মণিপুর ফিল্ম এৱার্দস (মনিফা) ২০২২ গী এৱার্দ ফংখ্রবা শক্নাইরবা আর্টিষ্টশিংদা মনা লান্থোকখ্রে
ইম্ফাল, মে ১৫: থৌনা মণিপুর অমদি ফিল্ম ফোরাম মণিপুর অনীনা শীন্দুনা তরাশুবা মণিপুর ফিল্মস এৱার্দ (মনিফা) ২০২২গী মনা লান্থোকপগী থৌরম অমা ঙসি ককচিং দ্রামাটিক য়ুনিয়নগী ওদিটোরিয়ামদা পাঙথোকপা হৌখ্রে। ফিল্ম এৱার্দশিং লান্থোকপগী থৌরম ঙসি হৌদোকখিবা অদুদা মণিপুর য়ুনিভার্সিটি ওব কালচারগী ভাইস চাঞ্চেল্লর প্রোফেসর পি গুনিন্দ্রোনা অথোইবা মীথুংলেন, ফিল্ম ফোরাম মণিপুরগী চেয়ারমেন এস. মঙ্গোলজাও অমদি থৌনা মণিপুরগী প্রেসিডেন্ট য়াম্বেম সত্য অনীনা থৌরম মপু ওইবগা লোয়ননা থৌনা মণিপুরগী সেক্রেটারি ৱাই নিলাচন্দ্রনা ফেষ্টিভেল দিরেক্টর ওইনা শরুক য়াদুনা মনিফা-২০২২ এৱার্দ লান্থোকপগী থৌরম অদু মৈরা চুখৎতুনা হৌদোকখি।
ঙসি ককচিং দ্রামাটিক য়ুনিয়নগী ওদিটোরিয়ামদা পাঙথোকখিবা মনিফা ২০২২ গী মনা লান্থোকপা হৌদোকপগী থৌরম অদুদা থৌরম মপুগী ৱারোল পীরদুনা ফিল্ম ফোরাম মণিপুরগী চেয়ারমেন এস. মঙ্গোলজাওনা ফোঙদোকখিবদা, থৌনা মণিপুরনা ফিল্মগী লমদা খোঙদারিবা আর্টিষ্ট কয়াবু পূক্নিং থৌগৎপীদুনা পীবীরিবা মণিপুর ফিল্ম এৱার্দস (মনিফা) অসি মণিপুরগী ওইনা খ্বাইদগী চাউবা মণিপুরগী ফিল্ম এৱার্দ অমা ওইহন্নবা মণিপুরী ফিল্ম ফোরামগী মায়কৈদগীসু মতেং পাংননবা খন্নবা লৈখ্রে হায়বনচিংবা ৱাফম কয়া ঙসিগী থৌরম অদুগা মরী লৈননা মহাক্না ফোঙদোকখি।
ঙসিদগী হৌরদুনা মনিফা এৱার্দ ২০২২ গী এৱার্দ লান্থোকপগী হৌদোকপগী থৌরম অদুদা মাইপাক সনাহল মণিপুরী জগোয়/ঈশৈ লাইফ টাইম মনা ২০২২ ক্ষেত্রিময়ুম গোদাধরদা পীখি। নেতা ইরাবত লীলারোয় লাইফ টাইম মনানা শুমাং লীলারোয় মুতুম ইবোমচাদা পীখি। অদুগা নেতা ইরাবত লীলারোয় লাইফ টাইম মনানা মণিপুরী সিনেমা আর কে জননরঞ্জনদা পীখি। লোয়ননা থৌরম অদুগী মনুং চন্না স্পেসল জুরি এৱার্দনা ফিল্ম লাইরেম্বীগী আর কে সনাজাওবদা অমদি স্পেসল মেন্সন এৱার্দ ফিল্ম পিটিও (এল টি) গী ধুঙ্গা ক্ষেত্রিময়ুমদা খুৎশিন্নখিবগা লোয়ননা ঙসিগী মণিপুরী ফিল্ম এৱার্দ (মনিফা) ২০২২ গী মনা লান্থোকপগী হৌদোকপগী থৌরম মনুং চন্না পুন্না তোঙান তোঙানবা এৱার্দ ২৬সু খুৎশিন্নখি।
ঙসিদগী হৌদুনা পাঙথোকখিবা মনিফা ২০২২ গী মনা লান্থোকপগী থৌরম অসিদা মণিপুরগী শক্নাইরবা আর্টিষ্টশিংদা মখল মখা কয়াগী মনাশিং পীবগা লোয়ননা থৌরম অসিদা মণিপুরগী সিনিয়র আর্টিষ্ট কয়াসু শরুক য়াখি। পনবা য়াবদি মনিফা এৱার্দ অসি মণিপুরদা লৈরিবা ফিল্মগী আর্টিষ্টশিংবু পূক্নিং থৌগৎনবগী পান্দমদা পাঙথোক্তুনা লাকখিবনি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু