• 829
• ৫ই সেপ্টেম্বর ২০২২ ইং
• Share on:

মৈতৈ লাইনিং হিংহন্নবা হোৎনবদা চেন চোংলিবা পুম্নমক পুক্নিং থৌগৎপা তঙাইফদে: লৈশেম্বা সনাজাওবা

ইম্ফাল, সেপ্টেম্বর ৪ :মৈতৈ লাইনিং হিংহন্নবা হোৎনবদা লাইনিং অসিগা মরী লৈনবা থবক থৌরমশিং তৌরিবা অমদি চেন চোংলিবা পুম্নমক পুক্নিং থৌগৎপা তঙাইফদে হায়না রাজ্য সভাগী এমপি ওইবতা নত্তনা ষ্টেট অসিগী নিংথৌ ওইরিবা লৈশেম্বা সনাজাওবনা ফোঙদোকখ্রে। লৈশেম্বা সনাজাওবনা ৱাফম অসি ঙসি ইম্ফালগী ফার্ষ্ট এম আর গ্রাউন্দগা থংননা লৈবা হয়িং খোংবাল উফোং য়ুম্ফমগী লাইনিংথৌ সনামহি টেম্পল বোর্দতা পাঙথোকখিবা অমাই পীবা অপুল লুপ (অপাল), কংলৈপাক্কী অহুম্লকশুবা মপোক কুমওন থৌরম লোইশিনবগী থৌরমদা ফোঙদোকখিবনি।  

থৌরম অসিদা অথোইবা মীথুংলেন ওইখিবা লৈশেম্বা সনাজাওবনা হায়, মৈতৈ লাইনিংগা মরী লৈননা পুং য়ৈবা, ঈশৈ শকপা, ৱারি লীবা, অরাংফম ফম্বা, চাক থোংবা অমদি অতৈ মওং কয়াদা চেন চোংলিবশিং অসি লৈরম্বনা ঙসি মৈতৈ ফুরুপকী ইপা ইপুশিংনা থম্বীরম্বা ইনাৎ লাইনিং অসি ঙসিগী মীরোলনা খুদুং ইন্দুনা চৎপা ঙম্বনি।

মৈতৈ লাইনিংগা মরী লৈননা থবক তৌরিবশিং অসিনা কত্থোকপা অমগা লোয়ননা থবক তৌরমদ্রবদি ঙসি লাইনিং লিচৎ অসিনা লৈরিবা ফীবম অসি য়ৌরক্লমদবা য়াই হায়না মহাক্না মখা তারদুনা অসিগুম্বা মীওইশিং অসিনা ইনাৎ লাইনিং হিঙ্গৎহন্নবা অমদি চাওখৎহন্নবা হোৎনবদা লৌরিবা থৌদাংশিং অসি ঙসিগী মীরোলনা মশক খঙবীবা অমদি পুক্নিং থৌগৎপা য়াম্না মরু ওই হায়খি।

সনাজাওবনা ঙসিগী মীরোলদা হৌরক্রিবশিংনা লমদম অসিগী ইপা ইপুশিংনা থম্লম্বা নাৎ অমদি চৎনবীশিং ঙাক্তুনা চৎসি হায়না মীয়ামদা আপিল তৌরদুনা মহাক্কী মায়কৈদগী অসিগুম্বা থৌরমদা অঙম্বা মতেং পাংজগে হায়খি। কৈরাও কেন্দ্রগী এমএলএ লৌরেম্বম রামেশ্বর মীতৈনা থৌরম মপুগী ৱারোল পীবদা মৈতৈ লাইনিং লিচৎ কন্নব অপাল অমদি অতে লুপ কয়া থোরক্তুনা লমদম অসিদা মরী লৈনবা থবক থৌরম কয়া পায়খৎলকপসি মৈতৈ ফুরুপকী ওইনা য়াম্না লাইবক ফবনি হায়খি।

মহাক্না মখা তানা মৈতৈশিংনা পুনশিন্দুনা ইপা ইপুনা থম্লম্বা লাইনিং লিচৎ চাওখৎনবা হোৎনবা অমদি খুনাইগী ওইবা অফবা থবক থৌরমশিং পায়খৎপগী মতম ওইরে হায়রদুনা মসিগুম্বশিং অসিদা মহাক্কী মায়কৈদগীসু থম্মোয় শেংনা ঙমজবা থৌদাং য়াগে হায়না থমখি। থৌরম অসিদা লাইনিংথৌ সনামহি টেম্পল বোর্দকী ভাইস প্রেসিদেন্ট বিদ্যাপতি সেঞ্জম, অপাল কংলৈপাক প্রেসিদেন্ট মোইরাংথেম ভাগ্য অমদি মণিপুর ষ্টেট কলা একাডেমি কোন্সম জিতেনসু ফম্বৈলোই (গেষ্ট ওফ ওনা) শিং ওইনা শরুক য়াখি। মৈতৈ লাইনিং চাওখৎনবা হোৎনবদা থবক তৌবগীদমক থৌরম অসিদা মশক নাইবশিং য়াওনা মীওই কয়া অমদা তোঙান তোঙানবা মনা অমদি শকখঙচেশিংসু য়েন্থোকখি।

সোর্স: সঙাই এক্সপ্রেস