• 791
• ১০ই মে ২০২২ ইং
• Share on:

মীতৈ ময়েক সার্টিফিকেট কোর্স অহানবা চহীগী চাংয়েং পাঙথোকখ্রে

ইম্ফাল, মে ০৮ : মীতৈ ইরোল ইয়েক লোয়নশিল্লোল অপূনবা লূপ (মীলাল) কংলৈপাক, মীলাল কংলৈপাক জিরিবাম পানা লোয়শঙ অমদি নৱা শিন্দমশঙ জিরিবামগা পুন্না খুৎশম্নদুনা ঙসি জিরিবামদা লৈবা জিরিবাম হায়ার সেকেন্ডারি স্কুলদা মীতৈ ময়েক সার্টিফিকেট কোর্স অহানবা চহীগী ওইবা চাংয়েং অমা পাঙথোকখ্রে হায়না মীতৈ ইরোল ইয়েক লোয়নশিল্লোল অপূনবা লূপ (মীলাল) ময়াই লোয়শঙগী পাব্লিসিটি সেক্রেটারি মাইবম ইন্দ্রজিৎনা থাদোরকপা চেরোল অমনা ফোঙদোরক্লি।

চেরোল অদুনা মখা তারদুনা হায়, ঙসিদগী হৌদুনা জিরিবামদা পাঙথোকখিবা মীতৈ ময়েক সার্টিফিকেট কোর্স অহানবা চহীগী কোর্স অসি মখা তানা দিপ্লোমা কোর্স ফাওবসু চত্থগনি। মরম অসিনা জিরিবামদা অমদি জিরিবামগী অকোয়বদা লৈরিবা মহৈরোয়শিং অমদি ইরৈচা খ্বাই পুম্নমক্না হায়রিবা সার্টিফিকেট কোর্স অসিদা পূক্নিং হকচাং থৱায় য়াওনা শরুক য়াবীনবা মীতৈ ইরোল ইয়েক লোয়নশিল্লোল অপূনবা লুপ (মীলাল) গী মায়কৈদগী আপীল তৌজরি হায়নসু চেরোলদুনা মখা তানা ফোঙদোরক্লি।

পনবা য়াবদি, মীতৈ ইরোল ইয়েক লোয়নশিল্লোল অপূনবা লূপ (মীলাল) কা খুৎশম্নদুনা জিরিবাম অমদি মণিপুরগী তোঙান তোঙানবা মফমশিংদা চৎতুনা মীতৈ ময়েক চাউখৎনবগী পান্দমদা তাকপী তম্বীবগী থৌরমশিং চত্থদুনা লাকখিবনি। অসিগুম্বা মীতৈ ময়েক চাউখৎনবগী পান্দমদা চত্থরক্লিবা মীতৈ ময়েক পাবা, ইবনচিংবা তাকপী তম্বীবগী খোঙচৎ অসিগী মনুং চন্না মীতৈ ময়েক খঙলমদবা মীওই কয়াদা মীতৈ ময়েক পাবা অমদি ইবা হৈহনখিবা লৈখ্রবনি।

সোর্স: হুইয়েন লানপাউ