• 809
• ২৯শে অক্টোবর ২০২২ ইং
• Share on:

মিনিস্তর সুসিন্দ্রো অমসুং এমপি লৈশেম্বনা বাংলাদেশতা খুন্দারিবা মৈতৈ নিঙোলশিং চাক্কৌখ্রে

ইম্ফাল, অক্টোবর ২৮ : কেফ এন্দ পি দি মিনিস্তর এল সুসিন্দ্রো মৈতৈ অমসুং রাজ্য সভাগী এম পি মহারাজ সনাজাওবা লৈশেম্বনা বাংলাদেশতা খুন্দারিবা মৈতৈ নিঙোলশিং ঙরাং বাংলাদেশকী তেতইগাঁও আদমপুরদা লৈবা মণিপুরী কালচারেল কমপ্লেক্সতা চাক্কৌখ্রে।

মিনিস্তর এল সুসিন্দ্রো মৈতৈগী মীৎয়েং মখাদা মণিপুরী কালচারেল কমপ্লেক্স বাংলাদেশ, মণিপুরী য়ুথ ফোরাম বাংলাদেশ অমসুং পেত্রিওটিক রাইটার্স ফোরাম মণিপুরনা শীন্দুনা পাঙথোকখিবা চাক্কৌবগী থৌরম অদুদা মফম অদুদা খুন্দারিবা মৈতৈ নিঙোলশিংগা পিবাশিংগা চাক্লেন অমা চামিন্নবগী লোয়ননা নিঙোলশিংদা লমদম অসিগী ইয়োংদা শাবা ফি দক্ষিনা ওইনা খুদোল তমখি।

থৌরম অদুদা মিনিস্তর এল সুসিন্দ্রোনা চীফ গেস্তকী ৱারোল পীরদুনা হায়, মৈতৈ ইচিল ইনাওশিংনা বাংলাদেশতা খুন্দাখ্রিবা অসিগী নুংশিবা ৱারী লৈ অমদি মদু ঐখোয়না কাউফম থোক্তে। মফম অসিদা খুন্দাখিবা মৈতৈ ইচিল-ইনাওশিং অদুনা মণিপুর কনবীরম্বনি হায়বসি কাউবা য়ারোই। ‘মণিপুরগী চীফ মিনিস্তর এন বীরেন সিংহনা ঙসিদি মণিপুরগী ৱাংমদা চোইনা খুন্দাখ্রবা মৈতৈশিংগী খোঙ্গুল লীদুনা অমদি মখোয়গা উনদুনা অৱা-নুংঙাই তানমিন্ননবা মফম অসিদা থারকপনি’ হায়না মিনিস্তার সুসিন্দ্রোন পাঙদমখি।

মহাক্না হায়, বাংলাদেশতা খুন্দারিবা মৈতৈশিং অসি মশীং য়ামদবনা মাইনোরিতি ওই হায়দুনা পূক্নিং হন্থফম থোক্তে, অমত্তা ওইনা পূনশিন্দুনা ৱাখল্লোন অমদি লিংজেল মান্ননা লেপ্পা মথৌ তাই। নিঙোল চাক্কৌবা অসি মীওইবা খুন্নাইনা লৈরিমখৈ লৈহৌরগদবা কুহ্মৈ অমনি। মফম অসিদা কুহ্মৈ অসি পাঙথোকপগা লোয়ননা বাংলাদেশ অমদি মণিপুরদা লৈরিবা মৈতৈশিংগী মরক্তা ৱাখল্লোন একচেঞ্জ তৌবগী খুদোংচাবা অমদি থৌরম অসিনা পীরি। মৈতৈশিংনা ঐখোয়গী চৎনবী অসি মতম চুপ্পদা ঙাক্তুনা থমসি হায়না মিনিস্তার সুসিন্দ্রোনা ফোঙদোকখি।

স্পিসিয়েল গেস্ত ওইনা শরুক য়াখিবা এমপি মহারাজ সনাজাওবা লৈশেম্বনা হায়খি, ‘মফম অসিদা খুন্দামিন্নরিবা মৈতৈশিংনা ইপা-ইপুনা চৎনরম্বা ঐখোয়গী চৎনবীবু কায়হন্দনা য়োকখৎনা অমদি হিংহন্দুনা থম্লম্বা অসি অপেনবা পোকই।’ নিঙোল চাক্কৌবা কুহ্মৈ অসিগী ফজখ্রবা মশক অসিদা ঐখোয় অহেনবা হাপচিল্লোইসি। মবুং-মৌপ্বা ওইবগী নুংশিনবগী মরী অসি হেন্না চেৎশিলহন্নবা কুহ্মৈ অসিদা দক্ষিনাদা হিদান্নরকপা অমদি অহেনবা কয়া হাপ্নবা হোৎনরকপা অসিনা কুহ্মৈ অসি লাকপাদা শেন্থোক ৱাৎপা মবুং-মৌপ্বা কয়াদি মিপাইবা য়াওদবা নত্তে। দক্ষিনানা মরম ওইরগা চাক্কৌবগী ফজবা অসি মাঙহল্লোইসি হায়না লৈশেম্বা ফোঙদোকখি।

থৌরম অদুদা পিপলস রিপাব্লিক ওব বাংলাদেশকী এডিশনেল সেক্রেটারি ওইরম্বা কোংখাম নিলমনি সিংহ, এম সি সি বাংলাদেশকী প্রেসিদেন্ট এল জয়ন্ত সিংহ, পেত্রিওটিক রাইটার্স ফোরাম মণিপুরগী প্রেসিদেন্ত নাওরোইবম খম্বা লুৱাং, এম ৱাই এফ বাংলাদেমখী প্রেসিদেন্ত হিজম সুশিলনা গেস্ত ওব ওনারশিং ওইনা শরুক য়াখি।

মিনিস্তর সুসিন্দ্রো অমসুং এম পি সনাজাওবা লৈশেম্বগী বাংলাদেশ খোঙচৎ অদুদা বাংলাদেশকী আদমপুর কোনাগাওদা লৈবা ইমা উজাও লাইরেম্বী খুরুমখিবগা লোয়ননা লাই কমিটিগা উনদুনা চহী অসিগী ইমা উজাও লাইরেম্বীগী কুমজা হরাওবগী মতেঙ ওইনবা মিনিস্তর সুসিন্দ্রোনা লুপা লীশীং কুন মতেঙ পীখি। লুচিংবা অনী অসিনা বাংলাদেশকী ঘোড়ামারাদা মণিপুরী বিষ্ণুপ্রিয়াশিংগসু উনখি।

সোর্স: পোক্নফম