বাংলাদেশ অমসুং মণিপুরগী মৈতৈশিংগী অপূনবা এপেক্স বোদি অমা শেমদুনা আইদেন্টিতি অমসুং কালচার ঙাকসি: সুসিন্দ্রো
ইম্ফল, অক্টোবর ২৮
বাংলাদেশতা খুন্দারিবা মৈতৈ অমসুং মণিপুরগী মৈতৈ অনীগী ওইবা অপূনবা এপেক্স বোদি অমা শেমদুনা লমদম অসিগী নিংথৌ পাল্লিঙৈ মতমদগী লৈজরক্লবা কালচার অমদি আইদেন্তিতি ঙাকসি হায়না কেফ এন্দ পি দি মিনিস্তর এল সুসিন্দ্রো মৈতৈনা ফোঙদোকখ্রে।
মিনিস্তর এল সুসিন্দ্রো অমসুং রাজ্য সভাগী এম পি মহারাজ সনাজাওবা লৈশেম্বা অনীগী বাংলাদেশ খোঙচৎকী মনুং চন্না লুচিংবা অনী অসিনা বাংলাদেশকী ঘোড়ামারাদা মণিপুরী বিষ্ণুপ্রিয়াগী তিমগা উনদুনা মখোয়না থেংনরিবা খুদোংচাদবশিং তানখিবগা লোয়ননা পায়খৎপা য়াবা থবকশিং পাইখৎনবা খন্নখ্রে।
উনবা অদুদা মিনিস্তর এল সুসিন্দ্রোনা হায়, মতম অমদা লৈরম্বা ঐখোয়গী অপূনবগী শক্তম অদু শাগৎনবা মফম অসিদা মণিপুরগী চীফ মিনিস্তর এন বিরেননা থারকপনি। মফম অসিদা খুন্দারিবা মৈতৈ অমদি বিষ্ণুপ্রিয়াগী অপূনবা শাগৎসি। মণিপুরদসু বিষ্ণুপ্রিয়াশিং লৈরি। ঐখোয় পূন্না হোৎনমিন্নদুনা লমদম অসিগী নাৎ অমসুং চৎনবী ঙাকসি।
সনা কোনুংগী নিংথৌ অমসুং রাজ্য সভাগী এম পি সনাজাওবা লৈশেম্বনা হায়, বাংলাদেশতা খুন্দারিবা মৈতৈশিং করম হায়না লৈরিবগে হায়বসি য়েংশিন্নবা সি এমনা মফম অসিদা মহাক অমসুং মিনিস্তর সুসিন্দ্রো থারকপনি। অদুবু মফম অসি য়ৌবা মতমদা মৈতৈ, বিষ্ণুপ্রিয়া অমদি অতৈ ফুরুপশিং পূন্না লৈরমদবদা নত্তনা মানা-মানা থোকপা লৈরম্বা অসি উবদা নুংঙাইতে। লাইনিং লাইশোল, ফিজেৎ-চাকচা চপ মান্নরগা অপূনবগী শক্তম কায়রম্বা অসি অঙকপমা ফাওই।
মফম অসিদা লৈরিবা মৈতৈশিংগী লোল অসিগা মণিপুরদা ঙাঙনরিবা লোল অসি অদুক্কী মতীক খেন্নবদা নত্তনা লোল অসি ঐখৈায়না খঙদবগী ফীবমদা লৈরিবা অসি কোক্ননবা মণিপুরী লোল অসি নিংথিনা তম্বা হৌরসি হায়না লৈশেম্বনা মফম অদুগী মীয়ামগী পূক্নিং চিংশিল্লমখি।
সোর্স: পোক্নফম
0 কমেন্ট:
কমেন্ট তৌবিয়ু