আগরতলা, জুলাই ০৬ : মপান মণিপুরদা ভোটকী রাজনীতিদা আসামগী মণিপুরীশিংগী খ্বাইদগী মরু ওইবা য়ুম্ফম ওইরিবা বিধানসভা কেন্দ্র অদুদি লক্ষিপুর অসিনি। বরাক তম্পাক মনুং চন্না লৈবা বিধানসভা কেন্দ্র ১৫গী মনুংদা হায়রিবা লক্ষিপুর কেন্দ্র অসিদা মণিপুরী ভোটার মশীং য়াম্না লৈ।
অদুনবু কেন্দ্র অসিদগী অহুমরক থংনা থংননা মৈতৈ মচানা এম.এল.এ ওইনা কারকখিবগী রের্কডসু লৈখ্রে। কেন্দ্র অসিদগী কারকখিবা শক্নাইরবা এম.এল.এ অহুম মখোয়শিংদি লাইশ্রম মেরা চাউবা (১৯৬৭-১৯৭২) ৱাংখোম শুভঙ্কর সিংহ (১৯৭২-৭৭) অমসুং মৈতৈ পাঙল কাজি কুতুব (১৯৭৮-৮২) নি।

হায়রিবা কেন্দ্র অসিদগী কারক্তুনা আসামগী রাজনীতিদা মণিপুরীশিংনা থৌদাং চাওনা লৌরকখি। অদুবু মতুঙদা মণিপুরী মচা অমত্তনা কেন্দ্র অসিদগী কারকপা ঙমখিদে। মরমদি ডিলিমিটেশনগী মমিংদা কেন্দ্র অসিদা অতোপ্পা শাগৈ ভোটার হাপচিল্লকপা অমসুং লিংজেল মান্নরক্তবা অসিনচিংবা কেন্দ্র অসিদা মৈতৈ এম.এল.এ কারকপা ঙমদ্রিবনি হায়রি।

অদুবু কেন্দ্র অসিদগী শোয়দনা মৈতৈ মচা অমুক কারকখিগনি হায়না আশাগী মঙলান অদুদা ইলেকশন কমিশন্না অমুক ডিলিমিটেশন ড্রাফ্টকী মমিংদা মৈতৈ মশীং য়াম্না তাবা মৈতৈ খুঙ্গং কয়া মচেৎ তাহল্লগা অতোপ্পা কেন্দ্রদা তিনশিন্দুনা মণিপুরীশিংগী মখ্বাং থুদেকপগী থৌওং অসিবু য়ানিংদবা ফোঙখ্রে।

মৈতৈ খুঙ্গং কয়া লৌথোক্তুনা অতোপ্পা বিধানসভা কেন্দ্রদা হাপচিনবগী ময়াম মৈ হৌদুনা শাওনরে। ডিলিমিটেশন ড্রাফ্ট অদু য়ানিংদে হায়না ফোঙলদুনা মীয়ামগী ওইবা খোঙজং অমা ঙসি পাঙথোকখ্রে। খোঙচৎ অসি কোনজেং লৈকাইদগী লক্ষিপুর ওইনা এস.ডি.ওদা মেমোরেন্ডাম পীশিনখি। পনবা য়াবদি চৎখিবা জুন ২৭, ড্রাফ্ট ডিলিমিটেশন অসি য়ানিংদে হায়না বরাক তম্পাক্তা ঘন্টা ১২ বন্ধসু পাঙথোকখ্রবনি।

সোর্স: মরূপ