মরূপ পাউমী, আগরতলা

মার্সরাইসড, কটন, নাইলোন নচিংবা লংনা শাবা হ্যান্ডলুমগী মখল কয়াগী ফি-গী পোত্থোক কয়া থেংনরে। লফু পাম্বী মকুনা শাবা হ্যান্ড ভ্যাগ, খংউপ, পাপোস, ফাইল কভার নচিংবসু লৈরে। অদুবু লফু পাম্বী ফাইবারদগী শাড়ী শাবসি বাংলাদেশতা মৈতৈ-ফিশা-লোনশা নুপী অমনা ইহান হানলে।

বাংলাদেশকী পুৱারীদা ইহান হানবা ওইনা লফুগী ফাইবরদগী শুংবা লংনা শাবা শাড়ী ঙসি মালেমগী বাজারদা য়াম্না অঙকপা অমদি মরু ওইনা বেঙ্গলী নুপীশিংগী য়াম্না পামজবা শাড়ী মখল অমা ওইনা ময়াম্না খংনরক্লি। লৈবাক অসিগী মৌলভীবাজার ডিষ্ট্রিক্ট মনুং চনবা কমলগঞ্জ উপজেলাদগী পংলাপ লাপ্তনা ভানুবিল কৌবা মৈতৈ খুলদা খুন্দানা লৈবা ফিশা লোনশাদা ময়াম্না মশক খংলবী রাধাবতী দেবীনা মৈতৈ ফনেক, খুদৈ মতেক, ইনেফি, মাফলার, লশিং-ফি নচিংবা শাবসি ইমুংদগী হৌরকপা মৈতৈ জাতিগী পরম্পনা অমনি, মসিগীদমক তোঙান্না তম্মুবা লৈতে। ইং ১৯৭৫দগী ফিশা-লোনশাদা ময়াম্না মশক খঙলকপা হৌখি। ময়েক য়েকথোক্লগা মচুতানা ফি শাবদা মমিং চৎলবী ফি-শাবী রাধাবতী দেবী ইম্ফালদগী চাওখৎলবা টেক্নোলোজি খুত্থাংদা ট্রেনিং লৌদুনসু লাকখি।

বাংলাদেশ ভানুগছকী চহী ৬৬ শরুবী ফি-শাবী রাধাবতী দেবী, লাইরিক লাইশুদা থোইনা চঙশিনখিবা নত্তে। আদমপুর, তেতইগাঁও রসিক উদ্দিন এইচ. এস স্কুলদা ক্লাস ৯ ফাওবা লাইরিক তম্লমখি। মহাক হৌজিক মনাও নুপা পোত্থারবা স্কুল ওজা রঞ্জিত সিংহগা লৈমিন্নরি। লাইরিক লাইশুদা থোইদোক্না চঙশিনখিবা ঙমখিদ্রবসু মৈতৈগী পরম্পরা নাৎকী ওইবা ফিশা-লোনশাদা থৱায় য়াওনা চঙশিল্লকপদি হৌখি। ইং ১৯৮৬ দা মমা লৈবাক (হৌরকফম) ভারত লৈবাক্কী ইম্ফালদা চৎলগা ফিশা-লোনশাগী ট্রেনিং লৌখি।

