• 161
• ৬ই ফেব্ররুয়ারি ২০২৬ ইং
• Share on:

কৈথেল্লাকপম চন্দ্র কুমারগী ১২১শুবা মপোক কুমওনদা শ্রদ্ধাঞ্জলি কৎখ্রে

আগরতলা,  ফেব্রুৱারী ০৫ : ত্রিপুরাদা সাহিত্যগী লমদা লময়ানবা অমনি হায়না শীংথানরিবা কৈথেল্লাকপম চন্দ্রকুমার সিংহগী চহী ১২১ শুবা মপোক কুমওনগা মরী লৈননা চৎখিবা ফেব্রুৱারী ২, অৱাং ধলেশ্বরদা শ্রদ্ধাঞ্জলি কৎপগী অখন্নবা থৌরম অমা পাঙথোকখ্রে।

লৈখিদ্রবা মহাক্কী মচা-মশুশিংনা শীন্দুনা পাঙথোকখিবা থৌরম অদুদা লমদম অসিদা সাহিত্যগা মরী লৈনবা শক্নাইরবা মীওই কয়াসু শরুক য়াখি। থৌরমগী ময়াই তাংবল লৌখিবা এম মৃনাল কান্তিনা লুচিংদুনা ময়াম হৈকৎ-লৈকৎ তম্বদা শরুক য়াখি। থৌরম অদু এল কুমারনা ওক্না ৱারোল পীবগা লোয়ননা লৈখিদ্রবা লময়ানবা অসিনা লমদম অসিগী মণিপুরী সাহিত্যগী মরু হুনখিবা অমদি মহাক্না হিংলিঙৈদা তৌরম্বা থবক থৌরম কয়াগী মরমদা হৌদোকপীদুনা ৱা ঙাংখি। থৌরমদা ময়েংবম ওংবী পদ্মাবতী সিংহ, এল বীরমঙ্গল, এস শ্যামল, কে নীলকান্ত, ৱাংখেম বীরমঙ্গল, আরকে তরুনজিৎ, এস খেলামোহন নচিংবনা লময়ানবগা থেংনহৌবা অমদি মহাক্কী মরমদা খঙবা কয়া ফোঙদোক্লখি। থৌরমদা এল মলয়া, ৱাই নির্মলা, এল মীনা, এন লাবনী, এল অঞ্জলী রাণী নচিংবনা লময়ানববু শৈথাবা শৈরেং পাঙথোকখি। অদুগা লৈশাংথেম ওংবী হেমমালা সিংহনা মৈতৈ লোন্দা হন্দোকপা রবীন্দ্র সঙ্গীত শকখি।

কে চন্দ্রকুমার সিংহ, ইং ১৯০৫ গী ফেব্রুৱারী ২, বাংলাদেশতা পোকখি। অঙাং ওইরিঙৈ মতমদগী লাইরিক লাইশুদা থৱায় য়াওবা অফবা ছাত্র অমা ওইনা হৌরকখি। হবিগঞ্জ স্কুলদগী ফার্স্ট ডিভিশন্দা মেত্রিক পাশ তৌরবা মতুং ভারত্তা খুন হোংদুনা খোয়াইদা খুন্দাখি। খোয়াই স্কুলদা ওঝা ওইনা থবক্তা চংখি। ইং ১৯৩৯ দা মহাক্বা 'মৈতৈ লোন' কৌবা তন্না লাইরিক অমা ফোঙখি। ইং ১৯৫৫ দা 'পারিজাত লৈরাং' কৌবা ক্রিয়েটিভ লিটরেচর মনুং চনবা নাৎকী লাইরিক অমসু মণিপুরীদা ফোঙখি। ইং ১৯৬৫ দা থবক্তগী পোখাখি। সাহিত্য গী লমদা মহাক্কী খৌদাং কয়াবু শক খঙবা ওইনা সাহিত্য পরিষদ ইম্ফালনা ইং ১৯৭৫ দা মহাকপু 'সাহিত্য ভূষন' পীদুনা ইকাইখুম্নখি। ইং ১৯৯৪ মার্চ ১২ দা পুন্সিগী অরোইবা য়াহিপ তানখি।

সোর্স : মরূপ