মণিপুরী জগোইবু মালেম শিন্না শন্দোক্লবা গুরু য়াইখোম হেমন্তকুমার –বুধ চিংথাম
প্রোফেসার য়াইখোম হেমন্তকুমার হৌজিক হৌজিক দিপার্টমেন্ট অব রবিন্দ্র সঙ্গীত, ডান্স এন্ড ড্রামা সঙ্গীত ভবন, বিশ্বভারতী, শান্তিনিকেতনদা মণিপুরি ডান্সকী সিনিয়র প্রোফেসার ওইনা লৈরি। হায়রিবা বিশ্বভারতী য়ুনিভার্সিটি অসিগী রবিন্দ্র সঙ্গীৎ, ডান্স এন্ড ড্রামা, সঙ্গীত ভবন অসিগী হেড অব দিপার্টমেন্টসু ওইরম্মী। মহাক অসি ওয়েষ্ট বেঙ্গল ডান্স গ্রুপ ফেডারেশনগী মেম্বারসু ওইরি। কালচারেল রিসার্চ সেন্টার মণিপুর, ইম্ফালগীসু মেম্বার ওইরি। গুরু হেমন্তকুমার ইন্দিয়াগী তোঙান তোঙানবা য়ুনিভার্সিটিশিং অমসুং কালচারেল ইন্সটিট্যুশনশিং ইন্দিয়াগী মপানগী কয়াগীসু মণিপুরি জগোইগী মরু ওইবা মীশক অমসু ওইরি।
বুধ চিংথাম
অঙাং পিশক ওইরিঙৈ, মীরোল খরা-খরা তারকপা মতমদগী শঙ্গোম পাউদর হাপ্পগী অহাংবা কৌতা অমা পায়, মমাদা মদুবু পুঙ ওইনা শেমদুনা থৌরি পিয়ু হানা নিঙাই তৌদুনা পুঙ ওইনা শেমদুনা অঙাং অদু পুঙ য়ৈবা হৌরকই। লৈকাইগী ধর্ম্ম-কর্ম্মদা পুঙ চোলোম উরবদগী মদুগা মান্ননা অহাঙবা অমুল, গ্লেকসো কৌতাদু মশা তপতানা য়ৈদুনা শান্নরকই। মপা পোকপা মপুবোক্না বৈষ্ণব ধর্ম্মদা লুপচবা ওইনা মশুগী কুহ্মৈ অদু পেন্না য়েংজৈ, পুক্নীং চাওনা থৌগৎপিখি। অসুম্না অঙাং পিশক ওইরিঙৈদগী পুঙ ওজা নাইনা তম্নবগী লম্বী অদু মপুবোক্না হাংদোকপীরকখি।
অঙাংদি নিংথাদা খঙই হায়বদুনি। ওজা নাইনা তমদ্রিঙৈদগী হৌনা লৈকাইগী লাই হরাওবদা পুঙ পায়দুনা জগোই শাবা থৌরম কয়া যাওরকখি। সেন্ট্রেল স্কুলদা ক্লাস থ্রি, ফোর তম্লকপদগী হৌনা ওজা কয়ানা ঙক্না পুঙ য়ৈবগী মহৈ অদু খঙবা হৌরকখি। সেন্ট্রেল স্কুলগী জগোই ঈশৈগী থৌরম কয়া শরুক য়াদুনা মণিপুরগী মপান্দা চৎপা হৌরকখি। মহাক্কী থোইদোক হেন্দোকপা মতৌ অদুদা মহাকপু পোকপা অমসুং অপোকপীনা মতাং চানা জহরলাল নেহেরু মণিপুর ডান্স একাডেমিদা কলাগী বিদ্যা তম্নবা মিং চনবীদুনা কলাগী মহৈ তম্বা হৌরকখি। অঙকপা অঙাং ওইরিঙৈগী পুন্সী অমনি। সেন্ট্রেল স্কুলনা বাবুপারাদগী লমফেলদা হোংলকপা মতমদুদা য়ুমদগী চরা ৱান্নবা টিফিন মরোল অনী পুদুনা স্কুল লোইরগা ডান্স কলেজদা কাচিন অমদা লোন্না টিফিন চারগা মহাক্না পামজবা কলাগী মহৈদু তমজরকই। পুন্সীগী মহৈ তম্বা অমসুং কলাগী মহৈসু তমজরকই। মায় পাক্না চঙশিল্লকখি। ওন্থোক্না তমজনিংঙাই ওইবা পুন্সী অমনি। মহাক অদু অতৈ কনাসু নত্তে পুঙ, ঈশৈ, মণিপুরি জগোই লাইনিংদা মালেম শিনবা থুংনা চোকথবা লৈতনা শন্দোক্লবা গুরু খাইদেম হেমন্তকুমার সিংহনি।
