বাংলাদেশ মণিপুরী সাহিত্য সংসদনা পেত্রিওটিক রাইটার্স ফোরাম (পি.এ.দব্লিয়ু.এফ)কি মেম্বারশিংবু হরাও তয়াম্না ওকখ্রে
সিলেট, অক্টোবর ২৯ : বাংলাদেশকী মণিপুরী কালচারেল কমপ্লেক্সতা পেত্রিওটিক রাইটার্স ফোরাম (পি.এ.দব্লিয়ু.এফ) মণিপুর, মণিপুরী কালচারেল কমপ্লেক্স (এম সি সি), বাংলাদেশ অমদি মণিপুরী য়ুথ ফোরাম (এম ৱাই এফ) বাংলাদেশকা খুৎশম্নরগা পাঙথোকখিবা নিঙোল চাক্কৌবগী থৌরমদা শরুক য়াখিবা পি এ দব্লিয়ু এফ মণিপুরগী মীহুৎশিং ঙসি সিলেট হলি সাইড হোটেল বাংলাদেশ মণিপুরী সাহিত্য সংসদনা হরাও তয়াম্না ওকখ্রে।
নিঙোল চাক্কৌবগী থৌরমদা শরুক য়াখিবা পেত্রিওটিক রাইটার্স ফোরামগি থৌবুরেন ময়াম্বু বাংলাদেশ মণিপুরী সাহিত্য সংসদনা থাংজ নুমিৎ সিলেট শহরগি হলি ইন হোটেলদা তরাম্না ওকপগি থৌরম অমা শিনলাংখি। বামসাসকি ভাইস প্রেসিডেন্ট এল প্রশান্ত কুমার সিংহনা প্রিসাইড তৌখিবা থৌরম অদুদা অখন্নবা মীথুং ওইনা ৱা ঙাংবিখি পেত্রিওটিক রাইটার্স ফোরামগি প্রেসিডেন্ট নাউরোইবম খম্বা সিংহ, জেনারেল সেক্রেটারি রাকেশ নাউরেম, এক্স প্রেসিডেন্ট খোয়াইরকপম য়াইস্কুল অমসুং ভাইস প্রেসিডেন্ট মোংজম সবিতা।
বামসাসকি জয়েন্ট সেক্রেটারি খুন্দ্রাকপম সমেন্দ্র সিংহনা কন্ডাক্ট তৌখিবা থৌরমদুদা মণিপুর মপান্দা লৈরিবা মণিপুরী ময়াম্বু খোংগুল লিরদুনা নিঙোল চাক্কৌবনা চিংবা থৌরম কয়া শিনবিবগি তমক পেত্রিওটিক রাইটার্স ফোরামবু থাগৎতুনা ৱা ঙাংবিখি বাংলাদেশ মণিপুরী সাহিত্য সংসদকি প্রেসিডেন্ট কবি এ কে শেরাম, বামসাসকি জেনারেল সেক্রেটারি নামব্রম শংকর, য়ুম্নাম নৃপেন্দ্র, নীহার রঞ্জন শর্মা, বীর মুক্তিযোদ্ধা মনমোহন সিংহ, কবি মিনতী দেবী।
থৌরম অদুদা বামসাস-গী প্রেসিডেন্ট এ কে শেরামনা ফোঙদোকখিবদা, নিংঙোল চাক্কৌবগী ৱারী অসি পাখংবগী মতমগী ৱারী পুশিল্লক্তুনা লৈস্নানা মবুং পোইলৈতোনবু চাক্কৌখিবা অদুদগী হৌদোরকখিবনি হায়নরি। অদু ওইরবা তারগসু তশেংনা নিংঙোল চাক্কৌবগী থৌরম অসি মশক থোক্না পাক শন্না পাঙথোক্নরকখিবদি চন্দ্রকৃতি মহারাজগী মতমদগীনি। তশেংনা বাংলাদেশ, আসাম অমদি ত্রিপুরাদা মৈতৈশিংনা খুন্দরকখিবা অসিদি চন্দ্রকৃতি মহারাজনা পান্দ্রিঙৈগী মতমদগীনি। অদুনা নিংঙোল চাক্কৌবগী চৎনবী ট্রেদিসন অসি বাংলাদেশ, আসাম অমদি ত্রিপুরাদা তৌনরমদে। অদুবু মণিপুরগা খরা খরা নকশিন্নরকপদগী নিংঙোল চাক্কৌবগী চৎনবী অসি লাকখিবনি।
ঙসিদগী চহী ১০গী মমাঙদা ঢাকাবসী মণিপুরীনা বাংলাদেশতা ইহান হানবা ওইনা নিংঙোল চাক্কৌবগী থৌরম পাঙথোরকপদি হৌখ্রে। বাংলাদেশতসু ইমুং-মনুং খরদা পাঙথোকপা হৌরকখি। অদুবু হন্দক মণিপুরদগী পেট্রিওটিক রাইটার্স ফোরাম, মণিপুরনা মপুং ওইবা থৌদাং লৌদুনা য়াম্না পাক শন্না নেসনেল ফেষ্টিভেল অমা ওইনা বাংলাদেশতা পাঙথোকখিবা অসিনা বাংলাদেশকী লৈমায়দা খ্বাইদগী চাউবা নিংঙোল চাক্কৌবগী থৌরম ওইরে হায়খি।
থৌরমগী অহানবদা বামসাসকি কবি থোকচোম ওংবী কৈনাহন দেবী অমসুং কবি রওশন আরা বাশী না শরুক য়াখিবা পেত্রিওটিক রাইটার্স ফোরামগি মেম্বর পুম্নমকপু লৈ পিরদুনা তরাম্না ওকখি।
0 কমেন্ট:
কমেন্ট তৌবিয়ু