ত্রিপুরাগী শক্নাইরবা অইবা অহুম সিলেটতা বামসাস’না তরাম্না ওকপগী থৌরম পাংথোকখ্রে
সিলেট, এপ্রিল ২২ : ‘সাহিত্য সংস্কৃতিগী চপচাবি মপান হায়বমা লৈতে। থৱাইনা পাম্লবদি, থম্মোয়দা সাহিত্য সংস্কৃতিগী ঈচেল চেল্লবদি লৈবাক্কী ঙাক্লিবা চৈখন্দুনা কবি সাহিত্যিকপু করিমত্তা আৱাবা পিবা ঙমদে। মখোই শোয়দনা নুংশিনা অমগী নাক্তা অমা চংলক্কদৌরিবনি।’ – ৱাহৈশিং অসি ভারতকী আগরতলাদগী লাকপা শক্নাইরবা অইবা, রিসার্চর এল বীরমঙ্গল সিংহ, ত্রিপুরাবাণী প্রকাশনীগী প্রোপাইটার শক্নাইরবা অইবা রঘুনাথ সরকার অমসুং শক্নাইরবা অইবা ড. আশিস কুমার বৈদ্যবু সিলেটতা বামসাস’না তরাম্না ওকপগী থৌরমদা ময়াম্না ফোংদোকখিবনি।
বাংলাদেশ মণিপুরী সাহিত্য সংসদ(বামসাস)না ঙরাং শগোলশেল নুমিৎ (এপ্রিল ২১) সন্ধ্যাদা সিলেটকী হোটেল অমদা তরাম্না ওকপগী থৌরম অসি শিনখিবনি। বামসাসকি ইকায়খুন্মজরিবা সভাপতি কবি এ কে শেরামনা থৌরম মপু অমসুং গেস্ট অব ওনার ফমদা শক্নাইরবা কবি, গবেষক প্রফেসর ডক্টর আবুল ফতেহ ফাত্তাহ’না লৈতেংবিখি। আগরতলাদগী লেংবিরকপা অতিথি ময়াম্না সিলেটকি মীয়াম্না তরাম্না ওকপগী থৌরম অসি য়াম্না পেনজৈ হায়না মখোইগী ৱাহৈদা ফোংদোকখি।
বামসাসকী সেক্রেটারি নামব্রম শংকরনা কন্ডাক্ট তৌবা মীফমদুদা অতৈসু ৱা ঙাংবিখি শক্নাইরবা অইবা পুলিন রায়, প্রশান্ত কুমার সিংহ, মাধব রায়, কবি অমসুং অইবা আবিদ ফায়সাল, নীহার রঞ্জন শর্মা, সুমন বনিক, কবি অমসুং সম্পাদক নাজমুল হক নাজু, কবি অমসুং অইবা শেরাম নিরঞ্জন, মালেকুল হক, থিয়েটর এক্টিভিষ্ট উত্তম সিংহ রতন, মুক্তিযোদ্ধা মনমোহন সিংহ, খীর সিংহ, কবি অমসুং অইবা বিপ্লব নন্দী, কবি রওশন আরা বাশী খুৎহৈবম, কবি অমসুং অইবা মাইস্নাম রাজেশ, কবি এস সজল সিনহা, সমেন্দ্র সিংহ’না চিংবা অতৈ অতৈ।
0 কমেন্ট:
কমেন্ট তৌবিয়ু