• 19
• ২২শে মার্চ ২০২৩ ইং
• Share on:

চৈরাওবা অনী থোকপা নত্তে, থৌরমদি অনী থোকপনি -- টি ঐচ ইবোমচা

চহী হৌবা হায়বসিমক্তবু মালেমগী অরি অনৌ হায়বদি অরিবা উনা কেনখ্রগা অনৌবা উনানা চোংলকপা মতমদনা খ্বাইদগী চানবা ওইগনি। অদুনা লমতা থানা লোইখ্রগা শজিবু থাদা চৈরাওবা ওইবসিনা হেন্না চানবা ওইনা লৌজৈ। অদুবু ইরমদম মণিপুরগী মীয়াম্না হেক হেক হায়নবা তাজৈ চৈরাওবা অনী থোকই হায়না। অদুবু অইবনা মমাঙগী চহীদসু ইজখ্রে চৈরাওবা অনী থোকপা নত্তে, থৌরম অনী থোকপনি হায়না। হায়রিবা থৌরম অনীমক লাইনিঙথৌ সনামহীনা পুথোকপা ঙাক্তনি, অহানবনা সনামহীনা মপাগী য়াথং ইন্দুনা তাইবঙ মালেম লৈখোঙ মপুং ফানা কোয়রুরগা হল্লকপদা মনাও কোনজিন তোথুপ্পনা ফম্বালগী নিংথৌ ওইদুনা লৈরম্বা উবদা শাউমন্দুনা হায়খি থৌরমসিদা তেংলম্বশিং চৈরাক পীনি হায়না অশাউবা উত্তুনা ঙাঙলম্লবা তুংদা অরানবা থৌদোক্তা হান্না থোকখ্রবা মালেমসি লৈথক লৈখা ওল্লগা অনৌবা মালেম শেম্লগে থৌরাংখি। থৌওংদু উরদুনা অতিংকোক শিদবনা কোরৌ নোংদোক থক্তগী কুম্লকখি।

অতিংকোক শিদবনা মচা সনামহীদা তাকপীরকই ইবুংঙো ননাওনা ফম্বালগী নিংথৌ ওইখ্রসনু, নঙনা তাইবঙ মীওইবশিংগী য়ুমগী নিঙথৌ ওইয়ু হায়না তাকপীবগা লোয়ননা লাইনিংথৌ মিংথোল পীবিখি। মপাগী য়াথং ফংবদা সনামহীনা হরাওনা য়াজখি। থৌওংদুদা পেল্লবা শিদবা মপুনা মচা সনামহীদা তাইবঙ লৈশেম্নবা য়াথং পীরম্লগা কোরৌথক্তা কারগা হান্নগুম হীরি কোন্দুনা লৈখ্রে। মশাগী মতিক ময়াই মপূং ফানা লৈবা লাইনিংথৌ সনামহীনা ইরমদমসিগী লৈশেম্বা হৌখি। লাইনিংথৌনা খনখি ইরমদম অসিগী মালেম পুম্বদগী তোপ তোপ্পা মওংদা শেম্লগে হায়বা ৱাখলগা লোয়ননা চীং হান্না শেম্বা হৌখি, অশোমদা ফম্বাল নিংথৌনা লিনগী শক্তম লৌরগা মমৈনা চীংশিংদু থুগাইরকই। (অশম্বা ৱারী)

মতম অসিদা লাইনিঙথৌ সনামহীনা উরে মনাও তোথুপ্পনা মশানা শেমজবা চীং পুম্নমক তোথুপ্পনা লিনগী শক্তম লৌরগা মমৈনা থুগায়দুনা মাঙহনবদু, মতম অদুদা সনামহীনা মপাদা ৱাকৎলকই, য়েংবীয়ু ইপা ইবুংঙো নচা তোথুপ্পনা তৌরিবসি মতম অদুদা অতিংকোক শিদবনা লাই নুরাবী ৭ পুথোক্লগা হায়রকই, আদা লিনগী শক্তম লৌরগা চীং থুগায়রিবসি নখোয়না মাবু ফাজিল্রগা ইফুৎ ফাউনরগা থমউরো হায়না থারকই। তাঞ্জা অদুদা শিদবা মপুন য়েংশিনখি, মচা সনামহীনা লৈশেম্বা হৌখিবা নুমিৎ থবালদুবু। মদুদা ওইরমই থানা শজিফু অদুগা থবান্না নোংমা পানবা অদুবু কোঞ্জিন তোথুপ্পনা লিনগী শক্তম লৌরগা শেমদুনা লৈরবা চীংশি থুগায়খিবদগী লৈশেম্বা মতম খরা লেপখি, অদুবু লাই নুরাবী তরেৎনা কোঞ্জিল তোথুপ্পবু ঈফুৎ ফাউনদুনা থমখিবদগী লাইনিংথৌ সনামহীনা অমুক লৈশেম্বগা লোয়ননা শরোয় ঙারোয়নচিংবা শেমদুনা লোইরে।

