বাংলাদেশতসু 'মণিপুরী লোনগী নুমিৎ' কা মরী লৈননা থৌরম পাংথোক্কদৌরি
সিলেট, আগষ্ট ২৬ : বাংলাদেশতা ২০২৬কী মণিপুরী লোনগী নুমিৎকা মরী লৈননা লাক্লিবা সেপ্টেম্বর ১, লৈবাকপোকপা নুমিৎতা ভানুগাছকী কালচারাল কমপ্লেক্সতা নোংমগী ওইবা থৌরম অমা পাঙথোক্লগনি হায়দুনা 'মণিপুরী ভাষা গবেষণা ও উন্নয়ন সংস্থা'গী মায়কৈদগী খংহনলকখ্রে। পনবা য়াবদি, বাংলাদেশতা 'মণিপুরী ভাষা গবেষণা ও উন্নয়ন সংস্থা'-লূপ অসিনা চহী খুদিংগী লেপ্তনা মণিপুরী লোনগী নুমিৎসি পালন তৌদুনা লাকখিবনি।
'মণিপুরী লোনগী নুমিৎ'( Manipuri Language Day) বাংলাদেশতা অহানবা ওইনা পাঙথোকপা হৌবসি ২০১২ খ্রিষ্টাব্দদনি। ২০১১ খ্রিষ্টাব্দদা মণিপুরী ভাষা গবেষণা ও উন্নয়ন সংস্থা লিঙ্খৎলবা মতুঙ লূপ অসিনা শীন্দুনা ২০১২দা অহানবা মণিপুরী লোনগী নুমিৎ থৌরম অসি ঢাকাদা শিল্পকলা একাডেমিগী হোলদা পাঙথোকই। মদুদা শিক্ষামন্ত্রীনা চিফ গেস্ট, শিক্ষা সচিব, ন্যাশনাল কারিকুলাম এন্ড টেক্সট বুক বোর্ড (এনসিটিবি)গী চেয়ারম্যান অমসুং ইন্টরন্যাশনাল মাদার ল্যাঙ্গুয়েজ ইনস্টিটিউটকী ডাইরেক্টর জেনারেলনা গেস্ট ওব ওনার ওইখি। এডভোকেট এসসি সিনহানা প্রিসাইড তৌখিবা থৌরমদুদা সংস্থাগী প্রেসিডেন্ট এ কে শেরামনা 'কী নোট প্রেজেন্টেশন' পিখি। মদুদগী হৌবা মণিপুরী ভাষা গবেষণা ও উন্নয়ন সংস্থানা চহী খুদিংগী লেপ্তনা মণিপুরী লোনগী নুমিৎসি পালন তৌদুনা লাকখি। সিলেটতা কয়ারক, ভানুগাছতসু কয়ারক পাঙথোকখ্রে। ছোটধামাইদসু চহি অমা পাঙথোকখি হায়রি।
কুমসি ২০২৬কী মণিপুরী লোনগী নুমিৎকা মরি লৈননা পাঙথোক্কদৌরিবা থৌরম অসিদা মৈতৈ ময়েক তম্বীবগী ৱার্কশোপ অমা পাঙথোক্নবসু থৌরাংলি হায়দুনা খংহনলকখি। পেট্রিওটিক রাইটার্স ফোরাম, মণিপুরগী সেক্রেটারি রাকেশ নাওরেমনা লুচিংদুনা MEELAL গী থৌবুরেন মরিনা হায়রিবা মৈতৈ ময়েক তম্বীবগী ৱার্কশোপ অসি কন্ডাক্ট তৌগনি হায়রি। 'মণিপুরী লোনগী নুমিৎ'কা মরী লৈননা পাংথোক্কদৌরিবা থৌরম অদুদা মণিপুরী ল্যাংগুয়েজ ডে ওবজার্ভেশন, মৈতৈ ময়েক তম্বীবগী ৱার্কশোপ হৌদোকপগী থৌরম ('ইনওগারেল প্রোগ্রাম'), লাইরিক ফোঙবা অমদি অতৈ নাৎকী ওইবা থৌরম কয়াসু পাঙথোক্কনি হায়দুনা 'মণিপুরী ভাষা গবেষণা ও উন্নয়ন সংস্থা'-লূপ অসিগী মায়কৈদগী খংহনলকখি।
0 কমেন্ট:
কমেন্ট তৌবিয়ু