• 771
• ২৩শে জানুয়ারী ২০২২ ইং
• Share on:

তখেন্দা মৈতৈগী খ্বাইদগী অরিবা উমংলাই ইবুধৌ পাখঙবগী লাই হরাওবা — আর. কে তরুনজিৎ

অসুম্না তখেনগী মৈতৈ মহারাণীশিংগী থৌদাং কয়ানা মৈতৈনা লাৎপা লাইফম কয়া ঙসিসু লৈঙাক্কী থৌশীল মখাদা ইরাৎ থৌনি লেপ্তনা চত্থরি। আওলীগী ইবুধৌ পাখঙবা অমসুং অভয়নগরগী পুথিবদা নত্তনা আগরতলা শহর অমসুং থংনবা মৈতৈ খুলশিংদা মৈতৈশিংনা ইরাৎলিবা উমং লাইশিংগী মনুংদা বামুটিয়াদা লৈবা লিকমান খুমনগী (তালতলা) ‘পান্থোইবী ইমা’ বাজালঘাটকী ‘লমদেন লাইরেম্বী’ অদুগা জিরানীয়াদা লৈবা তৌরৌ (নলগরিয়া) গী ‘মোইরাং পোকপা’ (শাগৈনা লাৎপা) উমং লাই অসিনচিংবা পনবা য়াই। অসুম্না নিংথৌরোল হাক্তক্তগী উমংলাই কয়া ঙসিসু ইরাৎ থৌনি চত্থরি। বামুটিয়া মনুং চন্না লৈবা বাজালগাট মৈতৈ খুঙ্গংদা লৈবা লমদেন লাইরেম্বীসু হন্দক চহী লাই হরাওগনি হায়রি।

আর. কে তরুনজিৎ

চহী কয়ারোম লেপ্পুরবা মতুং আওলীগী ইবুধৌ পাখঙবা লাই হরাওবা থৌরম হয়েং জানুয়ারি তাং ২১ দগী নুমিৎ হুম্নি চুপ্না পাঙথোক্লগনি। চৎখিবা চহী ২০২১ দগী থংন থংননা লাই হরাওবা থৌরম অসি হন্দকস মণিপুরগী উকলগী মতেং লৌরগা লাই হরাউগনি হায়রি।

নীংশিংবা য়াবদি ইং ১৯৪৯ দা নিংথৌ পানবা ত্রিপুরাদা ভারত্তা তিনখ্রবা মতুং মৈতৈ লাইফম কয়াসু ভারত সকারান লৌশিন্দুনা এগ্রিমেন্ট মতুং ইন্না ডিষ্ট্রিক্ট ম্যাজিষ্ট্রেটকী থৌশীল মখাদা লাইফম কয়া মৈতৈ পুজারী হাপ্তুনা ইরাৎ থৌনি ঙসিসু লেপ্তনা চত্থরক্লি। লাইফমশিং অদুগী পুজারীশিংবু সরকারনা মতিকচানা ওনারিয়াম পীদুনা লাক্লি। আগরতলা ম্যুনিসিপাল কর্পোরেশনগী মনুং চন্না লৈবা মৈতৈ অমসুং মৈতৈ বামোনশিংনা ইনাৎ থৌনি চত্থরিবা লাইফমশিং অদুগী মনুংদা রাধানরগী শ্রীশ্রী রাধামাধব দেবতা বাড়ী, অভয়নগরগী পুথিবা দেবতা বাড়ী, আওলী অনন্ত পাখঙবা দেবতা বাড়ী, অৱাং ধলেশ্বরগী শ্রীশ্রী লক্ষী নারায়ণ দেবতা মন্দির অমসুং নলগড়িয়াদা লৈবা শ্রীশ্রী রাধামাধব জীউ মন্দির পনবা য়াই। হায়রিবা লাইফমশিং অসি মৈতৈ নিঙোল মহারাণীশিংগী অপাম্বা মতুং ইন্না তখেন নিংথৌশিংনা লিংখৎলম্বনি।