গুরু য়াইখোম হেমন্তকুমার
হায়রিবা পুন্সীনা মালেমদা হেক খোঙদারকপদগী মৈতৈ পুঙ, জগোই, ঈশৈনা য়োমদুনা লাক্লবা থোইদোক হেন্দোক্লবা আর্টিষ্ট অসিগা দি কালচারেল ৱার্কাস এন্ড এক্টিবিষ্ট ফোরাম মণিপুর (ক্বাফ মণিপুর), মণিপুরগী কালচারেল অর্গানাইজেশনশিংগী এপেক্স বোডি অমা ওইরিবা অসিনা পেন্ডেমিক অসিগা মরি লৈননা ভার্চুয়েল প্লেটফোর্ম অমদা শিনবা কালচারগী আইকোন ওইনা লৈরবা মীওই কয়া উনবগী থৌরম ‘ক্বাফ এক্সপ্রেসন’ গী থৌরমদা উনখি। থৌরম অসিগী ২৩শুবা সিরিজ ‘মিট দি ক্রিয়েটিব পিপল’ য়াইখোম হেমন্তগা পুং ২ হেন্না ৱারী ৱাতাই চত্থখি। মণিপুরগী ঈশৈ নোংমাইগী অচৌবা সংস্থান অমা ওইরিবা রিদমস অব মণিপুরগী আরকে সনাতোম্বা ক্বাফ মণিপুরগী জেনারেল সেক্রেটারিসু ওইরিনা ৱারী ৱাতাইগী মরু ওইবা থৌদাং লৌদুনা প্রোফেসার য়াইখোম হেমন্তগী কলাগী খোঙচৎ অদু মরিক চুম্না ভার্চুয়েল অডিয়েন্সশিংদা পাউদমখি।
প্রোফেসার য়াইখোম হেমন্তকুমার হৌজিক হৌজিক দিপার্টমেন্ট অব রবিন্দ্র সঙ্গীত, ডান্স এন্ড ড্রামা সঙ্গীত ভবন, বিশ্বভারতী, শান্তিনিকেতনদা মণিপুরি ডান্সকী সিনিয়র প্রোফেসার ওইনা লৈরি। হায়রিবা বিশ্বভারতী য়ুনিভার্সিটি অসিগী রবিন্দ্র সঙ্গীৎ, ডান্স এন্ড ড্রামা, সঙ্গীত ভবন অসিগী হেড অব দিপার্টমেন্টসু ওইরম্মী। মহাক অসি ওয়েষ্ট বেঙ্গল ডান্স গ্রুপ ফেডারেশনগী মেম্বারসু ওইরি। কালচারেল রিসার্চ সেন্টার মণিপুর, ইম্ফালগীসু মেম্বার ওইরি। গুরু হেমন্তকুমার ইন্দিয়াগী তোঙান তোঙানবা য়ুনিভার্সিটিশিং অমসুং কালচারেল ইন্সটিট্যুশনশিং ইন্দিয়াগী মপানগী কয়াগীসু মণিপুরি জগোইগী মরু ওইবা মীশক অমসু ওইরি। হায়রিবা ইন্দিয়াগী তোঙান তোঙানবা অমদি মালেমগী মফম কয়া অসিদা লেকচার, ডেমোন্সট্রেসন, মাষ্টারক্লাস কয়া পীখ্রে অমসুং লেপ্তনসু পীরি।
গুরু হেমন্তকুমার তোঙান তোঙানবা ডান্স পার্ফোমেন্স কয়া অমা কোরিওগ্রাফার অমসুং কম্পোজ তৌখ্রে। মহাক্না কোরিওগ্রাফার তৌখিবা ডান্স ড্রামা খরা পনবা য়াবদি, রবিন্দ্রনাথ টেগোরগী ডান্স ড্রামা চিত্রাঙ্গদা, চন্দ্রালিকা, ভানুসিংহ পদাবলি পনবা য়াই। তশেংনা গুরু হেমন্তকুমার মণিপুরি জগোইগী চোকথবা লৈতবা মালেমগী থাক্কী শক্নাইবা অমনি। মণিপুরী ডান্সকী শক্নাইবা ডান্সার ময়াম অমসু মহাক্না পুথোকখ্রে। মহাক্না মপুংফাবা মণিপুরী ডান্সকী মহৈরোইশিং মণিপুর অমদি ইন্দিয়াদা পুথোকপদা নত্তনা জাপান, কোরিয়া, বাংলাদেশ, শ্রীলঙ্কা অসিনাচিংবদা য়াম্না পুথোকখ্রে। মসিগা লোয়ননা মহাক্কী অচৌবা পুঙলোন ভঙ্গী পরেং মঙাগী অমসুং রিদমস অব মণিপুর ডান্স অসিনি।
