• 794
• ২৮শে অক্টোবর ২০২১ ইং
• Share on:

মাউন্ট মণিপুর অথৌবশিংদা কৎপা অশেংবা শ্রদ্ধাঞ্জলিনি — চোংথাম তোম্বা সিংহ

অথৌবশিং অদুবু কনানসু নীংশিংদনা লাকখি। অদুনা য়ুনাইটেড চোংথাজ, ইম্ফালনা অথৌবশিং অদুগী ৱারী-ৱাখোং থিদুনা মখোয়বু মতিকচাবা ইকাইখুম্নবা উৎতুনা মখোয়গী নীংশিং থৌরম পাঙথোকপা হৌখি। খোংজোম লান্দা মৈতৈ লাম্মীগী লুচিং পুরেল ওইখিবা মেজর চোংথা মিয়াগী ৱারী ৱাখোং থিবদদি মণিপুরগী ৱাংমদা ত্রিপুরাদ লৈবিরিবা মৈতৈ ফুরূপচাশিংনা মরু ওইনা ‘লময়ানবা’ লুপনা অচৌবা থৌদাং লৌবিদুনা মতেং পাংবিদুনা অথৌবা অসিগী পুন্সিগী অরোইবা শরুক্কী ৱারী পুথোকপীরকখি। হৌখিবা চহী কুমজা ২০২০ গী নভেম্বর ২৩দসু ইন্টেলেকচুয়েল ফোরাম, নর্থ-ইষ্ট অমসুং প্রীজার্ভেশন কমিটি ফোর মণিপুরী ৱার হেরোজ ডির্পোটেড টু কালাপানি’গা খুৎশম্নরগা য়ুনাইটেড চোংথাজনা ইম্ফাল ইষ্টকী হৈরাংগোই থোংদা নেশনেল সেমিনার অমগা লোয়ননা মখোয় ২৩গী নীংশিং থৌরম অমা পাঙথোকখি।

মাউন্ট হেরিয়েট হৌজিকনা মাউন্ট মণিপুর

পীকখ্রবা লৈবাক মণিপুরগী থৌনা ফবা ইপা-ইপুশিংদুনা মমালৈবাক্কী নীংতম্বা কন্নবা, মখোয়গী লমদি নুমিৎ তাবা লৈতে হায়নরিবা চাওখ্রবা লৈবাক বৃটিশকা লান্থেংনরম্বা অসিনা ঙসিদি মণিপুরগী হৌজিক লৈরিবা মীয়াম্না ঙক ৱাংনা থাঙ্গৎতুনা মালেম পুম্বগী মমাঙদা চাওথোকচবা ঙম্লিবসিনি। ঐখোয় পুম্নমক্কী ইজ্জৎ পীবিরম্বা ইপা-ইপুশিং অদুগী মনুংদা মতমদুগী নিংথৌ কুলচন্দ্র মহারাজ য়াওনা মখোয় ২৩দি আন্দামান অমসুং নিকোবর ঈথৎতা লোই থাখি অমসুং মাউন্ট হেরিয়েত্তা থমখি। মরমদি মতম অদুদা সেলুলার জেল অসি শাদ্রি। সেলুলার জেলদি ইং ১৮৯৬ দগী শাবা হৌখিবনি। মতম অদুদগি হৌজিক মীয়াম্না পুক্নিং হুরবা ট্যুরিষ্ট সেন্টার ওইনা উরিবা আন্দামান ঈথৎ অসি মী লৈবদা অঙকপা ফংনা অৱাবা ওইরম্মী। লম্বী-থোং, ঈশিং-মাইশিং নচিংবা খুদোং চারমদে। জঙ্গলগী লমনি, শা-কৈতনা থনবনি। মদুগী মথক্তা, লম অদুদা হান্নদগী লৈরকপা মীওইশিং গী য়েংথিনবসু লোইবা নাইবা নত্তে। ওন্থোক্না ৱাখ্রবা পুন্সি মরেন অমদা লেল্লকখিবা অথৌবশিংনি। মখোয়না অসুম্না লেনখিরম্বা পুন্সি অদু ঙসি হিংলিবা ঐখোয়গীদমক্তনি।