অভয়নগরগী ইবুধৌ পুথিবা লাই হরাওবা থৌরম

অদুগা নিংথৌরোল হাক্তক্তগী ঙসিসু মৈতৈনা ইরাৎ থৌনি চত্থদুনা লাকপা উমং লাইশিংগী মনুংদা আগরতলা ওল্ড মটর ষ্ট্যান্ড মনাক্তা লৈবা আওলীগী ইবুধৌ অনন্ত পাখঙবা দেবতা বাড়ী খ্বাইদগী অরিবা য়াম্না মগুণ চেল্লবা লাইফম অমনি। তখেন নিংথৌ মহারাজ বীরচন্দ্র মানিক্য বাহাদুরগী (১৮৬২-৯৬) অনীশুবা মহারাণী তোনজম লৈমা রাজেশ্বরী দেবীনা মাগী মচা নুপা যুবরাজ রাধাকিশোরগী নিংথৌফম ফংবগী নিজবা ওইনা মৈতৈ অহল লমনশিংগী পাউতাক মতুং ইন্না ইবুধৌ পাখঙবগী খুভম অসি লিংখৎখি। যুবরাজ রাধাকিশোরনা নিংথৌ ফম ফংবসি ইবুধৌ পাখংবগী থৌজালননি হায়না ময়ামগী থাজবা অমা লৈখিবদগী রাধাকিশোর পোকপা ‘ইরাই’ নুমিৎ অসি পাখংবগী লাইথোঙ হাংবা নুমিৎ ঙসিসু অদুম লেপ্তনা চয়োলগী ইরাই নুমিৎতা লাইথোঙ হাংই। পীথ্রাইনা হৈরগা শাবা পাখঙবা অমসুং লাইরেম্বী মুর্ত্তি অনি অসি ইরাই খুদিং ইরাৎ পুজা চত্থবা হৌখি। মচা নুপা অহল যুবরাজ রাধা কিশোর মানিক্য বাহাদুরনা (১৮৯৬-১৯০৯) নিংথৌফম ফংলবা মতুংদা মহাক্কী মমৌ মহারাণী নিংথেম চনু (মৈতৈনা ‘ঢাকা লৈমা’ নত্রগা ‘কপোকলৈ’ হায়রগা খঙনবা) রত্নমঞ্জুরী দেবীনা ইংকুমজা ১৯১৬ দা চেকনা হৌজিক্কী পাখঙবগী শঙলেন অসি শাখি। অদুগা মহারাণীগী য়াথং মতুং ইন্না রাজকুমার বুদ্ধিমন্ত সিংহনা ইবুধৌ পাখঙবা অমসুং লাইরেম্বীগী পীথ্রাইগী মাইথোঙদু উহক্তা তপশিল্লগা শক্তাম কায়াৎ অদু শাখিবনি হায়রি। পাখঙবা মন্দিরদা শউনগুম্বা অমাংবা পোৎ পুশিনবা য়াদে। ‘অনন্ত’ হায়বসি লীনগী নিংথৌবু (কিং অব স্নেকস) কৌই। অদুনা মণিপুরগী অকোয়বদা লীন হাৎপা য়াদে অসিনচিংবা মগুণ লৈবা লাইফমসিগী নাৎকী চৎন পথাপ কয়া ঙসিসু ঙাক্তুনা চৎলি। চয়োলগী ইরাই খুদিং ইবুধৌ লাইথোঙ হাংদুনা ইরাৎ থৌনি চত্থৈ, মাইবী লাই তোংই। চহীগী চাকলোন উৎসবসু তৌই।

 অভয়নগরগী পুথিবা দেবতা বাড়ী

ইবুধৌ পাখঙবগী অহানবা লাই সেবা তৌরম্বা হাওবম খারৌ মাইবী, পেনা খোংবা কাঙজম তাম্র সিংহ, ভানু মাইবী নচিংবা য়াওদুনা লাই হরাওরম্মী। বামুটিয়া পরগনা মনুং চন্না লৈবা বাজালঘাট মৈতৈ খুঙ্গংদা লৈবা লমদেন লাইরেম্বী শঙ্গায়সু মহারাণী রত্নমঞ্জুরীনা জিংঘনা মন্দির শাবিদুনা লাইথোঙ হাংহন্দুনা মাইবীবু লাইমাঙদা ফমহন্দুনা লাই হরাওহনখি। অসুম্না তখেনগী মৈতৈ মহারাণীশিংগী থৌদাং কয়ানা মৈতৈনা লাৎপা লাইফম কয়া ঙসিসু লৈঙাক্কী থৌশীল মখাদা ইরাৎ থৌনি লেপ্তনা চত্থরি। আওলীগী ইবুধৌ পাখঙবা অমসুং অভয়নগরগী পুথিবদা নত্তনা আগরতলা শহর অমসুং থংনবা মৈতৈ খুলশিংদা মৈতৈশিংনা ইরাৎলিবা উমং লাইশিংগী মনুংদা বামুটিয়াদা লৈবা লিকমান খুমনগী (তালতলা) ‘পান্থোইবী ইমা’ বাজালঘাটকী ‘লমদেন লাইরেম্বী’ অদুগা জিরানীয়াদা লৈবা তৌরৌ (নলগরিয়া) গী ‘মোইরাং পোকপা’ (শাগৈনা লাৎপা) উমং লাই অসিনচিংবা পনবা য়াই। অসুম্না নিংথৌরোল হাক্তক্তগী উমংলাই কয়া ঙসিসু ইরাৎ থৌনি চত্থরি। বামুটিয়া মনুং চন্না লৈবা বাজালগাট মৈতৈ খুঙ্গংদা লৈবা লমদেন লাইরেম্বীসু হন্দক চহী লাই হরাওগনি হায়রি।