মখা তারকপদা নোংমা অমা, চীংখোঙদা লেনখিবা নুমিৎ অদুবা নোংমাইচিং হায়না মিংথোলখি, নোং ঙাল্লগা লাইনিংথৌ সনামহীনা চীংদা কাখি, নুমিৎ অদুবু নিংথৌকাবা হায়না মিংথোনখি, মথংদা নিংথৌনা লৈবাক অমা শেমখি নুমিৎ অদুবু লৈবাকপোকপা হায়না মিংথোনখি, লৈবাক অমা লৈরবনিনা য়ুম, কৈ শাখি নুমিৎ অদুবু য়ুমশকৈশা মিংথোনখি। য়ূম কৈ, শা-শগোল লোয়রবনিনা ষণ, শগোল শেলবা চৎলি হায়দুনা নুমিৎ অদুবু শগোলশেল হায়না মিংথোনখি। শগোল লৈরবনিনা মীশিং অদুনা শগোল তোংদুনা চৎপদা ঈরম খোংলম থেংনৈ হায়দুনা নুমিৎ অদুবু ইরাই হায়না মিংথোনখি। ঈরম খোংলমদা হৌবা উ, ৱাশিং য়ান্নবা থাঙ অমা শাখি হায়দুনা নুমিৎ অদুবু থাংজ হায়না থোনখি। (অশম্বা ৱারী)