বাংলাদেশতা গুরু য়াইখোম হেমন্তকুমারবু তরাম্না ওকপগী থৌরম অমা
গুরু য়াইখোম হেমন্তকুমার ১৯৬০ দা ইম্ফাল ইষ্টকী খুরাই চীঙ্গাংবম লৈকাইদা পুন্সী খোঙদারকই। অপোকপনা মতম অমগী থবক্তগী পোত্থারবা স্কুল হেড মাষ্টার য়াইখোম নন্দোসিংহ, অপোকপীনা নোঙ্গ্রাখ্রবী য়াইখোম মনিশং দেবীনি। মহাক্কী পুঙগী গুরু খরা পনবা য়াবদি, সিঐচ কুলবিধু, ৱাই নন্দি, ৱাই সেখো, তখেলময়ুম ইবোচৌ, সোরোখাইবম নরান, ষনসেনবা (গোষ্ঠলীলা) দা মধুমঙ্গোল শাদুনা শরুক য়াবা হৌরকখি। ১৯৭৩ দা জহরলাল নেহেরু মণিপুর ডান্স একাডেমিনা মহাক্কী কলাগী মহৈ তম্বা হৌরকখি। মহাক একাডেমি অসিদগী পোষ্ট গ্রেজুয়েট ডিপ্লোমা মণিপুরী রাসতা ১৯৮০ গুরু থিয়াম তরুনকুমারদগী সোলো ডান্সকী অখন্নবা ট্রেনিং, ১৯৮৪ দা এময়ুদগী গ্রেজুয়েট লোইশিনখি। চহী অসিমক্তদা গুরু আরকে সিংহজিৎকী মখাদা ত্রিবেনি কলা শঙ্গম দিল্লিদা য়াওদুনা ক্রিয়েটিব কোরিওগ্রাফি ১৯৮৭ তা লোইশিনখি। মদুদগী মনিপুরদা অমুক হল্লক্তুনা কোরিওগ্রাফার, ডান্স ডিরেক্টর অমা ওইনা পার্ফোমিং আর্টিষ্ট সেন্টার অমসুং সঙ্গীত কলা শঙ্গম ইম্ফালদা থৌ পুখি। লোয়ননা ১৯৯৩ দগী বিশ্ব ভারতী য়ুনিভার্সিটিদা মণিপুরী জগোইগী এসিষ্টেন্ট প্রোফেসার ওইনা চংখি।
ক্বাফ এক্সপ্রেসন’ গী থৌরমদা গুরু য়াইখোম হেমন্তকুমার
গুরু হেমন্তকুমারনা মণিপুরী জগোই, ঈশৈ পুঙদা লিশাংশিৎনা তৌরকপা খুদোলবু শকখঙবা ওইনা এৱার্দ, ওনার, ফেলোশিপ, স্কোলারশিপ খরা পল্লবদা মণিপুর ষ্টেট কলা একাডেমি এৱার্দ ২০১৮, গুরু নদিয়া মেমোরিয়েল এৱার্দ ২০১৭, দেবদাসী নেশনেল এৱার্দ ২০১৫, গুরু তরুনকুমার মেমোরিয়েল গোল্ড মেডেল এৱার্দ ২০১৪, নেশনেল জুনিয়ার ফেলোশিপ ১৯৯৮, মণিপুর ষ্টেট কলা একাডেমি স্কোলারশিপ এৱার্দ ১৯৪৫, নেশনেল স্কোলারশিপ ১৯৮১, গুরু সোবিতা মেহতা গোল্ড মেডেল এৱার্দ ১৯৭৯ অসিনচিংবশিং পনবা য়াই।
অসুম্না ক্বাফ এক্সপ্রেসনগী থৌরম অদুদা গুরু হেমন্তনা য়াম্না মণিপুরী জগোইদা নুংনাংবা অমা ফোঙদোকখিবদি মণিপুরী জগোইদা মহৌশাগী থোৎ মেঙবা য়াম্না ফিলোসোফিকেল ওইবা মরমচৎ অসি মতমগী মতুংইন্না খোঞ্জেল য়াঙখৎলকপগুম ফুজিল্লকপা খোঙচৎ, শাথেক য়েংনরকপা অসিনি হায়না থমখি। মসি তশেংনমক ঐখোয়না য়াম্না চেকশিন্নিংই। মণিপুরী জগোইদা স্পিড হেনগৎলক্নবদি মণিপুরী জগোইগী ফজবা লাইনিংগী ওইবা ফিলোসোফিকেল ওইবা ঐখোয়গী ফজরোল পুম্নমক মাঙখিগদৌরিবনি।
0 কমেন্ট:
কমেন্ট তৌবিয়ু