মিরাবাই চনুনা পুৱারী ওইরবা অহানবা এশিয়ান গেমসতা সিলভর মেডেল লৌখ্রে
প্রসিদেন্ট মুর্মু অমদি প্রাইম মিনিস্তর মোদিনা থাগৎলক্লী
নাগোয়া, সেপ্টেম্বর ২৩ (এজেন্সি): শক্নাইরবী ইন্দিয়াগী লিফতর সাইখোম মিরাবাই চনুনা এশিয়ান গেমস ২০২৬ কী ঙসি পাঙথোকখিবা নুপীগী কিলোগ্রাম ৪৯ গী ৱেতলিফটিং মশান্নাদা সিলভর মেডেল অমা ফংদুনা মহাকী অহানবা এশিয়ান গেমস মেডেলগী পুৱারী অমা শেম্বা ঙমখ্রে।
চহী ৩২ ফারক্লবী মণিপুরী লিফতর অসিনা কারনাম মালেশ্বরীনা ইং ১৯৯৮ দা ব্যাংকোক্তা সিলভর মেডেল লৌখিবা অদুগী মতুং তারকপদা অহানবা এশিয়ান গেমস ৱেতলিফটিং মেদালিস্ত ওইনবা ঙসি নাগোতা সিতি রেদ এন্দ ইন্দস্ত্রি সেন্তরদা পুন্না কিলোগ্রাম ১৯৬ (স্নেচতা কিলোগ্রাম ৮৭ অমসুং ক্লিন এন্দ জর্কতা কিলোগ্রাম ১১১) গী অরুম্বা অমা থাঙ্গৎখি।
কেজি ৪৯ কাঙলুপকী নুপীগী কম্পিতিসন অসিদা, অনীরক হন্না এশিয়ান গেমস অমসুং ৱার্ল্দ চ্যাম্পিয়ন ওইখ্রীবা নোর্থ কোরিয়াগী রি সোং-গুমনা পুন্না কেজি ২১০ (স্নেচতা কেজি ৯৪, ক্লিন এন্দ জর্কতা কেজি ১২১) থাঙ্গৎলগা গোল্দ মেডেল লৌখি, অদুগা ইন্দোনেসিয়াগী রিজায়ানা লুলুক দাইনি ত্রিনা কেজি ১৯১ (স্নেচতা কেজি ৮৭, ক্লিন এন্দ জর্কতা কেজি ১০৩) থাঙ্গৎতুনা ব্রোঞ্জ ফংখি।
আইচি-নাগোয়াদা মেডেল অমা লৌবা অসিনা মিরাবাইগী অচৌবা মল্তি-স্পোর্ত ইবেন্ত অহুম—অলিম্পিক্স, এশিয়ান গেমস অমসুং কমনৱেলথ গেমসতা মেডেলশিং লৌবা মশীং শুহনখ্রে। মসিদগী হেনদোক্লদুনা, কারনাম মালেশ্বরীগী মতুংদা, মিরাবাই চনুনা অচৌবা ইন্তরনেসনেল ৱেতলিফটিং ইবেন্ত পুন্নমক— ওলিম্পিক্স, এশিয়ান গেমস, কমনৱেলথ গেমস অমসুং ৱার্ল্দ চ্যাম্পিয়নশিপ, এশিয়ান চ্যাম্পিয়নশিপ অমদি কমনৱেলথ চ্যাম্পিয়নশিপতা মেডেল অমা লৌবী অনীশুবা ইন্দিয়ান ৱেতলিফতর ওইখ্রে।
মিরাবাই চানুনা অলিম্পিক সিলবর, ৱার্ল্দ তাইতল অমা অমসুং কমনৱেলথ গেমস গোল্দ মেডেল অহুম মহাক্কী মিংদা লৌখ্রে, অদুবু এশিয়ান গেমসকী মেডেলগী ফম্বাক্তা কাবা ফংবদি ঙসিগী অসিনা অহানবনি।
মণিপুরগী চিফ মিনিস্তর য়ুম্নাম খেমচান্দ সিংহনা এশিয়ান গেমস ২০২৬ গী সিলভর মেদলিস্ত সাইখোম মিরাবাই চানুগা ভিদিও কনফরেন্সকী খুৎথাংদা ৱারী শান্নবগী মিকুপ অমা l
অহানবা ওইনা ২০১৪ এশিয়ান গেমসতা শরুক যাবা মতমদা মাপনশুবদা লৈখি। জাকার্তাদা পাঙথোকপা ২০১৮ এদিসনদা মহাক অশোকপা নংখিবা মরমনা কোম্পিতিসন য়াওবা ফংহৌখিদে। মহাক ২০২৩ দা হাংঝৌ এদিসনদা শরুক য়ানবা খুদোংচাবা অমুক্কা ফংদুনা শরুক য়াখি অদুবু ফাইনালদা অশোকপা অমা লৈখিবাদুনা ফাইনেলদা মহাকী ক্লিন এন্দ জর্ক এতোম্পতা অপনবা পীখিবদগী থম্মোয় কায়না মরিশুবা তারগা লোইশিনখি।