তুংগী মীরোলগীদমক্তা মরৈবাক মণিপুরদা লৈবা ফংখিদ্রবা অথৌবা ২৩ অদুদি:- ১) মহারাজ কুলচন্দ্র ধজা সিংহ ২) সেনাপতি অঙৌসনা সিংহ, ৩) লোকেন্দ্র বীরজিৎ সিংহ, ৱাংখৈরাকপা, ৪) কর্ণেল শামু সিংহ, লুৱাং নিংথৌ, ৫) চোংথাম নীলমনি সিংহ, অয়া পুরেল মেজর, ৬) চোংথাম ইবোতোন (চোংথা মিয়া মেজর) ৭) হৈক্রুজম চাওবতোন সিংহ, সুবিদার ৮) মঙশাতাবম তোঞ্জাও সিংহ, জামাদার, ৯) ইঙুদুম ঘনা সিংহ, জামাদার, ১০) চিংশুবম নিংথৌবা সিংহ, জামাদার, ১১) ফাঞ্জৌবম থৌবা সিংহ, জামাদার ১২) অশাংবম পরাধুম্বা সিংহ, কুত, ১৩) অবুংজাও য়েনখোইবা, লাল্লুপ চিংবা, ১৪) উশম অরু সিংহ, লাল্লুপ চিংবা, ১৫) খোমদ্রাম ঘনা সিংহ, লাল্লুপ চিংবা, ১৬) হিদাম চাওবি, মচাহল ১৭) নেপ্রম নোনি সিংহ, মচাহল, ১৮) ময়েংবম ধোজো সিংহ, মচাহল, ১৯) নোংথোনবম ত্রিলোক সিংহ, শঙ লিংবা, ২০) শগোলশেম ধনা সিংহ, শঙলিংবা, ২১) লাইশ্রম খম্বা, মচাহল, ২২) গৌকামি (নাগা) অমসুং, ২৩) গৌহো (নাগা)।

অথৌবশিং অদুবু মখোয়গী মিয়াৎ মতম লোইরদুনা থাদোক্লবসু মখোয় ৭ খক নত্তনা অতৈ ১৬ দি মরমদম (ইমা লৈবাক মণিপুর) দা হনবা য়াহনখিদে। য়েনখোম অবুংজাও অমসুং লাইশ্রম খাম্বা অনীদি আন্দামান থাদোকপা নংদ্রিঙৈদা লৈখিদ্রে। অদুগা মহারাজ কুলচন্দ্র অমসুং চোংথাম নীলমনি সিংহ অয়া পুরেননা রাধাকুন্ডদা পুন্সিগী অরোইবা য়াহিপ তানখি। লোকেন্দ্র বীরজিৎ, ৱাংখৈরাপাদি নদীয়াদা লৈখিদে। অদুগা মেজর চোংথা মিয়ানা ত্রিপুরাদা নারান খামার কৌবা মৈতৈ খুঙ্গং অমদা লৈখিদবনি। অসুম্না অথৌবা ১৬ না মণিপুরগী ৱাংমদা পুন্সি লোমখি। অথৌবশিং অদুবু কনানসু নীংশিংদনা লাকখি। অদুনা য়ুনাইটেড চোংথাজ, ইম্ফালনা অথৌবশিং অদুগী ৱারী-ৱাখোং থিদুনা মখোয়বু মতিকচাবা ইকাইখুম্নবা উৎতুনা মখোয়গী নীংশিং থৌরম পাঙথোকপা হৌখি। খোংজোম লান্দা মৈতৈ লাম্মীগী লুচিং পুরেল ওইখিবা মেজর চোংথা মিয়াগী ৱারী ৱাখোং থিবদদি মণিপুরগী ৱাংমদা ত্রিপুরাদ লৈবিরিবা মৈতৈ ফুরূপচাশিংনা মরু ওইনা ‘লময়ানবা’ লুপনা অচৌবা থৌদাং লৌবিদুনা মতেং পাংবিদুনা অথৌবা অসিগী পুন্সিগী অরোইবা শরুক্কী ৱারী পুথোকপীরকখি। হৌখিবা চহী কুমজা ২০২০ গী নভেম্বর ২৩দসু ইন্টেলেকচুয়েল ফোরাম, নর্থ-ইষ্ট অমসুং প্রীজার্ভেশন কমিটি ফোর মণিপুরী ৱার হেরোজ ডির্পোটেড টু কালাপানি’গা খুৎশম্নরগা য়ুনাইটেড চোংথাজনা ইম্ফাল ইষ্টকী হৈরাংগোই থোংদা নেশনেল সেমিনার অমগা লোয়ননা মখোয় ২৩গী নীংশিং থৌরম অমা পাঙথোকখি। হায়রিবা থৌরম অদুদা অনারেবল লোকসভাগী এম.পি (হৌজিক্না কেন্দ্রগী মন্ত্রি) শ্রী আর কে রঞ্জন সিংহ, অনারেবল রাজ্যসভাগী এমপি মহারাজ লৈশেম্বা সনাজাওবা অমসুং অনারেবল স্পীকার মণিপুর ষ্টেট এসেমব্লি শ্রী য়ুম্নাম খেমচান্দনা সভাগী লৈতেং ওইবিখি।

