• 1149
• ২৪শে এপ্রিল ২০২২ ইং
• Share on:

হৈস্নাম বসন্তকুমার এৱার্দ নাওরোইবম ইন্দ্রমনিদা খুৎশিন্নখ্রে

ইম্ফাল, এপ্রিল ২৩ : ৱার্ল্ড বুক দে ২০২২গা মরী লৈননা সাহিত্য থৌপাং লূপ (শাথৌ লূপ) না শীন্দুনা হৈস্নাম বসন্তকুমার এৱার্দ লান্থোকপগী থৌরম অমা ঙসি কৈশাম্পাৎতা লৈবা দিরেক্টোরেট ওব ইনফোর্মেসন এন্দ পাব্লিক রিলেসন্সকী ওদিটোরিয়ামদা পাঙথোকখ্রে।

ঙসি পাঙথোকখিবা থৌরম অদুগা মরী লৈননা লৈখিদ্রবা হৈস্নাম বসন্তকুমারগী মিংদা মহাক্কী মচানুপা হৈস্নাম বালকৃষ্ণ, দিরেক্টর আইপিআর গভর্ণমেন্ট ওব মণিপুর অমদি মহাক্কী ইমুং-মনুংনা কৎপা হৈস্নাম বসন্তকুমার এৱার্দ ২০২২ গী মনা মমিং লৈরবা অইবা নাওরোইবম ইন্দ্রমনিদা খুৎশিন্নখ্রে। মনা অদুদা শেল ওইনা লুপা লিশিং ১০, সাইটেসন অমা অমদি সোল অমা য়াওরি।

থৌরম অদুদা কাংজম রাধাকুমার, রিটায়ার্দ আই এ. এস. প্রেসিডেন্ট মণিপুর কালচারেল কাউন্সীলনা অথোইবা মীথুংলেন; লৈকোলগী প্রেসিডেন্ট ক্ষেত্রিময়ুম সুবদনিনা থৌরম মপু অমদি মনা ফংলিবা নাওরোইবম ইন্দ্রমনিনা অখন্নবা লেংবীরকপা ওইনা শরুক য়াখি।

অথোইবা মীথুংলেনগী ৱারোল পীরদুনা কাংজম রাধাকুমারনা হায়খি, হৌজিক হৌজিক মণিপুরগী লৈরিবা লাইরিক-লাইশু হৈরবা মীওইশিংগী মনুংদা মণিপুরী লিটরেচরগী হিষ্ট্রি নৈনবদি মী মশীং পংয়াম য়াম্লগনি হায়বা থাজদে। লমদম অসিদা হিন্দুইজমগী অকনবা শাফু লাক্ত্রিঙৈগী মমাঙদা ইরম্বা লাইরিকশিং ঙসিগী মীরোলনা কাউথোকখ্রে। মরম অদুনা লমদম অসিগী ফজবা মশক অমা ওইহন্নবগীদমক হৌখিবা মতমদা ইরম্বা লাইরিকশিং পাদুনা নৈনবা মথৌ তাই।

অমরোমদা, হৌজিক মতমগী অঙাংশিংনা লাইরিক পাবগী হৈনবী অসি নোংম-নোংমগী হন্থরক্লি। টেক্নোলোজিগী লমদা চাউখৎপা হেনগৎলকপনা টেক্সবুক্তা লাইরিক পাবগী চাং হন্থরকপনি। মালেম অসি হৌজিক্তি খুবাম্নুংদা লৈবগুম্না টেক্নোলোজিনা খলহল্লি। হৌজিক্তি ঈ-বুক অমসুং ঈ-লাইব্রেরীগী মতম ওইবনা মমিং লৈরবা লদমদ অসিগী অইবশিংনা ইদুনা থম্লম্বা লাইরিকশিং আপলোড তৌবা মথৌ তারে হায়খি।

ঙসিগী থৌরম অদুগা মরী লৈননা ফুরাইলাৎপম নন্দকুমারনা শেম্বা মাল্টি লেঙ্গুয়েজ (ইংলিশ-জাপানিজ-মণিপুরী) দিক্সনারি অমসুং ফোঙখি। ঙসি ফোঙলিবা দিক্সনারি অসিনা হৌগৎলক্লিবা মহৈরোয়শিংদা চাউনা কান্নবা পীরগনি হায়না থৌরমদুদা তীনখিবা দেজ মেম্বারশিংনা ফোঙদোক্নখি। অমরোমদা, মণিপুর লাইব্রেরী এসোসিয়েসন (মালা)না শীন্দুনা ষ্টেট সেন্ট্রেল লাইব্রেরী রিডিং হোলদা ৱার্ল্ড বুক দেগী থৌরম পাঙথোকখ্রে। থৌরম অদুদা মণিপুর য়ুনিভার্সিটি ওব কালচারগী লাইব্রেরিয়ান থৌনাওজম খোমদোননা চেঞ্জিং সিনারিও ওব লাইব্রেরী টুদে হায়বা টোপিক অসিদা ৱা ঙাংখি। মহাক্না মালেমদা হোংলক্লিবা লাইব্রেরীগী মরমদা তীল্লিবা মীয়ামদা শুগায়না খঙহনখি হায়না মালাগী জেনারেল সেক্রেটারি আর কে উর্মিলানা থাদোরকপা চেরোল অমনা হায়রি।

সোর্স: হুইয়েন লানপাউ