বাংলাদেশতা লৈরিবা পোগোস স্কুলগী অথোরিটিদা লময়ানবা ইরাবতকি পুন্সি ৱারি ফোংনবা হায়জখ্রে
ইম্ফল, ওক্টোবর ৩১ : বাংলাদেশকী ঢাকাদা হৌজিক লৈরিবা পেট্রোইটিক রাইটার্স ফোরাম (পি এ দব্লিয়ু এফ) মণিপুরগী থৌমিশিংনা ঙরাং বাংলাদেশকি ঢাকাদা লৈরিবা স্কুলদা চংদুনা স্কুল অসিগী ওথোরিটিশিংগা উনদুনা স্কুল অসিগী এনুয়েল রিপোর্ট ফোঙবা মতমদা লময়ানবা হিজম ইরাবতকি পুন্সি ৱারি য়াওহনবিনবা অমদি মশক নাইরবা স্কুল অসিগী ওল্ড ষ্টুদেন্ট লিষ্টতা হাপ্পিনবা হায়জখ্রে হায়না পি এ দব্লিুয়ু এফ মণিপুরনা থাদোরকপা চেরোল অমনা ফোঙদোরক্লি।
চেরোল অসিনা হায়, পি এ দব্লিয়ু এফ মণিপুরগী সেক্রেটারি রাকেশ নাওরেমনা লুচিংদুনা চৎখিবা ফোরামগী বাংলাদেশ খোংচোৎ অসিদা শরুক য়ারিবা খোঙচৎলোইশিংনা থা অসিগী চৈচৎ ২৭ তা ফোরাম অসিগা মণিপুরী কালাচরেল কমপ্লেক্স, বাংলাদেশ অমদি মণিপুর য়ুথ ফোরাম, বাংলাদেশকা খুৎশম্নরগা বাংলাদেশকী মণিপুরী কালচার কমপ্লেক্সতা পাঙথোকখিবা নিঙোল চাক্কৌবগী থৌরমদা শরুক য়াখ্রবা মতুং ভানুগাছ, সিলেট অমদি ঢাকাগী তোঙান তোঙানবা মফমশিংদা চৎতুনা বাংলাদেশকী মীতৈশিংগী পুন্সি মহিংগী মরমদা থিজিল্লুরবা মতুং খোঙচৎলোয়শি অসিনা ঙসি লময়ানবা হিজম ইরাবতনা কুমজা ১৯১৩ দা ক্লাস ৬ অমদি কুমজা ২০১৪ দা ক্লাস ৭ ফাওবা তম্লম্বা ঢাকাগী পোগোস স্কুলদা চংদুনা স্কুল অসিগী এসিষ্টেন্ট হেদ মাষ্টার এমদি শরিফুল আলমগা হকথেংননা উনখি।
বাংলাদেশকি শক্নাইরবা অইবা শান্ত খুমননা ইবা ইতিহাসকি শুক্লবা কাচিনদা ভানুবিল হায়না মিংথোনবা লাইরিক অসি খুদোল তম্বগা লোয়ননা লাইরিক অসিদা য়াওবা লময়ানবা হিজম ইরাবতনা স্কুল অসিদা ১৯১৩ দা জোন্সতোন স্কুল ইম্ফালদগী পিরকখিবা ক্লাস ৫কি রিদিং সার্টিফিকেট অমদি পোগোস স্কুলনা ১৯১৪দা লময়ানবা হিজম ইরাবত্তা পিরকখিবা ক্লাস ৭ ফাওবা তমখিবগী সার্টিফিকেট য়াওবা পেজশিং পুথোক্তুনা খঙহনখিবগা লোয়ননা লাইরিক অদুসু খুদোল তমখি।
পোগোস স্কুলগী এসিষ্টেন্ট হেদ মাষ্টারনা স্কুল অসিগী সেন্টিনারি চেফোঙশিং খোঙচৎলোইশিংদা খুদোল তমখি। চেফোং অদুদা ১৮৪৮গী জুন ১২দা ঢাকাদা লিংখিৎখিবা স্কুল অসি মতমদুগী হৌরগা হৌজিক ফাওবগী হেদ মাষ্টার ওইরকখিবা ওজাশিং, স্কুল অসিদা মহৈ তম্লকখিবা মশক নাইরবা ইন্দিয়া অমদি বাংলাদেশকি মীওই কয়াগী মিংসু য়াওরি। মখা তাবা স্কুল অসিগী সেন্টিনরি জার্নেলশিংদা লময়ানবা ইরাবতকি মিং অমদি পুন্সি ৱারি শোইদনা হাপ্নবা হোৎনগনি হায়না থাজবসু পিরকখি।
পোগোস স্কুলগী ওথোরিটি উনবা অদু লিবরেশন ৱার মিউজিয়াম ঢাকাগী মেনেজার চন্দ্রজিৎনা লুচিংখি। খোংচৎ অদুদা বাংলাদেশ মণিপুর সাহিত্য সংসদকী এসিষ্টেন্ট জেনারেল সেক্রেটারি খুন্দাকপম সোমোরেন্দ্রো, পি এ দব্লিুয়ু এফ মণিপুরগী প্রেসিদেন্ট নাওরোইবম খম্বা লুৱাং, ভাইস প্রেসিদেন্ট সোবিতা মোংজম, সেক্রেটারি রাকেশ নাওরেম, ফোর্মার প্রেসিদেন্ট য়াইস্কুল খ্বাইরাকপম, ত্রিপুরা ব্রাঞ্চকী প্রেসিদেন্ট গুরুময়ুম বিপ্লব শর্মানাচিংবশিং শরুক য়াখি। খোংচৎলোইশিং অসিনা পোগোস স্কুলগী থোরক্লবা মতুং ১৯৫২ গী ফেব্রুয়ারি চৈচৎ ২১ দা মমালোন বাংলাবু কন্নবগী ইহৌদা লৈখিদ্রবশিংগী নিংশিং খুভমদা চত্তুনা য়েংখি।
পনবা য়াই, ঢাকাদা মীতৈশিংনা খুন্দ্রারম্বা মণিপুরী পাড়া ঙসিদি মীতৈগী য়ুম অমত্তা লৈহৌদ্রে। ত্রিপুরাদা মীতৈশিংনা ইহান হান্না খুন্দাখি হায়নরিবা মেখালিপাড়াসু মুৎখিবগুম মমিংতা ঙাইহৌরে। মফম অসি মীতৈশিংনা খুন্দারম্মী হায়বা তুংগী মীরোলনা খঙহৌনবা মফম অসিদা নিংশিং য়ুম্বি নৎত্রগা মীতৈশিং খরা মান্নরগা অমুক নৌনা খুন্দাবগী তঙাই ফদবা লৈরে হায়রি।
সোর্স: পান্দম
0 কমেন্ট:
কমেন্ট তৌবিয়ু