• 584
• ১৮ই মে ২০২৪ ইং
• Share on:

ইউ. সি. এমগা খূৎশম্নরগা ত্রিপুরাদা নর্থইষ্ট কলচরেল এক্সচেঞ্জ প্রোগ্রাম

আগরতলা, মে ১৭ :  হৌরক্লিবা নহারোলশিংগী ৱাখল্লোনদা মশাগী নাৎ কলচর মশক খঙলক্তবা ৱাঙাং শাঙাংদা থকসি খাসি নাইদবা থৌগল্লোন মশক খঙদবা হায়বসি য়াম্ন কীনিঙাইনি। মসিনা মরম ওইদুনা তুংদা মৈতৈ হায়বা খুন্নাই অসিবু অতৈ কাঙলুপ ফুরূপশিংনা ইকাইখুম্নরোই হায়না ইউনাইটেদ কমিটি মণিপুর (ইউ.সি.এম) গী প্রেসিডেন্ট জয়চন্দ্র কোন্থৌজমনা হায়খ্রে।

চৎখিবা মে ১১, ইউ. সি. এমনা পুথিবা ওয়েলফেয়ার কলচরেল সোসাইটি, নোংপোক নিংথৌ পান্থোইবী সোসেল ওর্গানাইজেশনগা খুৎশম্নরগা ধলাই ডিষ্ট্রিক্ট মনুং চনবা কমলপুর কুচাইনালা হায়বা মৈতে খুলদা পাঙথোকখিবা নর্থ-ইষ্ট কলচরেল এক্সচেঞ্জ থৌরমদা চীফ গেষ্ট ওইনা শরুক য়াখিবা জয়চন্দ্রনা ৱাফম অসি ফোঙলদুনা হায়খি, ইপা-ইপু অহল লমনশিং অদুনা থম্বীরম্বা মমল য়াম্লবা নাৎ কালচর অদু ঐখোয়না ঙাক্না য়োকখৎনবা থমদবা য়াদে। মরমদি কলচর য়াওদ্রবা খুন্নাই অদুদি মহাম তারবা খুন্নাইগা পাংথকনি।

মপান মণিপুরদা তাখ্রবা মীতৈশিংনা মীলমদা লৈখিবনা অকোয়বদা লৈরিবা অতৈ ফুরূপ কয়াগী কুহ্মৈশিংদা য়াওবা হায়বসি মহৌশানি অদুবু মদুদা পুংলুপ লুপশিন্দুনা ঐখোয়গী নাৎ কলচর থাদোকপা হায়বসি তৌহৈদবা থবকনি। কলচর য়াওদ্রবা খুন্নাই অদুদি মশাগী হৌরকফম ফাওবা খঙলক্তবগী মরম ওইরক্লি। অদুনা তানফম অদু য়ৌদ্রিঙৈদা ঐখোয়না ঐখোয়গী খুন্নাই অসি কলহৌসি হায়না মহাক্না ফোঙদোকখি।

পান্থোইবী ওর্গানাইজেশনগী প্রেসিডেন্ট থোকচোম ধনসিংহনা থৌরম অদুদা ময়াই তাংবল লৌখি। থৌরম অদুদা গেষ্ট অব অনার ওইনা ইউ. সি. এমগী ভাইস প্রেসিডেন্ট ৱাই. কে. ধীরেন, নর্থ ইষ্ট কলচরেল এক্সচেঞ্জ ফেষ্টিভেলগী কনভেনর ওইরিবা কেএইচ ধনজিৎ, ইউ. সি. এম জেনারেল সেক্রেটারী ডব্লিউ সেকেন্ট নচিংবা শরুক য়াখি হায়রি।

সোর্স: মরূপ