হায়রিবা থৌরম অদুগী মতুং তারকপদা, ইকাইখুম্নজরবা মণিপুরগী চীফ মিনিষ্টারনা হীরমসিদা পুক্নিং চঙবিদুনা অখঙ-অহৈশিংগী কমিটি অমা শেম্বীদুনা অতেনবা মতমগী মনুংদা অথৌবাশিং অসিগী নীংশিং খুভম অমা শানবা মফম থিদুনা য়ুম্বীনচিংবা য়ুংলো হায়না শিন্নবিখি। ইকাইখুম্নরবা চীফ মিনিষ্টারগী পাউতাক মতুং ইন্না হায়রিবা কমিটিনা মপান কাংজৈবুংদা লৈরিবা বি.টি পার্কতা অথৌবা ২৩ গী নীংশিং খুভম অমা শেম্বীদুনা নীংশিং য়ুম্বী অমা য়ুংবিরে।

নীংশিং খুভম অসি চৎলিবা চহীসিগী আগষ্ট ১৩দা পাঙথোকখিবা নীংশিং থৌরমদা মণিপুর গর্ভনরনা মায়খুম হাংদুনা অথৌবশিংগী মফমদা ইকাইখুম্নখি। মসিমক পুৱারীদা অচৌবা খোঙথাং অমনি, মরমদি অথৌবা ২৩সি লৈঙাক্না শক খঙবীবা লৈরকপনি হায়না লৌই। মসিগীদমক মুখ্যমন্ত্রী শ্রী এন বীরেননা লুচিংবা মণিপুর লৈঙাকপু মীয়াম্না থাগৎফম থোকই। মখা তারকপদা, ভারত লৈঙাক্কী হোম মিনিষ্টার শ্রী অমিট শাহনা ‘আজাদিকা অমৃত মহোৎসব’ মরী লৈননা আন্দামানগী পোর্ট ব্লেয়ারদা খোঙচৎ অমদা হায়বিখিবা ‘মণিপুর লৈঙাক্না মাউন্ট হেরিয়েটতা নীংশিং খুভম অমা শাবদা ভারত লৈঙাক্না শেনগী মতেংসু পীগনি” হায়না ফোঙদোকখিবা অসিসু নুংঙাইবা পাউনি। সনাগী লীকফাংদা তম্ফানা লীকয়ান য়ানবগী ৱানি। ইকাইখুম্নরবা মিনিষ্টারনা তাকপীবগুম্না অথৌবশিং অসিগী নীংশিং খুভম অমা শাবা তারবদি হৌরক্লিবা তুংগী য়ুম্বী ওইগদৌরিবা নহাশিংবু মরৈবাক নিংবগী ৱাখল্লোন চেলহনগনি, মথৌনাসু হাকপনি। মরম অদুনা ৱাফম অসি মণিপুর লৈঙাক্না লুম্না লৌবিদুনা অথুবা মতমদা নীংশিং খূভম শাবা হৌনবা তৌহঞ্জনিংই। শেলগী তেংবাং পীগে হায়রিঙৈদা থবক অসি লোইশিনহৌবনা অচুম্বা ওইগনি। মৈতৈ পাউরৌদা “শারিঙৈদা য়ৈহৌ” হায়বদু নীংশিংসি হায়জনিংই। লৈঙাক্নসু হায়রিবা মফম অদুদা লম লৈনবগী থবক কন্না হোৎনবিরি হায়বসু তাজৈ। মণিপুর এসেম্বলিগী মীখল মমাঙদা থবক ওইনা মীয়ামদা উহনবিরবদি য়াম্না নুংঙাইবা হায়বদু ওইগনি।