• 606
• ৮ই জানুয়ারী ২০২৪ ইং
• Share on:

য়াইরিপোক থম্বালনু সাহিত্য মরুপ কম লাইব্রেরি য়াইরিপোক লিংখৎখিবগী মপোক কুমওন পাঙথোকখ্রে, নীংশিং মনা লান্থোকখ্রে

ইম্ফাল, জানুয়ারি ৭ : য়াইরিপোক থম্বালনু সাহিত্য মরুপ কম লাইব্রেরি য়াইরিপোক লিংখৎখিবগী ৩১ শুবা মপোক কুমওন থৌরম ঙসি য়াইরিপোক বামোন লৈকায়দা লৈবা লূপ অসিগী শঙলেন্দা পাঙথোকখিবগা লোয়ননা সাহিত্যগী লমদা কৎপা নীংশিং মনা লান্থোকখ্রে। লাইরিকসু ফোঙখ্রে।
থৌরম অদুদা কোরস রিপরতরি থিয়েটার মণিপুরগী চেয়ারম্যান পদ্মশ্রী এৱার্দি দাঃ রতন থিয়াম্না চীফ গেস্ত, য়াইরিপোক থম্বালনু সাহিত্য মরূপ কম লাইব্রেরিগী প্রেসিদেন্ত ইবোতোম্বী খুমনচানা প্রেসিদেন্ত অমসুং মণিপুর লিতরেরি সোসাইতিগী প্রেসিদেন্ত নোংমাইথেম কিরনকুমারনা গেস্ত ওব ওনর ওইনা শরুক য়াখি।
থৌরম অদুদা শরুক য়াখিবশিংনা মমাঙ চহীগী দিসেম্বর ৪ দা হৌজিক-হৌজিক মণিপুরদা থোক্লিবা ঈরাং অসিগী মনুং চন্না তেংনৌপল দিস্ত্রক্তকী লৈথাও ভিলেজদা থৱায় কৎখ্রবশিংগী মফমদা ইকায় খুম্নবা ঊৎতুনা মিনিত ২ তুমীন্না লেপ্তুনা অৱাবা ফোঙদোকপগা লোয়ননা মখোয়গী থৱায়না মপুগী লৈকোলদা ঈংদা-চীক্না লৈরুনবগীদমক থৌনিখি। নীংশিং মনাগী মিংথোল ওইরিবা লৈখিদ্রবী মাইবম মঞ্জুরিগী ফোটোদসু ঙসিগী অথোইবা মীথুঙলেনশিংনা লুচিংদুনা লৈ-শু কৎতুনা ইকায়খুম্নবা ঊৎখি।
লৈখিদ্রবা মাইবম মঞ্জুরি খোরিরোল নীংশিং মনা, ২০২৩ মণিপুরগী মশক নাইরবা এৱার্দ কয়া ফংলবা অইবা মোইরাংথেম রাজেন্দ্র মহাক্কী ৱারী মচাগী লাইরিক ‘মৈৱাইরক্লবা নুমিদাংৱাই’ হায়বসিদা পীখি। য়াইরিপোক বিষ্ণুনহাদগী ইবোতোম্বী খুমনচানা মহাক্কী অপোকপী লৈখিদ্রবী মাইবম মঞ্জুরিগী মিংদা কৎপা মনা অসিদা সাল, সাইতেসন অমসুং শেলগী মনা য়াওরি।
থৌরম অদুদা য়াইরিপোক থম্বালনু সাহিত্য মরুপ কম লাইব্রেরিগী ফাউন্দার প্রেসিদেন্ত রঘুবীর থিয়াম্না ইবা ৱারীমচাগী লাইরিক ‘হোতেল গেলেক্সি’ অমসুং রেদিও দ্রামাগী লাইরিক ‘খুৎশূমল’ হৌনবী মতুংইন্না অথোইবা মীথুঙলেনশিংনা ফোঙখি।

সোর্স: পোক্নফম