চহী অহুম লৈরকান্দা, মিরাবাই মহাক্না মহাক্কী অলিম্পিক সিলবর ফংখিবা মফম ওইরিবা লৈবাক জাপানদা অমুক হল্লকখি, অমসুং ইং ২০১৪ দগী মহাকপু ফংঙো তানজরক্লিবা তরাইনা তাপ হেক লৌবা ঙমদবা এশিয়ান গেমস মেডেল অদু কাইনথঙদা ঙসি লৌবা ঙমখি।
মহাকী খোঙচং অসি মায় পাকপগা নীংহন্নবগা ইতোৎ তোৎশিন্নবা লাকখি। রিও ২০১৬ দা, মহাক কম্পিতিসনদা চৎনবা লিফত অমা থাঙগৎপা ঙমখিদে। চহী মঙা লৈরগা, মহাক্না তোকিও অলিম্পিক্সতা মশক থোক্না খুৎ হল্লক্তুনা সিলবর মেডেল লৌখি অমসুং মশামকপু মালেমগী ৱেতলিফতিংদা মাঙজীন থারিবা লিফতরশিংগী মরক্তা য়াওবা ঙমহঞ্জখি।
মিরাবাই চানুনা মহাকী কেম্পেন অদু স্নেচতা কিলোগ্রাম ৮৭ থাংগৎলগা হৌখি অমসুং চপ মান্নবা অরুম্বা অসিমক মহাকী মায় পাকপা ক্লিন এন্দ জর্ক এতোম্পদা থাংগৎখি। মসিগী মতুং তারকপদা ওভারওলদা কেজি ১৯৬ থাংগৎলগা লোইশিনখি।
সিলবর মেডেল লৌখিবা অসিনসু ইন্দিয়াগী মেডেল লৌবা মশীং হেংগতহনবগা লোয়ননবগা লৈবাক অসিনা এশিয়ান গেমসতা ৱেতলিফতিং মেডেল অমা লৌনবা শাংলবা চহী ২৮ গী মতম অমা ঙায়রকপা অদুবুসু লোইশিনহনখ্রে।
মরকসিদা, ইন্দিয়াগী লিফতর সাইখোম মিরাবাই চনুনা এশিয়ান গেমস ২০২৬ তা সিলবর মেডেল লৌবা ঙমখিবা অসিদা প্রসিদেন্ট দ্রৌপদি মুর্মু অমসুং প্রাইম মিনিস্তর নরেন্দ্র মোদিনা থাগংপা ফোঙদোকখ্রে।
প্রসিদেন্টকী পাউজেল অমদা হায়, ঐহাক্না মিরাবাই চনুবু এশিয়ান গেমস ২০২৬ তা নুপীগী কিলোগ্রাম ৪৯ গী ৱেতলিফতিং ইবেন্ততা সিলবর মেডেল লৌরকপদা থম্মোয় শেংনা থাগংলি। মসিগী এচিভমেন্ট অসিনা ইন্দিয়াবু চহী ২৮ গী মতুংদা এশিয়ান গেমসতা ৱেতলিফতিং মেডেল অমা ফংহল্লে। অলিম্পিক্স, এশিয়ান গেমস, কমনৱেলথ গেমস অমসুং ৱার্ল্দ চ্যাম্পিয়নশিপ য়াওরগা লেমজনীংঙাই ওইরবা তোঙান তোঙানবা ইন্তরনেসনেল তুর্নামেন্তশিংদা মেডেলশিং লৌদুনা, নহাক্কী খোঙচং অসিনা এথলেতশিংগী নৌরিবা মীরোলদা থৌনা হাপকৎনবা অমা ওইনা লেংদনা লৈহল্লে হায়না ফোঙদোকখি।
প্রাইম মিনিস্তর নরেন্দ্র মোদিনা এক্সতা থাগংলকপা মহাকী থাগং ৱারোলদা হায়খি, মিরাবাই চনুগী ওইনা অখন্নবা সিলবর অমা ফংলে। ৱুমেন্স কেজি ৪৯ গী ৱেতলিফতিং ইবেন্ততা মেডেল লৌরকপদা মহাক্কী মফমদা থাগংপা ফোঙদোক্লী। ইন্দিয়ানা মহাক্কীদমক চাউথোকচরি। মহাক্কী মতুং তারকপদা পান্দম ফংনবা হোৎনরকপদা মায় পাকপা ওইনবা য়াইফ মঙ্গল পীরি।
অমরোমদা, স্পোর্তস মিনিস্তর মনসুখ মান্দাবিয়ানা মহাক্কী থাগং ৱারোলদা হায়খি, মিরাবাই চনুগীদমক পুৱারী ওইবা সিলবর ফংলে। এশিয়ান গেমস ২০২৬ তা নুপীগী কেজি ৪৯ গী ৱেতলিফতিং ইবেন্ততা সিলবর মেডেল লৌরকপদা থাগংপা ফোঙদোক্লী। মসিগী মহাক্কী অহানবা এশিয়ান গেমস মেডেল ওইবগী নীংশিং খুদম ওইরে অমসুং চহী ২৮ গী মতুংদা গেমস অসিদা ইন্দিয়াবু মেডেল অমগা অমুক ফংহল্লে। জাতি পুন্মক্না নহাকীদমক চাউথোকচরি। ভারতকীদমক হরাউবা ফোঙদোক্লী ।
সোর্স - পোক্নফম
0 কমেন্ট:
কমেন্ট তৌবিয়ু