-রাজেশ্বর শর্ম্মা, নারান খামার

মীওইবগী নীতি খুদিংগী থবক ইনখাং শুবা চৎপদা, শান্ন-খোৎনবদা লল্লোল ইতিকতা ইমালোন্না শীজিন্নবদা নত্তনা সাহিত্য অমদি সংস্কৃতিদা শীজিন্নবা ঙমদ্রিমখৈ ইমালোনবু অৱাংবা থাক্তা ফমহনবা য়অরোইদবনি, ইউরোপতা ল্যাটিন লোননা কন্না শীজিন্নরিঙৈ মতমদা জাতি অয়াম্বগী সাহিত্য অমদি সংস্কৃতিগী মৈরা মুৎথরুরবনি, মতুংদা ইউরোপকী জাতি অয়অম্বগী সাহিত্য অমদি সংস্কৃতিগী মৈরা মুৎথরুরবনি, মতুঙদা ইউরোপকী জাতি পুম্নমক জ্ঞান তারক্লদুনা ল্যাটিন থাদোক্তুনা মহাক মহাক্কী জাতিগী লোন শীজিন্নখিবদগী হীরম পুম্নমক্তা মখোয়গী চাওখৎপা ওয়খি।

অতোপ্পা জাতিগী সাহিত্য অমদি জ্ঞান বিজ্ঞান চিংবা তমশিন হৈশিনবদগীদি য়াম্না মথৌ তারিবনি অদুগা অতোপ্পগী লোননা সাহিত্যদা শীজিন্নরবদি থোয়দোক্না খুদোং চাবা ওয়রোয় হায়না খনজৈ। জাতি পুম্নমক মাগী মাগী মমারোননা লাইরিক ইরদুনা মশাগী মিংচৎ অমদি জাতীয় সাহিত্য ভান্ডার চাওখৎহল্লিবনি। মণিপুরদা লৈবিরিবা মৈতৈ ওজাশিংসু জাতি অতৈগা খোঙথাং মান্ননা চৎননবা য়াম্না কন্না নোম্বিরিবনি। অদুবু ত্রিপুরাগী মৈতৈ ঐখোয়দি ঐখোয়গী জাতীয় সাহিত্য হায়বসি করিনো হায়বা খঙদবগুম তৌই, মরমদি ইংরেজি অমদি বাংলা তমশিন্দুনা অহৈ অশিং অমা ওইবিরবসু মৈতৈলোননা ইমালোন ওইরিবনিনা ইংরেজি সাহিত্যবু নত্রগা বাংলা সাহিত্যবু ঐখোয়গী সাহিত্যনি হায়বদা চিংনফম থোকই। কনা কনাগুম্বনা মৈতৈ লাইরিক পারুদুন করি কান্নগনি বাংলা লাইরিক্কী মনাক নকপা য়াগদবা নত্তে হায়বিবসু য়াওই। মতাংসিদা ঐহাক্না হায়জনিংবদি বাংলা সাহিত্যদু তশেংবা ঐখোয়গী সাহিত্য নত্তে মসি হায়বগী দমক ঐহাকপু অপোকপা মরূপকী মীওই অমনি হায়দুনা খনবিদনবা খ্বাইদা হায়জরি।

ঐহাকসু মমাংঙৈদা মণিপুরী সাহিত্য অমা লৈ হায়বসি খংন-খংনমক থিজিল্লুদবনা বাংলাগী শৈরেং কয়ামরোয় আগরতলাগী পেপারশিংদা অমদি কলিকাতাগী শিক্ষক মেগাজিন্দা ফোঙজরম্মী। ‘মণিপুরী হয়ে কেমন বাংলা লেখে’ হায়বা নত্তনা অকোপ্পা ৱাজমল ফংখিরমদে। নোংমা চাকমা ওঝা অমা বেসিক ট্রেনিং কলেজতা ফংনজৈ, মহাক্না ঐহাক্কী কবিতাশিং উরগা য়াম্না থাগৎপী, মতুংদা ঐঙোন্দা হায়খি, ‘আপনি নিজ মাতৃ ভাষায় লিখুন, এতে নিজের নাম যথেষ্ট হবে আর আপনাদের সাহিত্য ভান্ডারেরও শ্রীবৃদ্ধি হবে।’ মহাক্কী মমল চংলবা পাউতাক অসি ঐহাক্না মতমদুদা লৌনিংউদে। অদুম বাংলা শৈরেং নচিংবা ইজৈ।

আসামদা বেঙ্গল মিয়ামবু আসামীনা ওৎ-নৈবগী মরমদা ‘জাগরণ পত্রিকা’ দা মচিন তুম্নবা ৱাহৈশিং শীজিন্নদুনা কবিতা শীজিন্নদুনা কবিতা ইরুবদগী এডুকেশন ডিরেক্টর সাহেবনা ঐবু কৌখৎতুনা রাজনীতিগী মরমদা চাকরী তৌরিবা আপনারা অসুম্না ইবসি য়াম্না অরানবা থবকনি। মতুংদা অতৈ ইগনু হায়খি। মদুগী নুমিত্তগী ঐহাক্কী কলম অদুম লেপখ্রে। খরনি মতুংদা জ্ঞান তারক্লে, অতোপ্পা লোন হৈজিল্লগা ইমারোননা সাহিত্য শেগৎলবদি তশেংবা সাহিত্যিক ওয়বা য়াই হায়বসি নীংশিংলক্লে।

