ক্ষেত্রিময়ুম য়াইমগী ১১৭ শুবা মপোক কুমওন থৌরম পাঙথোকখ্রে
লাইরিক ফোঙবা ঙমদবা অইবশিংগী লাইরিক ফাউন্দেসন্না ফোঙলগনি: সুবদনি
ইম্ফাল, জানুয়ারি ২৯ : লাইরিক ফোঙবা ঙমদবা অইবশিংগী কান্নরবা লাইরিকশিং ক্ষেত্রিময়ুম য়াইমা ফাউন্দেসন্না ফোঙলগনি হায়না ফাউন্দেসন অসিগী প্রেসিদেন্ট ক্ষেত্রিময়ুম সুবদনিনা ফোঙদোকখ্রে।
ৱাফম অসি লমদম অসিদা মহৈ-মশিনগী মঙাল পীবদা অচৌবা থৌদাং লৌবীরম্বা এদুকেসনিস্ট ক্ষেত্রিময়ুম য়াইমবু নীংশিংদুনা ফাউন্দেসন অসিগী ক্বাকৈথেল মোইরাংপুরেল লৈকায়গী ওফিসতা লৈবা ক্ষেত্রিময়ুম সুবদনিগী য়ুমদা পাঙথোকখিবা ক্ষেত্রিময়ুম য়াইমগী ১১৭ শুবা মপোক কুমওন থৌরমদা ফোঙদোকখিবনি। ঙসিগী থৌরম অদুদা লাইওইখ্রবা ক্ষেত্রিময়ুম য়াইমগী শক্তমদা হৈকৎ-লৈকৎ তমদুনা ঈকায় খুম্নখিবগা লোয়ননা থৌরম অসিগী মনুং চন্না ক্ষেত্রিময়ুম য়াইমা মেমোরিয়েল লেকচার প্রোগ্রাম অমদি শৈরৈং শৈদিন্নবগী থৌরম অমসু পাঙথোকখি।
থৌরম অদুদা থম্বালমরিক কোলেজগী রিটায়ার্দ এসোসিয়েট প্রোফেসর খোমদ্রাম সরোজ নলিনি, জি পি উইমেন্স কোলেজগী রিটায়ার্দ এসোসিয়েট প্রোফেসর ওক্রম সুমতি অনীনা লৈখিদ্রবা ওজা ক্ষেত্রিময়ুম য়াইমগী পুন্সি অমদি থবক্কী মরমদা ৱা ঙাংখি। লোয়ননা থৌরম অদুগী মনুং চন্না লমদম অসিগী শক্নাইরবা অইবা সাহিত্য একাদেমী এৱার্দী রাজকুমার ভুবোনস্নানা মীফম মপু ওইদুনা শৈরেং শৈদিন্নবগী থৌরম অমসু পাঙথোকখি।
লাইওইখ্রবা ক্ষেত্রিময়ুম য়াইমগী ১১৭ শুবা মপোক কুমওন হৌদোকপগী থৌরম অদুদা মণিপুর য়ুনিভার্সিটিগী স্কুল হিউমেনিটিজগী দিন প্রোফেসর নহাকম অরুনান থৌরম মপু, কৈশামথোং এসীগী ৱার্দ নম্বর ১৩গী কাউন্সিল্লর ওইনাম রোমিওনা অথোইবা মীথুংলেন অমদি বিরমঙ্গোল কোলেজগী এসিষ্টেন্ট প্রোফেসর ডা. লাইশ্রম লনধোনিনা অখন্নবা মীথুংলেন ওইনা শরুক য়াখি।
ফাউন্দেসন অসিগী শঙলেন অমা শানবা পোইন্ট ৫গী লম অমসু কত্থোক্লগনি। ফাউন্দেসন অসিনা চহীগী ওইনা লমদম অসিগী শক্নাইরবা মীওইশিংদা এৱার্দশিং পীদুনা ঈকায় খুম্নরগনি হায়না ফাউন্দেসন অসিগী প্রেসিদেন্ট অমদি ক্ষেত্রিময়ুম য়াইমগী মচানুপী ক্ষেত্রিময়ুম সুবদনিনা মখা তানা ফোঙদোকখি। থৌরম অদুদা ফাউন্দেসন অসিগী সেক্রেটারি রাকেশ নাওরেম অমদি অতৈ মীওই কয়াসু শরুক য়াখি।
সোর্স: হুইয়েন লানপাউ
0 কমেন্ট:
কমেন্ট তৌবিয়ু