• 797
• ১৬ই মে ২০২২ ইং
• Share on:

কংলৈ নুপীগী ফনেক ফিবান্দা লোল্লিবা খোই ময়েক্কী মতাংদা খন্ন-নৈনখ্রে

ইম্ফাল, মে ১৫ : লমদম অসিগী পুৱারীগা শগোন্নদুনা চৎলিবা কংলৈ নুপীগী ফনেক ফিবান্দা লোল্লিবা খোই ময়োক্কী মতাংদা খন্ন-নৈনবগী মীফম অমা কংলৈপাক উইমেন ওয়েলফেয়ার এসোসিয়েসন (কে.ডব্লিউ. ডব্লিউ. এ) না শিন্দুনা ঙসি মেজোর খুলদা লৈবা মণিপুর প্রেস ক্লাবতা পাঙথোকখ্রে।

ঙসি পাঙথোকখিবা মীফম অদুগা মরী লৈননা ৱারেপ অহুমসু লৌখি। ৱারেপশিং অদুদি অহানবদা পুৱারীগা শগোন্নদুনা লাক্লিবা খোই ময়েক্কী ফনেক অসি নাৎকা মরী লৈনবা থৌরমশিংদা শেৎপা, অনীশুবদা সোন্নপুঙ ময়ায়দা মৌ অমসুং লৈশাবীশিংনা মীয়ামগী থৌগল তৌবা অমদি শক শোনবদা শেৎকদবগী মওং অখঙ অহৈশিংগী তানরগা শেৎপা অমদি য়াম্না চেকশিন্না ইনবা হায়বদি মৌ ওইরগনা সোন্নাপুঙদা থৌগল তৌবদা ফিদোন চীংখৎপা অদুগা লৈশাবী ওইরগনা খোইখাদা শেৎপা অমসুং অহুমশুবদা নাৎকী ওইবা মমল য়াম্লবা ফিজোলশিং মতম পুম্বদা ঙাক শেনবীনবা মরী লৈনবা দিপার্টমেন্টশিংদা তকশিনবা অমদি জি আই টেক্নচিংবা রেজিষ্টার তৌহনবা হায়বসিনি।

সোসল ৱার্কর ইবোয়াইমা মঙাং, এসিষ্টেন্ট প্রোফেসার ডা. এম চাওরৈকনবা দিপার্টমেন্ট ওব ডান্স এন্ড মিউজিক মণিপুর য়ুনিভার্সিটি, এস মনাওবী (খোইরেন্থাবা) রিটেয়ার্দ আই পি এস, কালচারেল এক্টিভিষ্ট ওইনাম চনা লুখোই অমদি এসিষ্টেন্ট প্রোফেসার ডা. এন সনাতোম্বা দিপার্টমেন্ট ওব মণিপুরি এম য়ুনা মীফমলোইশিং ওইখি।

ঙসিগী মীফম অদুগা মরী লৈননা সি সি এস কেগী প্রেসিডেন্ট জিতেন্দ্র নিঙোম্বনা হায়, লৈবাক অমবু মশক তাকপদা খ্বাইদগী মরুওইরিবা অসি চৎন-লোনচৎ অমসুং ফিজেৎ চাকচানি। মসি মালেমগী মীয়াম্না য়ানরবা ৱাফম অমনি। মরম অদুনা য়ু. এন ওগী মীফমশিংদা মশা মশাগী লৈবাক্কী ওইবা ফিজেৎ শেত্তুনা অমদি মশাগী মরোল ঙাঙদুনা চাওথোকচবা উৎচরি। অতোপ্পা লৈবাক খরদি মশাগী ওইবা চপ চাবা নাৎ অমদি চৎনবী অমসুং ফিজেৎ মাঙখিবনা মরম ওইরগা হৌজিক্তা কন্না খোঙ্গুল লীবগী থবক চত্থনরক্লি।

ওইরক্লিবা ফিবম অসিদা লমদম অসিগী নুপীশিংনা খুন্নাই অসিগী মরুওইবা থবক থৌরমশিংদা শেৎ চারিবা ফিজোলগী মতাংদা নৈনবগী মীফম অমা পাঙথোক্লিবা অসি য়াম্না মরম চাই। অদুবু হায়রিবশিং অসি থবক্তা ওন্থোক্নবা হোৎনবদা লমদম অসিগী মীপুম খূদিংমক্তা হিরম অসিগী মতাংদা এৱারনেস পীদুনা খঙহনবা মথৌ তারি। লমদম অসিগী ইপা ইপুশিংনা ঐখোয়গীদমক্তা থম্বীরম্লবা ঐখোয়গী নাৎ চৎনবী অমদি ফিজেৎপু য়োকখৎপা হায়বসি খুদিংমক্কী থৌদাংনি হায়খি।

সোর্স: হুইয়েন লানপাউ