মাইকেল মধুসূদন দত্তনা মমা লোনবু থৌওইদদুনা ইংরেজিনা লাইরিক ইরুবদগী মহাক্কী থোইদোকপা মায় পাকপা ওইখিদে হায়বদু নীংশিংলক্লে। মমালোন পামদবতা নত্তনা মমালোন অখাক কাওথোক্লুরবা মধুসুদননি, পৃথিবী বানান ফাওবা চুম্না ইরুদ্রবনি। মতুংদা মমালোননা ইখিবদগী মাইকেল মধুসূদন দত্ত হায়না ফারখিরম্মী। মাইকেল মধুসূদন দত্তনা মমা লোনবু নুংশিবদা নত্তনা মহাক্না অসুম্না হায়খিরম্মী ‘মাতৃভাষা রূপ খানি পূর্ণ মনিজালে’, বঙ্কিমচন্দ্রসু ইংরেজি নিংথিজনা হৈরবা মী অমা ওইরম্বনি, ইংরেজি সাহিত্যদদগী মচাক মরল লৌখৎতুনা মমা লোননা ইখিবদগী ‘সাহিত্য সম্রাট’ হায়রগা মহাকপু খংনবিবদুনি।

অসিশিং অসি নিংশিংদুনা ঐহাকসু ইমা লোন্না ইজরগে হায়বসি লেপচরে। চুম্মী, ইমালোল হায়বসিদি মীওইবগী শিংলী নাউরিদা চুশিন্দুনা লৈরিবা মরম্না ইমালোলনা হান্না খল্লদুনা লেপ্লগা মতুংদা ইগদৌরিবা লোল অদুনা ইগদৌবনি। কনাগুম্বনা লোল ৫/১০ খংলবসু, ইখং খংনা মচিন্দগী ৱাহৈ অমা পুথোরকপা তারবদি মমালোলনা হান্না থোরক্কদবনি। গোপাল ভাঁড়গী ৱারীদা ঐনা ফংনজখি নদীয়াগী নিংথৌ কৃষ্ণচন্দ্রগী সভাদা মতম অমদা লোল ৫/১০না ৱা ঙাংবা মীওয় অমা লাকপদগী করি জাতকী মীশকনো হায়বদু খংবা ঙমদ্রদুনা নিংথৌনা গোপাল ভাঁড়দা য়াথং তৌখি-মী অদুগী পরিচয় খংননবা। গোপাল ভাঁড়না অহিং অমম্বদা লুমদুনা নিপাদুদা চৈবুন্না য়ৈথবদগী নুপা অদু নামনখিদুনা উড়িয়া মরোন্না অয়োইমা হায়দুনা খংলাউ লাউখি।

নিপা অদু উড়িয়ানি হায়দুনা গোপাল ভাঁড়না নিংথৌদা হঙ্গৎখি। মরম অসি খিবিক খল্লদুনা বাংলানা ইরগা ঐহাক্কী কান্নররোই হায়বসিসু লেপখি। অরেম্বনি অসুক কুইনা হৌখ্রবা মতম অসিদা ঐহাক্না বাংলানা ইরম্বসিদি। চাউরবা বাংলা সাহিত্যগী ভান্ডারনি, মদুদা ঐহাক্না করিবু পীরুবা ঙমগনি? ঐহাক্না তৌরম্বসিদি সমুদ্রবু অতৈসু হেন্না চোৎহনগে চিম্বালনা চুপ্পগী রসনা খন্দুনা পীক্লবা চিম্বানগী তুজুংবাগুম্নি।

হৌজিক্তি কুমজরে ঐহাক ইমাগী থৌগন্দা-ত্রেতাদা শ্রীরাম চন্দ্রগী সমুদ্র থিংবদা পিক্লবা খৈরোয়শিংনা সমুদ্রদা লুপ্পে, লৈঙোয়দা অমুক ওল্লে, পকহল্লে মশাদা সমুদ্রগী লৈঙোয়শিংদো, কাখৎলে থোংথক্তা খিক্তরুরে লৈঙোয়শিংদো, খঞ্জরি মখোয়না সমুদ্র থিংবদা মহোয়না মতেং পাংলিবনি। খংজদে খঞ্জদে মখোয়, লৈঙোয় খরদংনা সমুদ্র থিংবদা কৈসু মচাক ওইবা য়াদে। মদুবু নুংঙাইজইদুম খৈরোয় পুম্নমক্তো। মদুগী পান্দমগুম্না ঐসু ইমালোন্না ইরি, ঐনা ইবসিনা মৈতৈ সাহিত্য লঙ্গৈবু চাউখৎনবা ঙম্লি-ঙম্মোই করিসু খংজদে ইমালোন্না ইরিবসিনা দুম নুঙাইজৈ।

সোর্স: মরূপ