খাইদেম প্রমোদিনীগী ১০০ শুবা মপোক কুমওন থৌরম হৌদোকখ্রে, সাহিত্যগী মনাশিং লান্থোকখ্রে
ইম্ফাল, জানুয়ারি ৩ : চহী অমা চূপ্না পাঙথোক্কদবা মণিপুরগী লময়ানবী অইবী খাইদেম প্রমোদিনীগী ১০০ শুবা মপোক কুমওন থৌরম ঙসি জে এন মণিপুর দান্স একাদেমি, ইম্ফালদা হৌদোকখিবগা লোয়ননা তোঙান তোঙনবা মনাশিংসু লান্থোকখ্রে।
নহারোল সাহিত্য প্রেমী সমিতি ইম্ফালনা শীনবা থৌরম অদুদা শরুক য়াখিবশিংনা খাইদেম প্রমোদিনীগী ফোতোদা হৈকৎ-লৈকৎ তমখিবগা লোয়ননা লমদম অসিদা থোক্লিবা ঈরাং অসিদা থৱায়না পোন্থা পীখ্রবা অথৌবশিংগী মফমদা ইকায়খুম্নবা ঊৎপা ওইনা মিনিট অমা তুমিন্না লেপখি।
থৌরম অদুদা নহারোল সাহিত্য প্রেমী সমিতিগী ভাইস প্রেসিদেন্ত য়াইমা হাওবমনা হায়, মণিপুরগী সাহিত্যগী পুৱারীদা নুপী অইবীশিংগী ‘য়োৎশবী মখোঙ অহুম’ (থোইবী-বিনোদিনী-প্রমোদিনী) গী মনুঙদা খাইদেম প্রমোদিনীসু অমনি। মহাক্না সাহিত্যগী লমদা মমল নাইদ্রবা খুদোলশিং তম্বীরমখি। মসিদা নত্তনা নহারোল সাহিত্য প্রেমী সমিতি অসি লিংখৎলবা মতুং মতম শাংনা সমিতিগী ওইবা মনা পীবা ঙম্লমদে।
১৯৮৪ দা সমিতিগী সিলভর জুবিলি পাঙথোকই। মতম অদুদা খাইদেম প্রমোদিনীনা অইবী নুপীশিং পূক্নিং থৌগৎতুনা অইবী নুপী খক্তদা মনা পীনবা সমিতিদা শেল্লেপ পীদুনা ‘খাইদেম প্রমোদিনী সনাগী মেদল’ পীবা হৌখি।
মহাক্কী ৱাখল্লোন্দা নুপীশিং নুপাদগী শোন্থহনবা য়াদে হায়বসি চেল্লি। খাইদেম প্রমোদিনগিা সমিতিগা তৎন-থানবা য়াদ্রবা মরী লৈরি। পূম্নমক অসি য়েংদুনা সমিতিগী তৌফদ্রবা থৌদাং অমা ওইনা অইবী অসিগী চহী ১০০ শুবা মপোক কুমওন থৌরম অসি চহী অমা চূপ্না তোঙান তোঙানবা সাহিত্যগী থৌরমশিংগা লোয়ননা পাঙথোক্কনি।
থৌরম অদুগী অহানবা সেসন্সদা স্কুল ওব হ্যুমেনিতিস, এম য়ুগী হান্নগী দিন প্রোঃ পোলেম নবচন্দ্রনা ‘মণিপুর সাহিত্যদা খাইদেম প্রমোদিনীগী খুদোল’ হায়বা হীরম অসিদা ৱা ঙাঙখি।
হান্নগী মিনিস্তর দাঃ এম নরা সিংহনা চীফ গেস্ত অমসুং নহারোল সাহিত্য প্রেমী সমিতি, ইম্ফালগী প্রেসিদেন্ত নাওরোইবম ইন্দ্রমণিনা প্রিসাইদ তৌখিবা থৌরম অদুদা সমিতিগী থা ৩/৩ খুদিংগী পুথোকপা ১৯৯ শুবা চেফোঙ ‘ৱাখল’ সু ফোঙখি।
অনীশুবা সেসন ওইনা নহারোল সাহিত্য প্রেমী সমিতি, ইম্ফালনা থোকচোম যোগেন্দ্র নীংশিং শেলগী মনা ২০২৩, তলেম ইন্দুবালা মনা ২০২৩, লাইরেনলাকপম যুগিন্দ্রো নীংশিং সাহিত্য মনা ২০২৩ অমসুং অরিবম চিত্রেশ্বর শর্ম্মা নীংশিং মনা ২০২৩ খুৎশিন্নখ্রে।
কৃপাময়ি দেবীনা কৎপা থোকচোম যোগেন্দ্র নীংশিং শেলগী মনা ২০২৩ অসি কেনেবো রাজকুমারগী শৈরেং লাইরিক ‘নীংশিংবগী পোত্থাশঙ’ দা পীখি। কুমারী দেবীনা কৎপা তেলেম ইন্দুবালা মনা ২০২৩ অসি হৈক্রজম শ্যামসুন্দরগী মণিপুরী লোলদা হন্দোকপা ‘কন্থাপুরা’ দা পীখি। লাইরেনলাকপম সরতনা কৎপা লাইরেনলাকপম যুগিন্দ্রো নীংশিং সাহিত্য মনা ২০২৩ অসি ইরুংবম বসন্তগী ‘পুন্সি অমসুং তিঙ্খং’ হায়রিবা লাইরিক অসিদা পীখিবগা লোয়ননা অরিবম চিত্রেশ্বর শর্ম্মানা কৎলম্বা অরিবম চিত্রেশ্বর শর্ম্মা নীংশিং মনা ২০২৩ অসি অহানবা ওইনা য়াইস্কুল খ্বাইরাকপমগী ‘হিয়াইরোল’ হায়রিবা লাইরিক অসিদা পীখি। মনাশিং অসিদা শেল, সাইতেসন অমসুং সাল অমমম য়াওখি।
মনা লান্থোকপগী থৌরম অদুদা দি এম য়ুনিভার্সিতিগী ভি সি প্রোঃ এন রাজমোহননা চীফ গেস্ত, নহারোল সাহিত্য প্রেমী সমিতি, ইম্ফালগী প্রেসিদেন্ট নাওরোইবম ইন্দ্রমণিনা প্রেসিদেন্ত অমসুং জে এন মণিপুর দান্স একাদেমিগী দিরক্তের পি বিলাশনা গেস্ত ওব ওনার ওইনা শরুক য়াখি।
সোর্স: পোক্নফম
0 কমেন্ট:
কমেন্ট তৌবিয়ু