• 572
• ১২ই নভেম্বর ২০২৩ ইং
• Share on:

ডোক্তরেট পীরকখ্রবা ককচিংতাবম কুমার শর্ম্মা তরাম্না ওকখ্রে

ইম্ফাল, নভেম্বর ১১ : গ্লোবেল হ্যুমেন পিছ য়ুনিভার্সিটিনা কালারগা মরী লৈনবা শীংথানিংঙাই ওইবা থবক থৌরম তৌবগীদমক শকখঙলদুনা ডোক্টরেট এৱার্দ পীদুনা ঈকায় খুম্নখ্রবা ককচিংতাবম কুমার শর্ম্মাবু রাজর্ষি ভাগ্যচন্দ্র কালচারেল ফাউন্দেশন্না তরাম্না ওকখ্রে।

টিদ্দিম রোদতা লৈবা সিটি ধবাদা রাজর্ষি কালচারেল ফাউন্দেসন্না শীন্দুনা পাঙথোকখিবা ককচিংতাবম কুমার শর্ম্মাবু তরাম্না ওকখিবগী থৌরম অদুদা রাজর্ষি ভাগ্যচন্দ্র কালচারেল ফাউন্দেসনগী ভাইস প্রেসিদেন্ট জি রঞ্জিৎ শর্ম্মা, আর কে সনাজাওবা, ফাউন্দেসন অসিগী ফাউন্দার মেম্বার এল গোজেন্দ্রো অমদি ফাউন্দেসন অসিগী মেম্বারশিংনা শরুক য়াখি।

তরাম্না ওকপগী থৌরমদুগা মরী লৈননা ককচিংতাবম কুমার শর্ম্মানা হায়খিবদা, চহী কয়া লমদমসিগী কালচার য়োকখৎনবা হোৎনজরকপা লোয়ননা শ্রী গোবিন্দজিগী থৌগল তৌজরকপা অসি খঙবীদুনা গ্লোবেল হ্যুমেন পিছ য়ুনিভার্সিটিনা ডোক্তরেট এৱার্দ পীদুনা ঈকায় খুম্নবা উৎপীবা অসিমক অপেনবা ফাওই মখা তানা লমদম অসিগী কলা সংস্কৃতি য়োকখৎনবা হোৎনখিবগনি।

মণিপুরগী ফজরবা কালচার ঙসিদি তাঙ্কক কয়া থোক্না তপ্না-তপ্না মাঙথরক্লি। মাঙথরক্লিবা লমদমসিগী চাউথোকচনিংঙাই ওইরবা আর্ট এন্দ কালচারবু ঐখোয়না পুন্না য়োকখৎমিন্নবা তঙাইফদে হায়খি। থৌরম অদুদা ফাউন্দেসন অসিগী ৱাঙাংলোয় তখেল্লম্বম ইরাবতনা হায়খিবদা, ফাউন্দেসন অসিগী ফাউন্দার মেম্বার ওইরিবা ককচিংতাবম কুমারদা কালচারগী লমদা ডোক্টরেট এৱার্দ পীবীরকপা অসিমক ফাউন্দেসন অসিগী অচৌবা মায় অমনি। মহাক্না মখা তানা লমদমসিগী আর্ট এন্দ কালচারগী লমদা পূন্সি শাংনা অহেনবা থৌগায় লৌবা ঙম্বা ওইরসনু হায়খি।

সোর্স: হুইয়েন লানপাউ