• 704
• ২রা জুন ২০২৩ ইং
• Share on:

ত্রিপুরাদগী নহারোলশিংনা চানবা-থক্নবা রিলিফ মেটরিয়েলস মণিপুরদা থাখ্রে

 আগরতলা, জুন ০৩ : থা অমা হেল্লবা ফাওবদা মণিপুরদা কুকী অমসুং মৈতৈ কাঙলুপ অনীগী তমথিরবা ঈরাং নেমথহনবা ঙমদ্রি। খুৎলায় পায়বা কুকী অমসুং আর্মীগী মরক্তসু কাপ্নবদগী তংদু লৈতাদবা মণিপুরদা মীচম প্রজাশিংনা অৱাবা কয়া থেংনরি। কার্ফিউ লৈনা লৈনা ঈরাংদা মীওই কয়া শিখ্রে, অশোক অপন নংখ্রে, ময়ুম মকৈ মৈনা চাকখ্রবা মরাল লৈজদ্রবা লিশিং লিশিং মীওইশিং রিলিফ ক্যাম্পতা লৈরি।

ইন্টারনেট, ৱাই-ফাই নচিংবা থিংদুনা লৈরি, চানবা-থক্নবা পোৎলুম পুবা গাড়ীশিং মণিপুরদা চঙবা ঙমদনা লৈরি। অসিগুম্বা ফীভম অসিদা ৱাখল্লোন মান্নবা ত্রিপুরাগী নহারোল খরনা থৌশিন্দুনা অৱাবা তারবা মণিপুরদা চানবা-থক্নবা অমদি মথৌ তাবা পোৎলুমশিং ইন্ডিগো ফ্লাইটকী কার্গোগী খুত্থাংদা থাব ঙমখ্রে হায়রি।

লমদম অসিগী মাইকৈ কয়ারোমদগী বেঙ্গলী, চীংমী, মণিপুরীশিং য়াওনা অতৈ অতৈ মীনুংসি লৈরবা মীওই কয়ানা অঙম্বা মতেং পাংনরকপা কেজি ৫০০ রোম লুম্বা পোৎলমশিংদু খোমগৎলগা চৎখিবা মে ৩০, ইন্ডিগো ফ্লাইটতা থাখিবনি হায়না লালসিংমুড়াগী এন প্রনয় সিংহনা হায়রি। হায়রিবা পোৎলমশিং ইম্ফাল ইষ্টকী ডিসিনা রিসিপ তৌরগা রিলিফ ক্যাম্পতা য়েন্থোক্কদবনি। পনবা য়াবদি ত্রিপুরাদগী তোঙান তোঙানবা মণিপুরী লুপ কয়ানসু শেল ওইনা তেংবাং কয়াসু থাবা য়াওখ্রে।

সোর্স: মরূপ