মণিপুর থিয়েটার ডে-২০২২ পাঙথোকখ্রে
ইম্ফাল, অক্টোবর ২১ : শুমাঙ লীলানা ভাবোক ৱাৎত্রগা থিয়েটারগী ভাবোক লৈরক্ত্রিবা অসি লমদম অসিগী থিয়েটার তৌরিবা অমসুং মসিবু নুংশিবশিংনা নৈনমিন্নবা মথৌ তাই হায়না থিয়েটার সেন্টর মণিপুরগী প্রেসিদেন্ট ৱারেপ্পা নব, পদ্মশ্রীনা ফোঙদোকখ্রে। ৱারেপ্পা নবনা ৱাফম অসি ঙসি থিয়েটার সেন্টার মণিপুরনা শীন্দুনা য়াইস্কুল পুলিসলেনদা লৈবা মণিপুর দ্রামাতিক য়ুনিয়নগী ওদিতোরিয়ামদা পাঙথোকখিবা মণিপুর থিয়েটার ডে-২০২২ গী থৌরমদা ফোঙদোকখিবনি।
থৌরম অদুগী প্রেসিদেন্ত ওইখিবা ৱারেপ্পা নবনা হায়খি, থিয়েটার সেন্টর মণিপুর অসি ১৯৫৪ দা লমদম অসিগী লৈহাওদা পোকখি। মোর্ডান মণিপুরী থিয়েটারগী আর্কিটেক ওইনা লৌনরিবা লৈখিদ্রবা সোরোখাইবম ললিতনা থিয়েটার সেন্তার মণিপুর অসি লিংখৎপীরম্বনি। লৈখিদ্রবা থিয়েটারগী লময়ানবা অসিনা মণিপুরী থিয়েটারবু অহানবা ওইনা লৈবাক অসিগী মেনস্ত্রিম থিয়েটারদা পুশিন্দুনা মশক তাকখিবনি।
মহাক্না হায়খি, মণিপুরী থিয়েটারগী খোঙজেল অসি মতম অমা য়াম্না য়াঙনা চেল্লম্মি। অদুবু ঙসিদি খোঙজেল তপথরকপগুম তৌরি। মমাঙঙৈদা নাট্য শাস্ত্র শাস্ত্রদা য়ুম্ফম ওইরগা পুথোকপা থিয়েটার প্লে কয়া মীনা কৃক-কৃক ইনদুনা য়েংনরম্মি। নাট্য শাস্ত্রদা য়ূম্ফম ওইবা প্লে পুথোক্নখিদ্রে। দিরেক্তরগী অপাম্বা অনিংবা মখাদা এক্সপরিমেন্তেল প্লেশিং পুথোক্নরি। এক্সপরিমেন্তেল প্লে হেন্না মায় ওনশিনখিবদগী থিয়েটারগী ভাবোক লৈরক্তবনি। ভাবোক য়েংবীদবা প্লে পুথোকপগী ৱাহন্থোক লৈতে।
শুমাঙ লীলাদা ভাবোক্না পাম্বা লীলা শান্নবা মরম্না ভাবোক ৱাৎত্রিবনি। থিয়েটারদনা দিরেক্তরশিংগী এক্সপরিমেন্তল প্লে ঙাক্তা পুথোক্নরবনিনা ভাবোক তাল্লে। মণিপুরগী থিয়েটার অসি ভাবোক য়েংবা প্লে শান্নদ্রে, ভাবোক তানবা প্লে শান্নদুনা লৈরে। থিয়েটার হেন্না চাওখৎনবা, মতম শাংনা হিংহনসি হায়রবদি ভাবোক্না পাম্বা প্লে পুথোকপা য়াম্না মথৌ তাই হায়না থিয়েটার দিরেক্টর অমসু ওইরিবা ৱারেপ্পা নবনা ফোঙদোকখি।
থৌরম অদুদা চীফ গেস্তকী ৱারোল পীদুনা মণিপুর স্তেত কোওপরেতি য়ুনিয়নগী চেয়ারমেন এল তোমপিশখনা হায়, মণিপুর অসি আর্ট এন্দ কালচারগী মচাক মরলতনা থন্না লৈবা লমদম অমনি। লৈরিবা তোঙান-তোঙানবা আর্ট ফোর্মশিংগী মনুংদা শুমাঙ লীলা অমসুং থিয়েটার অসি খুন্নাই অসিবু অচুম্বা মায়ওন্দা পুবদা অচৌবা থৌদাং লৌরিবনি। আর্টিস্তশিংগী থোইদোকপা মগুণ অসি অহল-লমন, ওজা-গুরু মশক খঙবা, থৌগল্লোন ঙাকপা অসিসুনি। আর্তিস্তশিংনা ওজা-গুরু কাউফদে।
মণিপুর স্তেত শুমাঙ কাউন্সিলগী লাইফটাইম সেক্রেটারি ওইরিবা সঙ্গিত নাটক একাদেমি এৱার্দি শৌগ্রাকপম হেমন্তসু গেস্ত ওব ওনার ওইনা শরুক য়াখি। ঙসিগী থৌরম অদুদা লৈখিদ্রবা সোরোখাইবম ললিতকী ফোটোদা মীয়াম্না লৈ-শু কৎখি। থৌরমগী মনুং চন্না থিয়েটার সেন্টর মণিপুরনা চহী খুদীংগী পীবা ললিত নীংশিং খুদোলনা মাইমোম ঙাংবীদা, কেঐচ ইবোচাওবী দেবী নীংশিং খুদোলনা শংলাকপম ইবোচৌবা শর্ম্মাদা অমসুং সেঞ্জম কোমোল নীংশিং খুদোলদা জি যাদুমণি শর্ম্মাদা লান্থোক্তুনা ইকায়খুম্নবা ঊৎখি।
সোর্স: পোক্নফম
0 কমেন্ট:
কমেন্ট তৌবিয়ু