আগরতলা ওল্ড মটর ষ্ট্যান্ড মনাক্তা লৈবা আওলীগী ইবুধৌ অনন্ত পাখঙবা দেবতা বাড়ী

নিংথৌরোল হাক্তক্তগী আওলীগী ইবুধৌ পাখঙবা লাই সেবা অসি খারৌ মাইবীগী মতুং তাম্র মাইবীনা সেবা তৌদুনা লাকখি। চয়োল খুদিং মাইবী লাই তোংই। তাম্র মাইবী লৈখিদ্রবা মতুং কাছাড়দগী লাক্লগা কাঙজম শ্যামন সিংহনা পুজারী ওইদুনা মতম শাংনা ইবুধৌ পাখঙবগী লাই সেবা তৌদুনা লাকখি। চয়োলগী ইরাই খুদিং লাইথোঙ হাংই। চহীদগী চাকলোনসু কৎলি।

ইবুধৌ পাখংবগী লাইমাঙদা মশা নিক্লগা অমাইবা অমাইবীনা লাইতোংবা মওং মতৌ অদু উরগা ইবুধৌ পাখঙববু মরু ওইনা বেঙ্গলীশিংনা ‘পাগলা দেবতা’ হায়না খল্লম্বা ওইরম্বা য়াই। মখোয়না ইবুধৌ পাখঙববু য়াম্না কীনা শ্রদ্ধা ভক্তিগা লোয়ননা ইরাই খুদিং খুদোলপোৎ পুরক্তুনা ইরাৎ থৌনিদা শরুক য়াদুনা লাক্লি। ঙসিসু মৈতৈদগী মখোয়না হেন্না মশীং য়াম্না শ্রদ্ধা ভক্তি অদু উবা ফংই। ঙসিদি মৈতৈ নত্তবা অতৈনা ইবুধৌ পাখঙববু ‘পাগলা দেবতা’ হায়রগা অদুম খঙনরে। আওলীগী ‘পাগলা দেবতা’ সরকারগী রেকর্ডতা লৈতে। অদুবু মৈতৈদগী হেন্না মশীং য়াম্না বেঙ্গলিগী শ্রদ্ধা ভক্তি লৈবা উবদা ঙসিসু ‘পাগলা দেবতা’ হায়রগা পাক চাওনা ময়াম্না খংনরিবনি। লাইমাংদা অমাইবা অমাইবীনা লাইতোংবা মওং অদু উবদা লমদেন লাইরেম্বী অমসুং পুথিবা লাইবুসু মখোয়না ‘পাগলা’ হায়রগা খঙনবা ওইরম্বা য়াই। অদুবু লমদেন লাইরেম্বীগীদি সরকারগী রেকর্ডতা ‘পাগলা’ হায়বসি পল্লি হায়রি। ইবুধৌ পাখঙবগী চহীগী পোইনুগী অনৌ অপেন চনৌ তংবা চাকলেন উৎসব ঙসিসু চহীগী লেপ্তনা কৎলি অদুবু ঙসিদি মাইবা মাইবীদি লৈত্রে লাইমাঙদা লাইবাওসু ফাওহনবা ঙমদ্রে। লাই হরাওদবা চহী কয়া রোম শুখ্রে। চহী খরগী মমাংদা কাঙজম শ্যাম সিংহনা লৈখিদ্রবা মতুং মাগী মচা নিপাসু ইখং খঙহৌদনা লৈখিদবদগী হৌজিক হৌজিক কাছাড়দগী হৌরকপা সোরাইজম শতীশ চন্দ্র সিংহনা পাখঙবগী লাই সেবা চত্থরি। পাখঙবগী ভক্তদি মৈতৈদগী বেঙ্গলীনা মশীং য়াম্না উবা ফংই। ইরাই খুদিং লাইথোঙ হাংলবসু চহী কয়া লাই হরাওদনা লৈরম্বদু হৌখিবা চহী ২০২১ দগী মণিপুরগী উকলগী মতেং লৌরগা আওলীগী নহারোলশিংনা ইবুধৌ পাখঙবা লাই হরাওহনখি। মৈতৈচাশিংদা ইবুধৌ পাখঙবা লাই নিংবা ভক্ত মশীংসু নোংমা নোংমগী মশীং য়ামখৎলক্লি।