• 841
• ৫ই ডিসেম্বর ২০২২ ইং
• Share on:

নট সঙ্কীর্ত্তন নুমিৎ পাঙথোকখ্রে

ইম্ফাল, ডিসেম্বর ০৪ : মীওইবগী অফবা তানখৎলকপা থৌরমশিং ওইরিবা লুহোংবা অমসুং নাহুৎ-নারেংনচিংবগী থৌরমশিংদা সঙ্কীর্ত্তনগী অশেংবা মশকশিং ঙাক্না চৎহন্নীংই অমসুং সঙ্কীর্ত্তনগী অশেংবা মশকশিং ঙাক্না চৎলগদি শেল থাবদসু মীয়াম্না ঙাক্না চৎকনি হায়না আর্ট এন্দ কালচারগী কমিশনার এম জয়না ফোঙদোকখ্রে। ৱাফম অসি লৈঙাক্কী আর্ট এন্দ কালচার অমসুং জৱাহরলাল নেহেরু মণিপুর দান্স একাদেমিনা পূন্না শীন্দুনা ঙসি একাদেমি অসিগী মান্দবতা পাঙথোকখিবা অনীশুবা সঙ্কীর্ত্তন নুমিৎকী থৌরমদা ময়ায় তাংবল লৌরদুনা কম্মিশনারনা ফোঙদোকখিবনি।

মহাক্না হায়, সঙ্কীর্ত্তনগী ঈশৈ কৌবা লাকপদসু সঙ্কীর্ত্তন মশাগী ওইনা লৈজরিবা মশক অমসুং চৎন-লোনচৎনচিংবশিং ঙাকপীদুনা মীয়ামদা খঙহনবা মথৌ তাই। হৌজিক্কী মতমদা চৎনবী অমা ওইরক্লিবা মতম ঈশৈ শক্লিবশিংনা সঙ্কীর্ত্তন লোমদা চঙশিল্লকপসু য়াওই। মরম অসিনা সঙ্কীর্ত্তনগী লৈজরিবা কাঙলোনশিংদি কায়দনা শক-শোন্দুনা চত্থবীয়ু। খুন্নাইসিদা লৈরিবা মীপূম খুদিংমক্না সঙ্কীর্ত্তনগী লৈরিবা কাঙলোনশিং ঙাক্না চৎমিন্ননবা হোৎনবা চঙই। লুহোংবগুম্বা থৌরমদা সঙ্কীর্ত্তন শকপদা মীওই ২/৩ না শকপা উবা ফংলক্লে। মসিনা সঙ্কীর্ত্তনবু মপূং ফাহন্দে হায়খি।

শেল থাবা চঙবদসু চঙলিবশিং অদুনা চৎন-কাঙলোন ঙাক্তবগী মওংদা শেল থাবা মাল্লে। সঙ্কীর্ত্তন তৌবিরিবশিংনা সঙ্কীর্ত্তনা অমগী লেপফম থোকপা অকক্নবা মীশিং অমসুং পুঙ য়েবদসু শুনা লেপহনবীগদবনি। অফবা তানখৎলকপদা তৌনীং তৌনীঙবা মওংদা তৌবদৌনা উরে। অদুম ওইনমক লান্ন-থৌরমগুম্বদদি তঙাইফদনা সঙ্কীর্ত্তনগী মশক ঙাকপগুম্না তৌরি। মরম অসিনা অওনবা লাক্লিবা কয়াসি অফবা মায়কৈরোমদা চৎলিব্রা নৎত্রগা ফত্তবা রোমদা চৎলিব্রা হায়বসি নৈনবা চুম্লে। সঙ্কীর্ত্তন হায়বসি য়নেস্কোনা কুমজা ২০১৩ গী দিসেম্বর ৪দা রিকগনিসন পীরে হায়দুনা লাউথোকখিবনি হায়খি।

চহীদুগী মতুং মমাঙগী কুমজা ২০২১দগী মণিপুর লৈঙাক্না সঙ্কীর্ত্তনবু তুং কোয়না অমসুং মাঙদনা লৈহৌনবগীদমক্তা সঙ্কীর্ত্তন নুমিৎ পাঙথোরকপা ঙসিগী অসিগা অনীরক শুবনি। নুপীশিংনা শকপদসু পুঙ য়ৈবা অমা অমসুং নুপী অহুমনা সঙ্কীর্ত্তন শকপা য়াওনরক্লে। অদুগা শেল থাবদসু বাসোক্তা শেল থাবগুম্বগী মওংদা তৌনীংবা তৌনরকপগী মওং লৈরক্লিবা অসি তোক্লগা সঙ্কীর্ত্তনগী ফজবা অশেংবা মশক অদু খঙহন্নবা হোৎনসি হায়খি।

ঙসিগী অনীরকশুবা সঙ্কীর্ত্তন নুমিৎকী থৌরমদা শক্নাইরবা সঙ্কীর্ত্তন গুরু এল লাকপতিনা অথোইবা মীথুংলেন ওইখি অদুগা আর্ট এন্দ কালচার লোয়শঙগী দিরেক্টর এল কিশোরজিৎ, ডিপুটি দিরেক্টর জি ধর্ম্মদাস অমসুং জে এন মণিপুর দান্স একাদেমিগী দিরেক্টর ইন চার্জ পি বিলাসুস শরুক য়াখি। থৌরমগী মনুং চন্না সঙ্গিত নাটক একাদেমিগী চোলোমদা অমৃত এৱার্দ ফংলজা নিঙোম্বম ইরাবোত অমসুং সঙ্কীর্ত্তন শৈশকপদা ষ্টেট কলা একাদেমি এৱার্দ ফংলবা সেঞ্জম কামেশ্বরবুসু থৌরমগা মরী লৈননা তরাম্না ওকপগা লোয়ননা শেলগী মনা অমসুং লেংয়ান ফি খুদোল তমদুনা ইকায়খুম্নবা উৎখি।

সোর্স: হুইয়েন লানপাউ