ত্রিপুরাগী মফম কয়াদা ইরাবত শ্রদ্ধাঞ্জলি
আগরতলা, ওক্তোবর ০৩ : ত্রিপুরাগী চোইজাইননা তাবা মৈতৈ খুঙ্গং অমদি ইরাবত মীতম খিনবা মফমদা তোঙান তোঙানবা লুপ সংস্থানচিংবনা চহী ১২৮ শুবা হন্দক চহীগী লময়ানবা হিজম ইরাবত মপোক কুমওন মখল কয়াগী থৌরম য়াওনা পাঙথোকখ্রে।
হন্দক চহীসু আগরতলা ম্যুনিসিপাল কর্পোরেশন (এএমসি) অমসুং মণিপুর সাহিত্য পরিষদ, ত্রিপুরা (এম. এস. পি) অনীনা খূৎশম্নরগা ধলেশ্বর কল্যানীদা খিন্না লৈবা লময়ানবা হিজম ইরাবতকী মীতমদা লৈসু কৎতুনা ইকাইখুম্নখি। অয়ুক্কী থৌরম অদুদা এ. এম. সিগী হান্নগী মেয়র ড. আরকে প্রফুল্লজিৎ সিংহ, কর্পোরেটর সুখময় সাহা, মণিপুরী সাহিত্য পরিষদকী এডভাইজর ৱাংখেম বীরমঙ্গল, ভিপিএস খেলামোহন সেন, এসিঃ সেক্রেটারী কে অতুল সিংহ, পরিষদকী থৌবুরেন এল কুমার, রঘুনন্দন সিংহ, কবি এল মীনা নচিংবা মীওই কয়ানা মীতমদা লৈ খুজোক কৎতুনা ইকাইখুম্নখি।
নুংথিলদা পরিষদকী ভিপি ক্ষেত্রিময়ুম রবীন্দ্র কুমারনা থৌরম মপু ওইরগা ওড়িশাগী হান্নগী চীফ জষ্টিস সুভাশিস তলাপাত্রনা মৈরা চুখত্তুনা হৌদোকখিবা থৌরম অদুদা এ. এম. সি কর্পোরেটর সুখময় সাহানা চীফ গেষ্ট ওইখি। থৌরমদা আইসিএ হান্নগী ডিরেক্টর এল কুমার, সোসেল ৱার্কার এস তরুন কুমার অমসুং এস খেলামোহন শরুক য়াখি। থৌরম অদু পরিষদকী জিএস নীলকুমারনা ওক্না ৱারোল অদুগা এসঃ সেক্রেটারী কে অতুলনা ভোটঅব থ্যাঙ্কস পীখি। থৌরম অসিগা মরী লৈননা স্পোশলা এৱার্ড খরা অমসুং মহৈরোইশিং ওকখি।
অৱাং জিলাগী ধর্মনগরদা জননেতা হিজম ইরাবত মেমোরিয়েল ট্রাষ্ট কমিটিনা রাজবাড়ীদা খিন্না লৈবা ইরাবতকী মীতমদা হৈকৎ লৈকৎ তমদুনা শ্রদ্ধাঞ্জলি কৎখি। থৌরম অদুদা অহৈবম রবীন্দ্র কুমার থাংজম সমর না মরু ওইনা ৱা ঙাংখি।
নোংচুপ জিলা মনুং চনবা জিরানীয়াগী নলগড়িয়া (তৌরৌ) দসু মণিপুরী লিটরেরী এ্যন্ড কালচারেল ফোরাম অমসুং তখেল লৈমা তৈঙবাং লুপ অনীননা ১২৮ শুবা ইরাবত মপোক কুমওন থৌরমদা হৈকৎ লৈকৎ তমখি।
সিপাহীজলা ডিষ্ট্রিক্টকী লালসিংমুড়া মৈতৈ খুঙ্গংদসু পেট্রিওটিক রাইটার্স ফোরামনা ইরাবতকী মীতমদা হৈকৎ লৈকৎ অমদি খোইরু থাউমৈ থান্দুনা শ্রদ্ধাঞ্জলি কৎখি।
বামুটিয়া বেড়িমুড়াদা পুথিবা ওয়েলফেয়ার এ্যন্ড কালচারেল সোসাইটি, অভয়নগর অমসুং রিছার্স ফোরাম মণিপুর (রিফোর্ম) অনীনা বেড়িমুড়াগী রিক্রিয়েশন ক্লাবকা খুৎশম্নরগা ইরাবত মপোক কুমওন থৌরম পাঙথোকখি। থৌরম অদুদা রিফোর্মগী ভিপি লোংজম অরুননা চীফ গেস্ট ওইখি। থৌরম অদুদা বেড়ি মুড়া পঞ্চায়েতকী প্রধান এন নিখিলেশ দত্তা, পুথিবা ওয়েলফেয়ারগী সেক্রেটারী এস দীপক, এডভোকেট সুখাম প্রেমজিৎ, থিয়াম হেরোজিৎ, ড. বি অনিল কুমার শর্মা, এন সোনী মীতৈ নচিংবা শরুক য়াখি।
সোর্স: মরূপ
0 কমেন্ট:
কমেন্ট তৌবিয়ু