ত্রিপুরাদা মৈতৈ মচাদা অহানবা আই.এ.এস অফিসার ওইবিরম্বা স্বরাইজম কুলচন্দ্র লৈখিদবগী ১৯ শুবা নীংশিং নুমিৎ
মরূপ পাউমী, আগরতলা
ত্রিপুরাদা মৈতৈ মচাদা মশক নাইবা মীওই কয়াগী মনুংদা স্বরাইজম কুলচন্দ্র সিংহগী মিং পনবা য়াই, ত্রিপুরাদা মৈতৈ মচাদা অহানবা আই. এ. এস অফিসার ওইরম্মী। মহাক নত্তন ঙসি ফাওবদা অৱাংবদা থাক্তা মৈতৈ মচাদা আই.এ.এস অফিসার ওইবা য়াওদ্রি। মসিতা নত্তনা ইং ১৯৬৩ দা ত্রিপুরাদা লিংখৎখিবা মণিপুরী সাহিত্য পরিষদকীসু ফাউন্ডার ভাইস প্রেসিডেন্ট ওইরম্মী।
অহানবা মৈতৈ মচা আই.এ.এস অফিসার স্বরাইজম কুলচন্দ্রনা ইংকুমজা ২০০৪ গী সেপ্টেম্বর তাং ৫ দা লৈখিদবগী চহী ১৯শুবা নীংশিং কুমওন ঙাকপা ওইনা ইমুং মনুংনা নুমিৎ অসি শ্রদ্ধাঞ্জলি কৎখ্রে।
স্বরাইজম কুলচন্দ্র সিংহ, ইং ১৯২০ গী জুন তাং ১৭, কাছাড়গী লক্ষীপুর কোঞ্জেং লৈকাইদা পোকখি। অপোকপগী মিংনা স্বরাইজম গুরুধ্বজ সিংহ, ময়াম্না মশক খঙলবা জ্যোতিষ শাস্ত্র তৌবা মীশক অমনি। অদুগা অপোকপীনা স্বরাইজম ওংবী অতোমচা দেবী কৌই। মচিন মনাও মঙা নুপা ঙাক্তনি, কুলচন্দ্রনা অতোনবনি।
পীক্লিঙৈদগী মবুদ্ধি লৈবা হৈশিংবা লাইলিক লাইশুদা মথৱায় য়াওবা অঙাং ওইনা হৌরকখিবা মহাক লক্ষীপুর আর্ল এম. ই স্কুলদা প্রাইমারীদা মথংদা ইং ১৯৪০ দা শিলচর নরসিংহ হাইস্কুলদগী মেত্রিকতা ফার্স্ট ডিভিশন্দা পাশ তৌখি। ইং ১ি৯৪৪ দা গুরুচরণ কলেজতা তমদুনা কলিকাতা বিশ্ববিদ্যালয়দগী বি.এ পাশ তৌরবা মতুং থভক থিবা ওইনা ত্রিপুরাদা লাকখি।
লাইরিক লাইশু হৈবা অফবা পাত্র ওইবদুদা মঠচৌমুহনীগী মশক নাইরবা নৃত্যুগুরু রাজকুমার বুদ্ধিমন্তগী অনীশুবা ময়ুম লৈমা দুর্লভী দেবীনা পোকচবা রাজকুমার ধুম্রজিৎনা মহাক্কী মচা নুপী নিংথেম চনু তরুনী বালাগা কুলচন্দ্রগা লুহোংহনখি। অকোনবদা তরুনী বালাগী মনাও নুপী নির্মলাসু কুলচন্দ্রগী ময়ূমলৈমা ওইনা লৈখি। পনবা য়াবদি রাজকুমার ধুম্রজিৎ সিংহ অমসুং রাজকুমার কমলজিৎ মচিল মনাওনি।
ত্রিপুরদা থবক ফংদুনা স্বরাইজম কুলচন্দ্র টি.সি.এস অফিসার ওইনা জয়েন্ট তৌখি। মথং মথং এডমিনিষ্ট্রেশন সেকেন্ড অফিসার, জুডিসিয়েল অফিসার, এডিশনেল ডিষ্ট্রিক্ট মেজিষ্ট্রেট, আগরতলা মিউনিসিপাল কাউন্সিলগী এডমিনিষ্ট্রেটর, আগরতলা সেন্ট্রাপল জেলগী জেলার, সেটলমেন এ্যন্ড ল্যান্ড রেকর্ডকী ডিরেক্টর নচিংবা ত্রিপুরা লৈঙাক্কী অৱাংবা থাক্কী ফমদা কাখি। লৈঙাক্কী মতিক চাবা থৌমী অমনি হায়দুনা ইং ১৯৭৫দা মহাক্কী মিং আই.এ.এস নোমিনেট ওইনা পীখি।
মতম অদু ইন্দিরা গান্ধীগী ইমার্জেন্সি মতমনি, ত্রিপুরাদা মুখ্যমন্ত্রী ওইনা সুখময় সেনগুপ্তনা পাল্লি। মহাক্কী মতমদা লৈঙাক্কী য়াইফা থবক কয়াদা কুলচন্দ্র সিংহসু শীংথাবা য়াবা অফিসার অমা ওইনা ময়াম্না খংনখি। অরোইবদা লেবার কমিশনার ওইরম্বদগী এস কুলচন্দ্র সিংহ ইং ১০৮০ দা থবক্তগী পোত্থাখি।
লৈখিদ্রবা কুলচন্দ্র সিংহ, মণিপুরী সাহিত্য পরিষদ, ইম্ফালগী ত্রিপুরা ব্রাঞ্চকী ভাইস প্রেসিডেন্ট ওইরম্মী, মণিপুরী কালচারেল সেন্টরগীসু প্রেসিডেন্ট ওইরম্মী। ইং ২০০৪ দা মশাগী চহী ৮৪ শুবদা তাইবঙ পুন্সি থাদোক্তুনা ঈশ্বরগী খুয়া তাখি।
সোর্স: মরূপ
0 কমেন্ট:
কমেন্ট তৌবিয়ু