখক্তা ঙাইরিঙৈদগী ক্লাইমেত চেঞ্জগী খোঙজং অসিদা শরুক য়াদুনা লাকখিবনি। মহাক্না ঙসি ফাওবদা মালেমগী লৈবাক ৩২ রোমদা চত্তুনা তোঙান-তোঙানবা মারেমগী ফম্বাক ৪৫০ হেনবদা ৱা ঙাঙখ্রে।
ঐখোয়গী লুচিংবশিংনা মহৌশাগী খূৎশেমদা ক্লাইমেত চেঞ্জ থোকহল্লিবা থৌদোক ৱাথোক কয়া অসি লুম্না লৌদে হায়বগীদমক মহাক্না খোঙজং কয়া চঙশিনবা হৌখিবনি। লিসিপ্রিয়া কাঙুজম বাসিখোঙ ৱাঙ্খৈ লৌমানবীদা লৈবা কাঙুজম কর্ণজিৎ অমদি কাঙুজম ওংবী বিদ্যারাণি দেবী অনীগী ইহান হান্না ফংজখিবা মচানুপীনি। অদুবু ঙসিদি মশাগী চহী ১২ শুবদা এনবাইরোনমেন্ত এন্দ ক্লাইমেত চেঞ্জগী হীরমদা মালেমগী খ্বাইদগী মশক নাইবা মীশিংগী মরক্তা য়াওবা ঙম্লে হায়রি।
মহাক্না ‘চাইল্ড মুবমেন্ত’ লিংখক্তুনা মহৌশাগী খল কায়রকপা অমদি অৱা অনা তারবা মী কয়াগী জাস্তিস ফংনবা হোৎনবদা অচৌবা থৌদাং লৌদুনা লাক্লি। ইন্দিয়া খক্তদা নত্তনা মারেমগী অঙাংশিংগী অমদি মরোল থোকচদ্রবা জিবা, থৱায় পানবা কয়াগী মহুৎ শীন্দুনা মহাক্না ইং ২০১৯ দা মাদ্রিদ, স্পেনদা পাঙথোকখিবা য়ুনাইতেদ নেসন্স ক্লাইমেত চেঞ্জ কনফারেন্স (সি ও পি ২৫) দা ৱা ঙাঙদুনা মালেমগী লুচিংবশিংগী পূক্নিং চিংশিনখি। থৌরম অদুগী মতুংদা মারেমগী মীয়াম্না মহাকপু মশক খঙবা হৌখি।
পনবা য়াই, লিসিপ্রিয়ানা মণিপুরদা হৌজিক থোক্লিবা ঈরাং অসিগী মরমদসু মারেমগী লুচিংবা কয়া, য়ুরোপিয়ান পার্লিয়ামেন্ত, য়ু কেগী নিংথৌ প্রিন্স চাল্স ৩ অমদি খৃস্তান লাইনিংগী মকোক পোপ ফ্রান্সিসনচিংবা কয়া উনদুনা শান্তি অমদি অচুম্বা পুরক্নবা কন্না হোৎনরিবনি।
সোর্স: পোক্নফম
0 কমেন্ট:
কমেন্ট তৌবিয়ু