বাংলাদেশতা হল্লক্লগা কমলগঞ্জ মাধবপুরদা লৈবা মণিপুরী ললিত কলা একাডেমিসু ট্রেনিং লৌখি। মতম অমা সিলেটকী মীরাবাজার হ্যান্ডলুম ওয়েভার্স সেন্টারগীসু মহাক্না দায়িত্ব পুরম্মী। ঢাকা য়াওনা বাংলাদেশকী তোঙান তোঙানবা মফমদা পাঙথোকপা হ্যান্ডলুমগী মেলা খুদিংদা শরুক য়াদুনা মখল কয়ানা শাবা ইনেফি শাড়ী নচিংবা পোত্থোক কয়াসু ডিসপ্লে তৌদুনা লাকখি। মশাগী থবক মশানা তৌবা সেল্ফ এমপ্লোয়মেন্ট ফিশা-লোনশাগী থবকসি অতৈসু চাওখৎনবগী পান্দমদা মহাক্না নুপী কয়াবু ট্রেনিং পীহনখি। 
ফিশা লোনশাদা এক্সপেরিমেন্ট ওইনা য়েংবা মখল কয়াগী ডিজাইন তৌরগা ফি শাখি। কমলগঞ্জ মশাগী ময়ুমদা সুতগিী লংগা তিন্নরগা অহানবদা ইনেফি অমা শাখি। বান্দরবন ডিষ্ট্রিক্টকী এডমিনিষ্ট্রেটর ইয়াসমিন পারভীন তিবরীজিনা লফু পাম্বী ফাইবারনা শাবা মখল কয়াগী পোৎ উৎহল্লগা লফু পাম্বীগী ফাইবারনা শাড়ী শানবা হায়জখি। মহাক্না হোৎনবা কনবদগী মসিগী থবকসু মায় পাকখিবনি। কিলো অমা লফুগী লংগা মিক্স তৌরগা নুমিৎ ১৫ নিগী মনুংদা লফুগী শাড়ী অদু শাবা ঙমখিবনি। মদু উবদা বান্দরবন ডিষ্ট্রিক্ট এডমিনিষ্ট্রেটর ইয়াসমিন পানবীননসু থাগৎখি। অসিগুম্বদা মহাক্কী থৌদাং কয়াবু শক খঙলদুনা ইং ২০২০ দা বাংলাদেশ মণিপুরী আদিবাসী ফোরামনা ‘নকশাকার গুরুমাতা’ এৱার্ড পীদুনা ইকাইখুম্নখি।

মহাক্না অহানবা ওইনা মৈতৈ ডিজাইনদা হাপ্লগা শাবা বেঙ্গলী নুপীনা পামজবা মণিপুরী শাড়ী অসি মহাক্কী মমিংগা চুন্ননা ‘কলাবতী শাড়ী’ হানা মিংথোনখি। বাংলাদেশতা মহাক্না অহানবা পুথোকপা মণিপুরী ‘কলাবতী শাড়ী’ অসি প্রধানমন্ত্রী শেখ হাসিনাদসু খুদোল তমখ্রে। লফু পাম্বীগী ফাইবরনা মৈতৈ ডিজাইনদা শাবা অতৈসু শাড়ী অহুম বান্দরবান ডিষ্ট্রিক্টকী এডমিনিষ্ট্রেটর ইয়াসমিন পারভিন তিবরীজিনা খুত্থাংদা প্রধানমন্ত্রীদা য়ৌহনখি। লোয়ননা খুৎনা শাবা পোৎচৈ খরসু খুদোল ওইনা তমখি।
প্রধানমন্ত্রী শেখ হাসিনানা অঙকপা অমসুং ফজনা শাবা ফি-শাবী রাধাবতী দেবীগা উন্ননিংবগী অপাম্বা ফোঙদোকখি। চৎলিবা থা জুরাইগী তাং ১৭ দা ফি-শাবী রাধাবতী দেবী য়াওনা কমলগঞ্জগী মাগী পৌরা মণিপুরী ওয়েভর অঞ্জলী দেবী অমসুং দত্ত সিংহ মীওই ১০ না প্রধানমন্ত্রী উন্নবদা য়াওখি। প্রধানমন্ত্রীনা শাড়ী অদু পায়রগা ডিজাইন অদু উরগা মহাকপু অসুক্কী মতিক থাগৎখি। য়াম্না তাংনা প্রধামন্ত্রীগা উন্নজবা ফংখিবা মতমদা মহাক্না লফু পাম্বীদগী ফংখিবা মতমদা মহাক্না লফু পাম্বীদগী শুংবা লংনা শাড়ী শাবা ট্রেনিং সেন্টার অমা হাংবিনবগী হায়জদুনা মহাক্কী অপাম্বা অদু ফোঙদোকপীরমখি। 

বাংলাদেশকী পুৱারীদা লফু ফাইবারদগী অহানবা শাদুনা পুথোকখিবা ‘কলাবতী শাড়ী’ ফি-শাবী রাধাবতী দেবীবু মণিপুরী লাইব্রেরী এ্যন্ড রিসার্চ সেন্টার মাইকৈদগী, বাংলাদেশ মণিপুরী সাহিত্য সংসদ, কমলগঞ্জ ব্রাঞ্চ, মণিপুর মিরর লোয়ননা লৈকাইদগী সংবর্ধনা পিখি।