শক্নাইরবা অইবশিংগী লাইরিক ৯ ফোঙখ্রে
ইম্ফাল, দিসেম্বর ১৬ : স্তেত সেন্ত্রেল লাইব্রেরি ইম্ফাল অমসুং দিপার্তমেন্ত ওব আর্ত এন্দ কালচার, গবর্ণমেন্ত ওব মণিপুরনা রাজা রাম মোহন রোই লাইব্রেরি ফাউন্দেসন, কোলকাতাগা খূৎশম্নদুনা নুমিৎ ৭ নি চূপ্না চত্থগদবা ৩৯ শুবা ‘ইম্ফাল বুক ফেয়ার-২০২৩’ গী ঙসি নীনি চনবা নুমিৎতা লমদমসিগী শক্নাইরবা অইবশিংনা ইবা লাইরিক ৯ পূন্না ফোঙখ্রে।
কৈশাম্পাৎতা লৈবা সেন্ত্রেল লাইব্রেরি এন্দ মণিপুর স্তেত আর্কাইবস কমপ্লেক্স ইম্ফালদা পাঙথোকখিবা লাইরিক ৯ অসি ফোঙবগী থৌরম অদুদা সাহিত্য একাদেমী এৱার্দি সরতচান্দ থিয়াম্না প্রিসাইদ তৌখি।
ঙসি ফোঙখিবা লাইরিকশিং অদুদি কমল তোইজাম্বনা ইবা ‘দ মৈতৈজ ওব চুরাচান্দপুর’, নোংথোম্বম কুঞ্জমোহোননা ইবা ‘নীংশিংলি হৌখ্রবা মতমদো’, ই শ্যামকিশোর অমদি তি রানাচন্দ্রনা ইবা ‘লঘূজাতম’, দাঃ এন দেবেন্দ্র অমসুং দাঃ এন খেরপ্রিয়ানা ইবা ‘পন্দিত এন খেলচন্দ্র সিংহগী চেফোঙশিংদগী খোমজিনবা ৱারেংশিং’, সিদেস্বর ক্ষেত্রিনা ইবা লাইরিক ৪ মথংশীৎনা ‘হৌ’, ‘শায়োন, ‘ইমা’ অমসুং ‘ইবেমনি খোংজোম পর্ব শকপীগী লৈরেন’ লোয়ননা এন শ্রেথ চোংথামনা ইবা ‘পাবা তারা’ হায়রিবা লাইরিক ৯ অসিনি।
মরকসিদা, সাহিত্য একাদেমিগী মখাদা রাজ কুমার ভুবনস্না না মণিপুরীদা হন্দোকপা ‘শৈরেংগা মথোৎ কারকপশিংগা’ হায়না মিংথোনবা লাইরিক অমা থা অসিগী ২৫ গী নুংথিল পূং ১ দা মণিপুর হিন্দী পরিষদ, ইম্ফালদা ফোঙগদৌরি। লাইরিক ফোঙবগী থৌরমদা মণিপুরী লেঙ্গুয়েজ এদভাইজরী বোর্দকী কনভেনর, প্রোঃ রাজেন তোইজাম্বনা অথোয়বা মীথুং, শক্নাইরবা স্কোলার, এনজি ইবোতোন সিংহনা অখন্নবা মীথুং অমসুং মণিপুরী লিতরেরী সোসাইতি, ইম্ফালগী প্রেসিদেন্ট, নোংমাইথেম কিরন কুমার সিংহনা থৌরম মপু ওইগনি। অদুগা মণিপুর কলেজগী এসোসিয়েত প্রোফেসার, পি বিপ্রচান্দনা ফোঙগদৌরিবা লাইরিক অসিগী মরমদা ৱা ঙাঙগনি।
সোর্স: পোক্নফম
0 কমেন্ট:
কমেন্ট তৌবিয়ু