মীতৈগী চক মরি হয়িচক, হয়াচক, খুনচক, লাংবচক হায়রিবা চক মরিসিগী অরোইবা চক অসিগী মনুংদা ঙসিদগী চহী লিশীং অনী ফাওবদি লমদমসিদা লোক্তাক লৈরমদে, চীংগী চীংখোঙ ফাওবা ঈশিং থুমদুনা লৈরমই। কনাগুম্বা মতিক ময়াই য়াম্না লৈবা লাই অমনা চীংনুংহুৎ তুরেল হুৎলগা ঈশিং চিংথখিবদা হান্না কংবা কংলা লৈরকখিবগা লোয়ননা লমদমসিদা মীয়াম্না খুন্দাখিবা লোয়ননা চীং-তম অনীমক্তা ত্রাইব ৩৪ গী মথক অদুগা মীতৈগী মিংনা হৌরগা অতোপ্পশিংনা মশা মশাগী ফুরুপকী মিংশিংন শমথবা ফুরুপ মরি লৈরি। হায়রিবা ফুরুপশিং অদুদি মীতৈ, মীতৈশিংগী অপূনবা ফুরুপ, মখোয়গী তোঙানবা চৎনবী খরা লৈ। অনীশুবা ফুরুপ্না মীতৈ হিন্দুশিংনি হায়রিবা ফুরুপসি লমহাং তোংদা শ্রীবিষ্ণু লাৎনরবা বিষ্ণুপুর মিংথোল্লবা তুংদা ফোঙদোকখিবা মীতৈ হিন্দুশিংনি। হায়রিবা মীওইশিংসিদি ময়ূমদা লাইনিংথৌ সনামহী লাৎলি, মন্দিরনা হিন্দুগী লাই লাৎলি, মখোয়বু বৈষ্ণবনি হায়নৈ। অহুমশুবা ফুরুপ্না মীতৈ পাঙলশিংগীনি। মখোয় মপাল লমদা য়াম্না চাওবা ফুরুপ লৈ। লোয়ননা মশাগী লাইনীং অমদি চৎনবী লৈ। মরিশুবনা খৃষ্টিয়ানশিংনি। হৌজিক্তি লমদমসিগী চীংগী ইচিল ইনাও অয়াম্বা অদুগা তম্পাক লমদগীসু মীওই খরা য়াওশিন্দুনা য়াম্না মপূং ফাবা ফুরুপ ওইবগা লোয়ননা যিশু পোকপা নুমিৎপু খৃষ্টমাস হায়না মারেমদা চহী লোইবা, চহী হৌবা হায়না খঙনরি। মীতৈশিংনা শজিবুগী থাদা চহী হৌবা চৈরাওবা থৌরম পাঙথোক্নরমই। হায়রিবা থৌরম অদু মীওই খরনা শজিবুগী নোংমা পানবদা চৈরাওবগী থৌরম পাঙথোক্নবগী পাউ তাখি। অদুবু ঐখোয় মীতৈ হিন্দুশিংগীদি মৈহৌরোনগী পুয়া নৈনরোলদা সনামহীনা লৈশেম্বা হৌখিবদি শজিবুগী নোংমা পানবা নুমিৎনি অদুবু লাইনিংথৌ সনামহীনা শেম্বা হৌবদি চীং হান্না শেম্বা হৌবনি অদুবু কোঞ্জিন তোথুপ্পনা লিন ওল্লগা মমৈনা থুগায়রকপদগী লৈশেম্বা লেপখি। থৌওংদুদা শাউরবা লাইনিংথৌ সনামহীনা ৱাকৎপদগী অতিংকোক শিদবনা লাই নুরাবী ৭ থারক্তুনা পাখংববু ঈফুৎ ফাওহল্লগা থমখ্রবা তুংদা সনামহীনা অনীরক শুবা ওইনা লৈশেম্বদদি চীংলোন মাপল শেম্বগা লোয়ননা থৱায় পানবশিং শরোয় ঙারোয়, মোনু তাইবঙ মীনচিংবা শুনা শেম্বগা লোয়ননা লাইনিংথৌনা পুথোকপা চক্কী অথোইবশিংদা শজিবু চৈরাওবগী চৎনবী লাকখি। মতাং অসিদা অইবা ইশাগী ওইবা ৱাফম খরা থমজরি মদুদি ঐনা হেক খঙলকপদগী ইশানা লৈরিবা কোলুপশিং অথাপ্পা মফমশিং ফাওবদা চৈরাওবগী থৌরমসি নোংমা পানবদা চৈরাওরক্তে, অদুবু অতোপ্পা মফমশিংদা লৈবা মীওইশিংনা শজিবুগী নোংমা পানবদা চৈরাওনবসু য়াওই হায়বা খঙলকপদগী অইবা ইশানা থৌদোক অসিগী অচুম অরান খঙনবা পুয়াগা মরী লৈননা নৈনবগী শম্লপ্পা ৱারোলশিং মথক্তা উৎচরিবদুনি, অইবগী ৱাখলদদি চৈরাওবগী থৌরমসি মথংগীসিনা চুমই।

মরমদি অহানবগী শজিবুগী নোংমা পানবদদি মপান্দা চাক থাদোক্কদবা শরোয় ঙারোয় শেমদ্রিবনা, মরমসিনা শজিবুগী নোংমা পানবা নুমিত্তদি ঐখোয়না য়ুমগী লাইনিংথৌ সনামহীদা ঙমজবা অথেন পোৎ কৎলগা অচম্বা পোৎলমশিংদু থোংলগা অহানবদা মপান্দা চাক থাফম শেম্লগা শরোয় ঙারোয়দা হান্না কৎকনি, য়ুমগী অহলশিংনা চহীসিগী অৱা অনা কোক্নবা থৌজাল নীজরগা ইমুং মনুং পুন্না নুংশি চান্ননা চামিন-থকমিন্নরগা নুংথিল মতমদা অহলশিংবু খুরুমজগনি। ৱারেং অসি

### ইজরিবা মীশক শ্রী থোকচম ইবোমচাসিং, ৱার্দ নম্বর ৫ শ্রীরাধামাধব লৈকায়, নিংথৌখোং বিষ্ণুপুর দিষ্ট্রিক্ট মণিপুর, চৈরাওবা অনী থোকপা নত্তে, থৌরমদি অনী থোকপনি।    

সোর্স: হুইয়েন লানপাউ (২১-০৩-২০২৩)