• 599
• ১১ই নভেম্বর ২০২৩ ইং
• Share on:

ফিট ১৩,৭০০ ৱাংবা চীংথক সেলা পাসতা শলাই তরেৎ মচুগী ফিরাল পাইহনখ্রে

আগরতলা, নভেম্বর ১০ : মালেমদা লৈবা মৈতৈ ঐখোয় পুনসি অমদি শান্তি লৈনা অমগা অমগা নুংশিনা লৈমিন্নসি হায়বা পাউজেল পুদুনা ত্রিপুরাগী মৈতৈ মচা কুমারঘাট বেতছড়া মৈতৈ খুঙ্গংগী নাওতোম নিশাননা লিশিং ১৭৬৯ খোঙনা চৎতুনা চীনগী ঙমখৈ থংনবা অরুনাচল প্রদেশকী তাওয়াং জিলা মনুং চনবা ফিট ১৩,৭০০ ৱাংবা চীংথকতা কাদুনা সেলা পাসতা মৈতৈগী শলাই মচু তরেৎকী ফিরাল য়ুংবা ঙম্বগী থৌনা উৎখ্রে।

তাওয়াংদগী মহাক্না পীরকপা পাঙজেল মতুং ইন্না চৎখিবা অক্টোবর ৯ খুৎতা শলাই মচু তরেৎ ফিরাল পায়দুনা ময়ূমদগী থোক্লক্তুনা থা অমরোম চুপ্না খোঙনা গুৱাহাটিদা য়ৌখি। গুৱাহাটিদগী অমুক খোঙনা নভেম্বর তাং ৮ দা চীনগী ঙমখৈ ভারতকী অরুনাচল প্রদেশকী তাওয়াং জিলা সিটিদা য়ৌখি। তাওয়াং সিটি অসি আসাম বোর্ডারদগী কিমিঃ ৩০ রোম লাপ্পী হায়রি।

জিলা অসিগী মনুং চনবা ফিট ১৩,৭০০ চীংথক্তা কাদুনা সেলা পাসতা মৈতৈ ঐখোয়গী শলাই মচু তরেৎকী ফিরাল অদু য়ুংবা ঙমখিবগী থম্মোয়দা ফাওখিবা নুংঙাইবা অদু পাউমী অসিদা মহাক্না ফোঙদোকখি। মহাক্কী মমাংদা মফম অসিদা অতৈ কনা অমত্তনা কাদুনা মৈতৈগী ফিরাল য়ুংবা লৈখিদে হায়রি। মহাক্না অসুম্না কাদুনা মৈতৈগী খুদম অমা থম্লম্বা ঙম্বগী চাওথোকবসু পোকখি।

পনবা য়াবদি শলাই তরেৎ মচুগী ফিরাল খুৎতা পায়দুনা চৎলিবা চহী অসিগী জুনা থাদগী মথং মথং নায়না ত্রিপুরাগী মৈতৈনা তাবা মফম খুঙ্গং কয়া অমসুং আসামগী করিমগঞ্জ পাথারকান্দি ওইনা গৌহাটি তম্না মখোঙনা চৎতুনা অপুনবা অমদি শান্তিগী পাউজেল পুদুনা থোক্লকখিবনি।

সোর্স: মরূপ