আগরতলা, জুলাই ০৬ : নারান খামার চন্ডিপুরগী শক্নাইরবা সমাজ সেবক খুন্দ্রাকপম ব্রজেন্দ্র সিংহন ইখং খঙহৌদনা লৈখিদবদা খুন্নাইনা থম্মোয় শোক্না অৱাবা অমদি নুংঙাইতবা ফোঙখ্রে। চৎখিবা জুন ২৭ লৈবাকপোকপা সন্ধ্যা পুং ৬.৫০ তাবা মতমদা মশাগী ময়ুম চন্ডিপুর (নারান খামার) দা লৈখিদবনি। চহী ৭১ শুখ্রবা মহাক্না লৈখিদবা মতমদা লোইনবী, মচা নুপা অনী অমসুং মরীমতা কয়াসু থম্মীরম্মী।

মশাগী ওইজবা থিবা খঙদবা মপুন্সি চুপ্পা খুন্নাইগীদমক কত্থোক্তুনা ত্রিপুরা মণিপুরী অপুনবা কমিটিগী প্রেসিডেন্ট আরকে কমলজিৎকী লমজিং মখাদা লুপ অসিগী সেক্রেটারী ওইদুনা ত্রিপুরাদা চোইজাইননা মণিপুরী (মৈতৈ) না তাবা খুঙ্গং খুঙ্গংদা কোইচৎ চৎতুনা য়াইফা থবক থৌরম কয়া পাঙথোকপগা লোয়ননা ইমা লোলনা মহৈ তম্নবগী খোল্লাও অমসুং মণিপুরদগী পুরকপা তম্না লাইরিকশিং খুন মান্ডপতা য়েন্থোক্তুনা ত্রিপুরাদা মণিপুরী লোলনা লাইরিক তম্বা হৌদোকপা, খুঙ্গং খুঙ্গংদা পেট্রিয়টস ডে (১৩ আগস্ট) পাঙথোকপা নচিংবা থৌদাং চাওনা লৌদুনা লাকখি।

ইমা লোলনা ফোঙবা ‘মরূপ’ পাউচে মণিপুরী খুঙ্গং খুঙ্গংদা য়ৌহন্নবা হোৎনবদা চাওনা থৌদাংসু লৌরম্মী। মহাক্না তৌরম্বা থবক থৌরম কয়াগী মনুংদা খ্বাইদগী শীংথাবা য়াবা অদুদা মণিপুরী অপুনবা কমিটিনা শেম্বা লোন্দানবা কমিটি ২২ গী মনুংদা নারান খামারগী প্রেসিডেন্ট লাংগোনজম কানু সিংহগী লমজিং মখাদা ইং ১৯৮১ দা নারান খামারদা মণিপুরী মী মশীং (সেন্সাস) থিবগী থবক তৌখিবদুনি। 

তোঙান তোঙনাবা খুঙ্গংশিংদা লোন্দানবা কমিটিশিংনা মণিপুরী খক্তগী ওইবা সেন্সাসকী থবক মায় পাক্না পাঙথোক্লম্মী। ইং ১৯৮১গী মতমদুদা ত্রিপুরাদা মণিপুরী মশীং ২০,৪৭,৩৫১ নি হায়না রিপোর্টতা খঙবা ঙমখি। য়াম্না ৱানা পুথোকখিবা ত্রিপুরাদা পুৱারীদা মশক থোকপা থৌদাং অমা মণিপুরী সেন্সাস ঙসিসু ময়অম্না শোন্নরি, শীংথানরি, থাগৎনরি।

অদুবু মখা তানা ঙসি ফাওবা অতৈ লুপ অমত্তনা মপুং ফাবা মণিপুরী সেন্সাস পুথোকপা ঙম্নদ্রি। হায়রিবা সেন্সাস পুথোকপদা থৌদাং লৌরম্বশিংগী মনুংদা লৈখিদ্রবা কেএইচ ব্রজেন্দ্র সিংহ অথোয়বনি। খুন্নাইগীদমক কত্থোকপা ঙম্বা মহাকগুম্বা সমাজ সেবক ঙসিগী মতমসিদা য়াম্না অতাংবনি হায়না মরূপ পাউচেগী জয়েন্ট ইডিটর আরকে তরুনজিৎনা লৈখিদ্রবা মহাক্কী আত্মা শান্তিগী দমক ঈশ্বরগী মফমদা থৌনিজখি।

সোর্স: মরূপ