• 839
• ৫ই সেপ্টেম্বর ২০২২ ইং
• Share on:

অয়েকপম শ্যামসুন্দরগী ‘ওসমান থম্বাল’ গী অনীশুবা খুৎনম ফোঙখ্রে

ইম্ফাল, সেপ্টেম্বর ৪ : মতম অমদা মীয়াম্না য়াম্না পাম্নখিবা অয়েকপম শ্যামসুন্দরগী ‘ওসমান থম্বাল’ হায়রিবা দ্রামা লাইরিক অসিবু এস এম শৈখনা নৌনা রিপ্রিন্ত তৌদুনা লাইরিক অসিগী অনীশুবা খূৎনম ফোঙখ্রে। রাইটার্স য়ুনিয়ন ইম্ফালনা শীন্দুনা ঙসি মেজোর খুলদা লৈবা মণিপুর প্রেস ক্লাবতা য়ুনিয়ন অসিগী প্রেসিদেন্ট দাঃ সয়েদ আহমদনা প্রিসাইদ তৌদুনা পাঙথোকখিবা থৌরম অদুদা সাহিত্য একাদেমি, নিউ দিল্লীগী মণিপুরী লেঙ্গুয়েজ এদভাইজরি বোর্দকী কনভেনর নোংমাইথেম কিরনকুমারনা চীফ গেস্ত, মণিপুর য়ুনিভার্সিতি ওব কালচারগী এসিস্তেন্ত প্রোফেসার মাখোন মনি মোংসাবা, অইবা অয়েকপম শ্যামসুন্দরগী মচানুপী অহল অয়েকপম লিলাবতি অমসুং লিলোং হাওরৈবী কলেজগী প্রিন্সিপাল দা: রহৈজুদ্দিন শৈখনা গেস্ত ওব ওনার ওইনা শরুক য়াখি।

মীতৈ ময়েক অমসুং বেঙ্গলি ময়েক অনীমক্তা নম্বা লমায় ৮৩ পানবা হিস্ত্ররিকেল দ্রামা লাইরিক অসিগী অনীশুবা খূৎনম অদু ঙসিগী থৌরম অদুদা চীফ গেস্ত ওইনা শরুক য়াখিবা নোংমাইথেম কিরনকুমারনা হৌনবী মতুং ইন্না মীয়ামদা ফোঙদোকখি। থৌরম অদুদা এসএম শৈখনা হায়খি, অয়েকপম শ্যামসুন্দরগী ‘ওসমান থম্বাল’ হায়রিবা হিস্তরিকেল দ্রামা অসি অশেংবা থোকখিবা থৌদোক্তা য়ূম্ফম ওইরগা অইবনা ইবীরম্বনি। ইং ১৯৭৩-১৯৭৪ মতমদা ফোঙখিবা লাইরিক অসিগী মহাওদি ঙসি চহী ৫০ রোম ফারক্লবা ফাওবসি কাউবা লৈতে। মসিগী মথক্তা অশেংবা থৌদোক্তা য়ূম্ফম ওইবনা মহাক (এস এম শৈখ) না হেন্নসু খোইদাজবা ওই। অসিগুম্বা লাইরিক অমা খুদোল তম্বীরম্বা অসিগীদমক অইবসু ঙমখৈ লৈতনা থাগৎলি।

মহাক্না হায়খি, পুৱারীগা মরী লৈনবা পাঙলশিংগী থৌদোক ৱাথোক কয়া লৈরি। অদুবু ইবীনবা অইবদি ইরৈ লৈতে হায়বদা হায়মনবা থোক্তে। মসিনা মরম ওইরগা মীয়াম্না অমসুং খুন্নাইনা খঙবীদনা লৈরি। লৈবাক অসিগী পুৱারীগা মরী লৈনবা ৱাফম খঙবা অমসুং নৈনবা পাঙল খুন্নাইগী মী মশীং য়াম্না লিকই। মায়কৈ অসোমদা ওনশিনবা মীশিং য়াম্না ৱাৎলি। লাইরিক অসিবু অনীশুবা খুৎনমগীদমক হরাও হরাও অয়াবা পীরকখিবী অইনবগী মচানুপী অহল অয়েকপম লিলাবতি, ওজা সুব্রতা অদুগা মসিগীদমক মরী-মখোঙ শমজিনবা ফংহনবীবদা মতেঙ পাংখিবশিং লৈখিদ্রবা শগোলশেম ইন্দ্রকুমার অমসুং শৈশকপী চোংথাম কমলাবু এস এম শৈখনা থাগৎপা ফোঙদোকখি।

সোর্স: পোক্নফম