ইমালোলবু কন্ননবা মণিপুরী লোলবু স্কুলদা সাবজেক্ট অমা ওইনা লৌবীয়ু
আগরতলা, মে ১৭ : মণিপুরগী স্কুলশিংদা ইমালোল মণিপুরী অসি মহৈরোইশিংনা তম্বগী চাং নোংমা নোংমগী মশীং হন্থরক্লি। মুৎত্থরক্লিবা লোল অসিগী মরাইবক তুংদা শাথিবা মওংদা লাক্কদৌরি। লোল অসিবু কঞ্জনবগীদমক মণিপুরদা সি.বি.এস.ই. বোসেম অমসুং কোসেমগী মখাদা লৈবা স্কুলশিংগী মহৈরোইশিংনা মণিপুরী অসি সাবজেক্ট অমা ওইনা শোয়দনা তম্ননবা ফীরেপ লৌবীয়ু হায়না ইন্টারনেশনেল য়ুথ সেন্টর মণিপুরগী কো-অর্ডিনেটর টি পারিজাতনা চেরোল অমদা হায়রি।
হন্দক্কী ২০২৩-২৪ গী একাডেমিক সেসন্দা পরীক্ষা থাখিবা সিবিএসই স্কুলদা মহৈরোই লিশিং ১৪ গী মনুঙদা মণিপুরী সাবজেক্ট লৌবা মহৈরোই ক্লাস টেন্দা লিশিং ২,৭৩১ অদুগা ক্লাস টুয়েল্বতনা শুপ্নগী ৭৮৩ খক্তনি হায়রি। বোসেমদা অপুনবা মণিপুরী সাবজেক্ট লৌবা মহৈরোই মশীং ২২,৪৪৩ অদুগা কোসেমদা মহৈরোই মশীং ২১,২১৫ লৈরবসু সি.বি.এস.ই স্কুলশিংদদি মণিপুরী সাবজেক্ট লৌবা মহৈরোই মশীং অসি য়াম্না শাথিনা হন্থরক্লে হায়রি।
লোল হায়বসি জাতি অমগী হৌরকফম, নাৎ কালচার লৌশিং জ্ঞানগী পুক্কৈ অমদি খুন্নাইগী ওইবা চৎন লোনচৎ নচিংবা পুম্নমক অসি য়াওরিবনি। লোল মাংখিবা তারবদি খুন্নাই ফুরূপসু মুৎখিবা তাবনি। য়ুনেস্কোনা ২০০৯ গী রিপোর্টতা মণিপুরী লোল অসি মুত্থরক্লিবা লোল অমনি হায়না মাংজৌননা লাওথোকখিবা লৈখ্রবনি। পনবা য়াবদি য়ুনেস্কোগী রিপোর্টতা মালেমদা লোল লিশিং ৮,৩২৪ রোম লৈ। চহী অমদা লোল ১০/১০ গী চাংদা মুৎলি। ফুরূপসি মাংখি।
ভারত্তা লোল ১,৬৫২ লৈবদা লোল ৬০০ দি নর্থ ইষ্টতগীনি। অদুনা ঐখোয় ঐখোয়গী লোল, হিস্টোরি, জিওগ্রাফি, লিটারেচর, নাৎ কালচার হৌন-লোনচৎ নচিংবা খঙদ্রবদি ভারতকী ক্রোর ১৪৪ মী মশীংগী ঈপাক্তা ইরাক্নখিদুনা ঐখোয়গী ফুরূপ অসিসু মাংখিবা মুৎখিবা য়াই। ঐখোয়না ঐখোয়গী নাৎ কালচার পুৱারী মশক খঙনবগীদমক ঐখোয়গী লোলবু কঞ্জনবগীদমক মথংগী একাডেমিক সেসন ২০২৪-২৫ দগী মণিপুরী লোল অসি সাবজেক্ট অমা ওইনা শোয়দনা তম্বগী ফিরেপ লৌবীয়ু হায়রি।
সোর্স: মরূপ
0 কমেন্ট:
কমেন্ট তৌবিয়ু